Mariing itinanggi ni Marian Rivera na siya at ang asawang si Dingdong Dantes ang tinutukoy na "power couple" sa isang blind item na lumabas sa Internet noong nakaraang linggo.
Nakasaad sa blind item na mala-perfect ang imahe ng showbiz power couple na ito kung pagmasdan.
Pero, sa likod daw ng kanilang mga ngiti, may fairytale story na nagbabadyang mauwi sa kalungkutan.
Ang pinakarebelasyon dito, ilang beses na daw nasalisihan ng mister ang misis.
Nauwi pa raw ito sa pag-iyak ng babae sa lobby ng isang hotel kaharap ng mga malalapit na kaibigan.
Maraming netizens ang humulang baka sina Marian at Dingdong umano ang laman ng blind item.
Read: Michael Pacquiao's girlfriend breaks silence on age-gap issue
MARIAN RIVERA REACTS to "power couple" blind item
Sa episode ng Marites University sa YouTube noong January 8, 2026, diretsahang tinanong ng host, PEP.ph (philippine Entertainment Portal) contributor, at Movie and Television Review and Classification Board (MTRCB) board member Rose Garcia si Marian tungkol dito.
Kuwento ni Garcia, "Ni-message ko si Yan. Sabi ko, 'I'm sure aware ka sa blind item kung saan sa comments section kayong dalawa ni Dong ang binabanggit na kesyo kayo yun, something.'
"So, ang tanong ko lang, 'How are you?', ganyan."
Makalipas daw ang ilang sandali, tumawag na sa kanya si Marian.
Nagpadala rin si Marian ng picture nila ni Dingdong na kuha ilang sandali bago siya tumawag.
Sabi pa daw ni Marian sa kanya, "Ate, ano ba yan, jusme ano ba yang mga blind item na yan?"
Sabi naman ni Rose, "Parang sanay na sila kasi parang every year, lalo na raw pag January, palaging may ganyang chika, na hiwalay na. Kesyo si Dingdong ganito, kesyo ganyan."
Sabi naman ni Jun Nardo, co-host ni Rose, may mga ganyang tsismis daw after ng wedding anniversary ng couple.
Ipinagdiwang nina Marian at Dingong ang kanilang 11th wedding anniversary noong December 30, 2025.
Pero itinanggi nga ito ni Marian.
Makikita sa Instagram accounts nina Marian at Dingdong na masaya nilang ipinagdiwang ang Pasko at Bagong Taon kasama ng mga anak nilang sina Zia at Sixto.
Base sa IG post ni Dingdong noong January 1, nagbakasyon sila sa El Nido, Palawan.
