Inalay ni Kyline Alcantara ang pamimigay ng libreng gasolina para sa drivers sa kanyang lolo na jeepney driver noon sa Bicol.
Sa Instagram noong April 10, 2026, ibinahagi ni Kyline ang ilang larawan at videos ng pamimigay niya ng libreng gasolina sa drivers sa isang gas station.
Saad ng Kapuso actress sa kanyang post: "Lumaki akong jeepney driver ang namulatan kong trabaho ni Papa Ben.
"Takbuhan siya ng mga nangangailangan sa barangay namin sa Bicol, kaya iniisip ko for the past few weeks, kung ano kaya ang mararamdaman niya kung makikita niya at mararanasan ang fuel crisis ngayon."
Unang apektado sa pagtaas ng presyo ng langis ang drivers ng jeep, tricycle, TNVS (Transport Network Vehicle Service), food, at delivery riders kaya sila ang napili ni Kyline na tulungan sa kanyang kawanggawa.
Aniya: "Lahat tayo ay apektado ng krisis na ito pero iba-iba ang impact nito sa atin.
"Maaaring maswerte tayo na hindi ganoon kabigat gaya sa mga kababayan natin na jeepney, tricycle, o TNVS drivers.
"Kaya kung kaya natin na matulungan sila, sana magawa natin sa abot ng ating makakaya.
"Maliit na tulong man, pero kapalit nito ay ngiti na bubuo sa araw natin. Para ito sa kanila, para sa mga ka-tropa ni Papa Ben."
Hinikayat din ng aktres ang mga kaibigan at kasama sa trabaho na gumawa ng kahalintulad na gawain para makatulong sa mga nahihirapang maitawid ang araw-araw na pangangailangan.
Apela ni Kyline: "Kaya sa mga kaibigan ko, kasama sa trabaho, kababayan, ikaw—tulungan natin sila, kahit sa maliit na paraan na kaya natin.
"A little kindness goes a long way in a world that needs it most."
View this post on Instagram
Sa comments section ng kanyang post, maraming netizens ang pumuri sa kahanga-hangang gawin ito ni Kyline.
Komento ng isang netizen: "I'm so very proud to you kyline as a fan, sa oras ng crisis tlga, maasahan ka ng acting mga kababayan mapakalamidad man o ganitong krisis n kinkaharap, daig mo pa ang mga nkaupo sa lipunan, na walang ginagawa pra matulungan mga taong bomoto sa knila,,, Your such a influencer or model to other people in this kind of situation, salute kme sayo"
Ayon sa isa pa: "idol ko tlaga to, akala nila maldita o maarte pero ang alam ko lng pinatatag xa at naging malakas dahil sa lahat ng pinagdaanan nea sa buhay. Npaka simple at marunong lumingon sa pinanggalingan"
Read: Ama ng nam-bully umano sa anak ni Alfred Vargas, isa ring aktor
OTHER PERSONALITIES ALSO GIVE FREE FUELS
Ilan pa sa mga kilalang personalidad na namigay rin ng libreng gasolina ay ang CEO ng Beautederm na si Rei Anicoche-Tan at ang vlogger-pharmacist na si Arshie Larga.
Noong March 28, ang Byahe Kalinga ni Tan ay namahagi ng libreng full tank na gasolina para sa 100 delivery riders at tricycle drivers.
Hindi raw ito para sa mga taga-Pampanga lang, kundi bukas sa lahat na mapapadaan sa kanila at nakapag-register.
Nagpasalamat naman si Ms. Rei sa mga bumili ng ibinenta niyang gamit para pambayad sa gasolinang ipamimigay niya.
Read: Rei Anicoche-Tan, may palibreng gas sa tricycle drivers at riders
Noong April 5, 2026, sinimula ni Arshie ang pamamahagi ng PHP500 fuel assistance sa mahigit isanlibong tricycle drivers sa kanilang lugar.
Kuwento ni Arshie sa Facebook, kinausap niya ang lahat ng TODA (Tricycle Operators and Drivers’ Association) sa kanilang bayan upang makuha ang listahan ng mga tricycle drivers na maaari niyang bigyan ng fuel assistance.
Matapos makuha ang kumpletong listahan, sumunod naman daw niyang kinausap ang ilang local gasoline station na magiging katuwang niya sa kanyang inisyatibo.
Sa kabuuan, umabot sa 1,169 tricycle drivers ang nabigyan ni Arshie ng fuel support sa loob ng dalawang araw niyang inisyatibo mula April 5 hanggang April 6, na nagkakahalaga in total ng PHP584, 500.
Read: Arshie Larga gives P500 fuel aid to 1,169 tricycle drivers