Ipinagtanggol ni Macky Mathay III ang girlfriend na si Sunshine Cruz laban sa nagtu-troll dito kaugnay sa investment mess na kinasasangkutan ng aktres at ng negosyanteng si Kathelyn Dupaya.
Sa kanyang Facebook post ngayong araw, May 31, sinabihan ni Macky ang isang netizen, na may user name na Yapadu Lahoylahoy Sunnix, na manahimik na lang dahil alam naman daw nito ang buong katotohanan.
Sabi ni Macky, "Kung makapag-post ka sa Facebook Yapadu Lahoylahoy Sunnix parang hindi mo alam kung ano talaga ang nangyari.
“Na nanahimik lang ako dahil mga babae ang nagtatalo dito, ngayon [pero] ng mag-post ka against my Sunshine, ako ngayon ang tinabla mo.
“Kung ako sa 'yo manahimik ka na lang kasi alam mo ang katotohanan. Galamay ka lang!”
Ayon sa source ng PEP.ph (Philippine Entertainment Portal), si Yapadu Lahoylahoy Sunnix ay kamag-anak daw ni Kathelyn.
Nag-invest si Sunshine ng milyong pisong halaga sa negosyo ni Kathelyn noong 2017.
Ngunit hanggang ngayon ay hindi pa raw naibabalik ang halos kalahati ng kanyang na-invest sa Brunei-based company ni Kathy.
Bukod kay Sunshine, ilan pang pangalan na nasangkot sa nasabing kontrobersiya ay sina Ynez Veneracion, Ara Mina, Joross Gamboa, Dianne Medina, at ang perfume magnate na si Joel Cruz.
Sinampahan na ni Joel ng reklamong estafa si Kathy.