Tinukoy ni Elisse Joson ang dahilan kung bakit sila naghiwalay ng kapwa ABS-CBN artist na si McCoy de Leon.
July 2025 nang maglabas ng joint statement ang dalawa via Instagram at ipinaalam na nagdesisyon silang maghiwalay matapos ang limang taong pagsasama.
Hindi nila sinabi noon ang dahilan ng kanilang paghihiwalay, pero binanggit na sinubukan nilang ayusin subalit nabigo sila.
May anak na babae ang dalawa, si Felize, four years old.
Co-parenting ngayon sina Elisse at McCoy.
Read: Elisse Joson and McCoy de Leon confirm breakup
ELISSE GIVES DETAILS ABOUT BREAKUP WITH MCCOY
Sa kanyang latest revelation, sinabi ni Elisse na hindi maganda ang paghihiwalay nila noon ni McCoy.
Binanggit din niyang maraming bagay ang hindi nila napagkakasunduan ng Kapamilya actor.
Sa ngayon ay wala raw siyang intensiyong makipagbalikan kay McCoy. Ang gusto niya ay pagtuunan ang co-parenting nila sa kanilang anak.
“I think right now po our focus is really for Felize and having keeping the peace and harmony.
“Actually, when we separated kasi hindi din naging okay. I mean, it was mutual, but mahirap yung nangyari,” saad ng aktres sa YouTube video ng life coach na si Coach Pia Acevedo noong February 23, 2026.
Sa puntong iyon, inamin ni Elisse na may mga hindi sila napagkasunduan ni McCoy na siyang pinakamitsa sa pagtatapos ng kanilang pagsasama.
“Kasi may mga times po na, wala… kahit anong i-try niyo to fix your differences, hindi po nagwo-work.
"So let’s leave it like that, and focus on what matters.”
CO-PARENTING WITH MCCOY
Sa kabila ng hindi magandang paghihiwalay nila ni McCoy, nagdesisyon daw silang isantabi ito para sa kapakanan ng kanilang anak dahil naapektuhan ito sa breakup nila.
Ayon kay Elisse, “Kami po ni McCoy, okay naman. Nag-uusap naman po kami when it comes to Felize.
“We try our best. I guess, God had to find a way na maging okay kayo kahit na para kay Felize.”
Naging posible raw ang pagkakasundo nina Elisse at McCoy nang ipatawag sila ng pinapasukang eskuwelahan ni Felize.
Binanggit ng mga guro ni Felize na nakikita nilang nagkaroon ng pagbabago sa behavior ng bata.
Sa bahay ay “happy kid” daw si Felize.
Inakala raw ni Elisse na hindi apektado ang anak at nauunawaan nito ang estado ng kanyang mga magulang.
“But outside of our homes, yun pala, she’s feeling the change,” pagbabahagi ni Elisse.
“They noticed a few months na di siya nakikipag-join sa ibang kids and she always wants an adult, a grown-up, to be with her.”
Hindi na raw magkasama sa iisang bubong sina Elisse at McCoy noong mga panahong iyon.
Lahad ni Elisse: “Doon namin napagkasunduan na we really have to set our differences aside and we have to communicate right for her.
“We’re not gonna focus on our pains and traumas individually, but we will start communicating properly about Felize, the setup with Felize.
"So there are days na we will still go eat together as a family, play with her, spend time with her.
"So we really make an effort to be there for her, the both of us, with her…"
Dagdag niya, “But at the same time, also regularly explaining to her, telling her na, 'Mommy and Daddy are just friends now.'”
ELISSE JOSON ON HER HEALING JOURNEY
Dahil nagmula sa broken family, pangarap daw noon ni Elisse na magkaroon ng buong pamilya.
Subalit pagkatapos ng paghihiwalay nila ni McCoy, tinanggap daw niyang hindi na iyon magiging bahagi ng kanyang kuwento.
“After our separation, I was already okay," sambit niya.
"I thought parang tinanggap ko na that that dream that I had in my head, of having a complete family, won’t happen. So I was ready to move forward.”
Nagdesisyon daw siyang ituon ang kanyang panahon sa pagpapalaki sa anak.
Itinuon din daw ni Elisse ang oras sa inakala niyang “healing.”
“All the more I was going out. I was enjoying my time with people, with friends, connections with everybody, drinking din po.
“I’m doing this while I’m single. I’m not doing anything wrong.
“During that time, sinasabayan ko rin po ng wellness.”
Pinagsabay raw niya ang “yoga, workout, going out, staying up at night…”
Inakala raw niyang nagkakaroon siya ng “balance.”
Pag-amin niya, “Little did I know that that wasn’t healing at all. It was me just coping.”
Na-realize daw ni Elisse na hindi iyon ang landas na gusto niyang tahakin at ang gusto niyang pagkatao.
Nagsisimula raw uli ngayon si Elisse, at nagpapakatotoo sa sarili para simulan ang tunay na healing.
“Yung ginawa ko pong coping noon toward healing is just very surface level.
"So I really have to go deep within and this is gonna take a lot, it’s gonna be a journey…
“I guess, nasa isip ko nandun na ako sa first step na tinanggap ko kung ano talaga ang nangyari doon.”
Ngayon ay binibigyang pansin din daw ni Elisse ang kanyang spiritual life.
“At least, now, I am clear. There’s clarity on where I wanna go.
"Pag kasi clear ka kung saan ka papunta, anong gusto mong marating, sinong gusto mong maging, unti-unti na yan.
"Magsu-show na yung steps on how you can get there," pahayag niya.