Napasigaw, napalundag, napasayaw, at nagpaikot-ikot sa tuwa ang mga host ng It's Showtime, sa pangunguna ni Vice Ganda, sa opening ng Kapamilya noontime show nitong Lunes, July 6, 2026.
Matapos kantahin ang It's Showtime theme song, masigla at punung-puno ng enerhiya na binati ni Vice ang kanilang manonood o Madlang People.
Sa sobrang tuwa, pinasugod pa ni Vice ang kanyang co-hosts sa kinaroroonan ng live audience upang personal na makisaya, makisayaw, at makipag-interact sa mga ito.
Pagbalik sa entablado, biglang naging demure at seryoso ang TV host-comedian.
Muling bati niya: "Isang mapagpalang Lunes sa inyong lahat.
"Sa araw na ito ay i-claim natin ang mga blessings, opportunities, at chances to be better.
"This is the day that the Lord has made. So we will rejoice!"
Matapos itong sabihin ni Vice, mabilis siyang sinundan ni Vhong Navarro sa pagpapakilala sa nakisaya nilang mga bisita sa opening ng programa—ang mga finalist ng "Tawag ng Tanghalan (TNT)" Year 10.
Netizens' Reactions to Vice's Opening Statement
Mabilis naging usap-usapan sa X (dating Twitter) ang masayang opening ng It's Showtime, partikular ang mensahe ni Vice.
May ilang netizens na nagbigay ng kani-kanilang interpretasyon at iniugnay ang naging pagbati ng comedian-host sa pagkakaaresto kina Senator Rodante Marcoleta at dating Congressman Mike Defensor nitong umaga ng Lunes, July 6, bago umere ang It's Showtime.
Gayunman, walang direktang binanggit si Vice o ang programa tungkol sa pagkakaaresto ng dalawang personalidad.
Inaresto sina Marcoleta at Defensor sa bisa ng warrant of arrest na inilabas ng Sandiganbayan Third Division kaugnay ng kasong plunder na isinampa laban sa kanila ng Office of the Ombudsman.
Read: Marcoleta camp says he surrendered; PNP insists he was arrested
Nag-ugat ang kaso sa hindi pagdeklara ni Marcoleta sa kanyang Statement of Contributions and Expenditures (SOCE) at Statement of Assets, Liabilities, and Net Worth (SALN) ng PHP75 million na campaign donations na natanggap niya mula sa tatlong indibidwal noong January 2025, noong siya ay kinatawan pa ng SAGIP Party-list sa Kongreso.
Nangyari ito bago magsimula ang official campaign period para sa 2025 senatorial election kung saan siya tumakbo at nanalo.
Si Defensor at ang mga negosyanteng nagngangalang Joseph Espiritu at Aristotle Viray ang tatlong donors na nagbigay ng campaign donations kay Marcoleta na naging batayan ng isinampang kaso.
Marcoleta and Defensor's Role in the ABS-CBN Shutdown
Kaugnay nito, naungkat sa diskusyon ng ilang netizens ang naging papel nina Marcoleta at Defensor sa hindi pagbibigay ng franchise renewal sa ABS-CBN noong 2020.
Sina Marcoleta at Defensor ay kabilang sa mga mambabatas na hindi pumabor sa pagbibigay ng bagong prangkisa sa ABS-CBN noong July 2020, na nagresulta sa pagkawala ng trabaho ng libu-libong empleyado mula sa nasabing network.
Noong July 10, 2020, tuluyang ibinasura ng Kongreso ang hiling ng ABS-CBN na ma-renew ang prangkisa ng network.
Read: Congress junks ABS-CBN franchise renewal
70 ang bilang ng kongresistang bumoto para tuluyang mapasara ang ABS-CBN, 11 lamang ang pabor na mag-operate ito, at 3 ang nag-inhibit.
Kabilang sa pumatay sa apela para sa franchise renewal ng ABS-CBN si Marcoleta na noo'y kinatawan ng Sagip Party-list at si Defensor na kinatawan ng Anakalusugan Party-list.
Read: Who are the 70 solons who voted to kill ABS-CBN appeal for franchise renewal?
Ang dalawang mambabatas din ang nanguna sa panggigisa at panggigipit sa mga opisyal at abogado ng ABS-CBN sa hearing.
May 5, 2020, nang magpaalam sa free-to-air television ang ABS-CBN, matapos maghain ng cease and desist order ang National Telecommunications Commission (NTC) upang itigil ang broadcast ng giant network sa radyo at telebisyon.
Napaso ang prangkisa ng ABS-CBN noong May 4.
Read: Rep. Rodante Marcoleta, hindi pa tapos ang isyu laban sa ABS-CBN