May pinariringgan ba si Vice Ganda?
Ito ang tanong ng netizens na nakapanood ng hirit ni Vice Ganda sa It's Showtime kahapon, September 26, 2025.
Read: Vice Ganda to corrupt politicians: "P.I. ninyo!"
Sa segment ng "Laro Laro Pick," nakikipagkulitan si Vice sa isang contestant nang bigla siyang humirit tungkol sa nagsasabing idol siya o kaya iyong kunwa'y malapit sa kanya pero iba ang sinasabi pag wala sa harap niya.
Lumapit si Vice sa camera at saka sinabing: "Ginagamit-gamit mo lang ako. Uutuin niyo ako na kunyari idol niyo ko, tuwang-tuwa kayo sa akin, pero babati lang naman kayo.
"Kunyari lang idol niyo ako pero bina-bash niyo ako pag may mga eksena ako sa Facebook."
Sumingit ulit ang contestant at sinabing "love na love" niya si Vice Ganda.
"O, di ba? Pinagloloko-loko mo lang ako. Mga echosera kayo dito! Kunyari close-close tayo pero may mga post naman kayong chaka tungkol sa akin!"
Natatawa si Vice habang inihihirit niya ito.
Naging tampok ng espekulasyon ang hirit ni Vice sa X.
Umabot na sa higit five million views ang video clip na ipinost ng isang netizen kalakip ng caption na "OMG HAHAHAHAHAHAHAHA OOPSSS" at hand-over-mouth emoji.
Sabi pa ng netizen, "LOVE YOU SO MUCH! but why do you keep getting into those situations hahahahuhu."
May mga nag-repost nito na nagsasabing tila malaman daw ang hirit ni Vice Ganda.
Tingin ng ibang netizens, patama umano ito ni Vice Ganda kay former PBB Celebrity Collab housemate na si Shuvee Etrata.
May iba ring netizens ang nagtatanggol kay Shuvee.
Kinukuwestiyon nila na wala naman daw binanggit si Vice Ganda kung may pinariringgan nga ba ito sa hirit nito.
Sinasabi pa ng ibang tagasuporta ni Shuvee na wala raw isyu sa pagitan nina Vice at Shuvee, kaya tigilan na raw ang pag-uugnay kay Shuvee sa sinasabing cryptic remark ni Vice.
Read: Alexa Miro confirms Sandro Marcos was her boyfriend for 5 years
SHUVEE ETRATA'S OLD POSTS
Bakit inuugnay ng ibang netizens ang hirit ni Vice Ganda kay Shuvee?
Nag-viral kasi sa X at Facebook ang nahalungkat na old posts ni Shuvee na may bahid ng kanyang saloobin sa mga isyung politika.
Read: Shuvee Etrata addresses criticisms about her political stand
Kasama na rito ang Facebook post ni Shuvee noong May 6, 2020 na isang meme na may litrato ni Coco Martin at Vice Ganda na umiiyak.
May kasamang text ang meme na kunwa'y sabi ni Coco sa salitang Bisaya na ang translation ay: "Tingnan mo Vice, inaway mo kasi si Quiboloy, na-shutdown tuloy."
Sagot kunwari ni Vice sa meme sa salita ring Bisaya na ang translation ay: "Joke lang naman yun."
Ang caption ni Shuvee rito ay "I can hear vice" at sad face emoji.
Ang tinutukoy na "Quiboloy" sa meme ay ang controversial founder ng organisasyong Kingdom of Jesus Christ, The Name Above Every Name at kilalang malapit na kaibigan at spiritual adviser ni dating Pangulong Rodrigo Duterte.
Bago ang ABS-CBN shutdown ay nagkaroon ng patutsadahan sina Vice Ganda at Quiboloy, kaya may ibang netizens ang gumawa ng meme na animo'y si Vice ang dahilan ng pagpapasara sa network gayong malayo ito sa katotohanan.
Ipinost naman ni Shuvee ang nasabing meme dalawang araw mula nang ipasara ng National Telecommunications Commission ang ABS-CBN dahil sa pasong prankisa ng network.
July 2020, tuluyang ibinasura ang franchise renewal application ng ABS-CBN nang mga bumotong kongresista sa ilalim ng administrasyon ng noo'y Pangulong Duterte.
Hindi naman malinaw kung ano ang pinanggagalingan ni Shuvee kung bakit niya pinost ang meme kina Coco at Vice noon.
May mga netizens na negatibo ang interpretasyon sa pag-post ni Shuvee ng meme, at may iba pa na inuugnay ito sa anila'y simpatiya political stand ng dalaga.
Meron din namang nagtatanggol kay Shuvee na hindi naman daw pinagtatawanan ni Shuvee ang meme dahil sad emoji pa nga raw ang caption ng dalaga sa old Facebook post nito.
Sa kasalukuyan ay wala namang direktang pahayag si Vice Ganda kung ano ang reaksiyon niya sa Facebook post ni Shuvee na naglalaman ng Vice-Coco meme kaugnay ng ABS-CBN shutdown.
Wala pa ring direktang pahayag si Vice Ganda tungkol sa hirit niya sa It's Showtime na inuugnay kay Shuvee.
Read: Annette Gozon-Valdes defends Shuvee Etrata from critics
VICE GANDA AND SHUVEE'S WORKING RELATIONSHIP
Malapit si Shuvee kay Vice Ganda, na bukas sa pagsasabing mabilis siyang napalagay ang loob sa dalaga.
Dati na ring na-post ni Vice Ganda na siya ang nakipag-usap kay Annette Gozon para kunin si Shuvee sa It's Showtime.
Si Gozon ang GMA senior vice president for programming, talent management, worldwide, and support group.
Bukod dito ay kasama rin si Shuvee sa PBB Celebrity Collab housemates na pasok sa cast ng MMFF 2025 entry ni Vice Ganda na Call Me Mother.
Parehong guests sina Vice Ganda at Shuvee sa The Big Night concert ni Klarisse de Guzman na ginanap sa Araneta Coliseum kagabi.
Pero hindi malinaw kung nagkausap doon sina Vice at Shuvee dahil wala silang production number na nagkasabay sila.