Hindi gaanong pinagtuunan ng pansin ni Palace Press Officer Claire Castro ang kontrobersiya tungkol sa "jet ski holiday" joke ng komedyanteng si Vice Ganda tungkol sa West Philippine Sea (WPS).
Sa ginanap na press briefing sa Palasyo ng Malacañang ngayong Martes, August 12, 2025, hinikayat ni Castro ang publiko na huwag maging masyadong sensitibo.
Paliwanag niya tungkol sa ginawang pagbibiro ni Vice nang matanong ng media: “Unang-una kasi, concert naman yun. Parang show naman yun.
“So, hindi kailangang maging balat-sibuyas ang sinuman.”
Read: Vice Ganda calls out "toxic" fans of PBB housemates
DUTERTE SUPPORTERS CALL OUT VICE GANDA FOR "JET SKI HOLIDAY" JOKE
Ginawa ni Vice Ganda ang "jet ski holiday" joke sa first night ng Super Divas: The Concert nila ni Regine Velasquez sa Araneta Coliseum noong Biyernes, Agosto 8, 2025.
Nilaro ito ni Vice mula sa “Jet2holiday” ad trend.
Spiel niya: “Nothing beats a jet ski holiday, right now from Manila to the West Philippine Sea via jetski.
“Get unlimited water bombing from Chinese vessels and a free trip to The Hague by the ICC [International Criminal Court].
“Promo applies to DDS [Diehard Duterte Supporters] only.
“Pinklawans [Leni Robredo supporters] and BBMs [President Marcos supporters] are prohibited.”
Bagamat marami ang natuwa at humanga sa matapang na biro ni Vice Ganda, na-call out naman siya ng mga masugid na tagasuporta ni dating Pangulong Rodrigo Duterte.
Kasalukuyang nakapiit ang dating Pangulo sa The Netherlands habang dinidinig ang kaso kaugnay ng inilunsad na drug war ng Duterte administration.
Noong panahon ng kampanya para sa 2016 presidential election ay sinabi ni Duterte na sasakay siya sa jet ski at magtutulos ng watawat ng Pilipinas sa WPS.
Gayunpaman, nang mahalal bilang Pangulo, natuligsa ang administrasyon nito sa pagiging malambot sa walang habas na panghihimasok ng China sa mga karagatang sakop ng exclusive economic zone ng Pilipinas.
Read: NETIZENS REACT: Vice Ganda's Duterte joke at concert
CASTRO SAYS JET SKI JOKE ORIGINATES FROM PRESIDENT DUTERTE
Para naman kay Castro, ang jet ski joke ay hindi na bago.
Aniya: “At ito naman talaga ay nangyari.
“Dyinok ni dating Pangulong Duterte yung tungkol sa jet ski.
“Sinabi pa niya na ang naniwala sa kanya sa sinabi niyang sasakay siya sa jet ski para sa West Philippine Sea, sinabi niyang stupid.”
Binigyang-diin naman ni Castro na ang pamahalaan ng Pilipinas ngayon ay nananatiling matatag sa paninindigang ipaglalaban ang maritime rights ng bansa.