Inamin ni Kylie Padilla na hindi niya nakita ang kanyang hinahanap sa isang married life sa pagsasama nila ng estranged husband na si Aljur Abrenica.
Pabiro ring tinawag ni Kylie na “big mistake” ang kasal nila ni Aljur, subalit binawi ito ng Kapuso actress dahil nagkaroon naman sila ng dalawang anak— sina Alas, 7, at Axl, 5.
Read: Kylie Padilla official statement on breakup with Aljur Abrenica
Nagsalita si Kylie ukol sa kanyang failed marriage sa interview sa kanya ng tiyahing si BB Gandanghari.
Na-upload ito sa YouTube channel ni BB nitong April 3, 2025.
Sa panayam, inusisa ni BB ang pamangkin tungkol sa pag-iwan nito sa showbiz noong kasagsagan ng kanyang career.
“I was in love, yes…” sabi ni Kylie, na inaming nabuntis siya habang ginagawa ang Kapuso fantasy series na Encantadia.
Dahil dito, iniwan muna niya ang showbiz para pagtuunan ang pagpapamilya.
Tanggap ni Kylie na marami — kasama ang kanyang mga mahal na buhay — ang na-disappoint dahil nangyari ito sa panahong umaalagwa na ang kanyang showbiz career.
KYLIE SPEAKS UP ABOUT MARRIAGE TO ALJUR
Tinanong ni BB kung naramdaman ba ni Kylie noong gusto na niyang magpakasal.
“Oh my god, should I be honest?” natatawang sagot ni Kylie.
“Ang hirap magsinungaling.
“Wait lang, maiisyu na naman kami. Baka may magalit.”
Seryoso niyang paliwanag: “I wasn’t ready to get married 'coz I didn’t really believe in marriage.
"But to make everyone else happy, we got married.”
Sinabi ng aktres na masaya na sana siya noong mag-live-in na lang sila ni Aljur at ayusin ang kanilang pagsasama.
Ipinaliwanag ni Kylie kung ano ang tingin niya sa kasal.
Saad niya: “Alam ko naman kasi very deep yung understanding ko na ibang commitment na talaga yung marriage.
“You really have to go through everything together, even the worst… [in] sickness and in health, di ba?
“When I was in the marriage, I didn’t feel that part.”
Sundot na tanong ni BB: “At which part of the marriage naramdaman mong, ‘Oh no, I think this is not what I wanted'?”
Sagot ni Kylie: “Pandemic na.
“Yun sabi nila, di ba? When pandemic comes, talagang nagharap kayo sa isa't isa kasi wala nang break.
“Na-test nga kami and we failed. What a big mistake…"
Kabig agad ni Kylie sa huling pahayag, “I’m kidding. Hindi naman.”
Sabi niya, dahil sa pagsasama nila ni Aljur ay nagkaroon siya ng dalawang anak.
Saad naman ni BB sa pagkabig ni Kylie, “But it can be a mistake.
"Puwede naman nating i-accept yun, e, as a lesson learned.
"No offense meant. We all make mistakes.”
Sumang-ayon si Kylie, “Yeah, and I’ve also forgiven myself…
"Nakapag-move on na rin naman siya [Aljur].”
Ang tinutukoy ni Kylie ay ang relasyon ni Aljur sa sexy actress na si AJ Raval. Tumatakbo rin bilang councilor sa Angeles City, Pampanga ang aktor.
LOOKING FOR A GOOD PROVIDER
Sinabi rin ni Kylie na kung makikipagrelasyon siyang muli, hangad niya ang isang good provider.
Dati raw ay hindi ito ikinukunsidera ni Kylie dahil lumaki siyang “privileged.”
Aniya: “I didn’t really think about it when I was falling in love. But now, gising na ako sa katotohanan.
“May anak na ako. I’m a single mom.
"Nakakapagod siya. I don’t wanna be tired forever.”
Aminado si Kylie na mahirap pagsabayin ang pagtatrabaho at pagiging single mom.
Masakit daw para sa kanya na sa pagkayod niya ay nasasakripisyo ang oras niya kasama ang mga anak sa kanilang paglaki.
Apektado raw siya kapag nagsasabi ang mga bata na hindi makakasama ang kanilang ina kapag tuluy-tuloy ang showbiz work nito.
Aminado si Kylie na ito ang struggle niya sa kanyang pagso-showbiz ngayon.
“The time that I spend at work is the time away from my kids. That’s the real struggle," sabi ng Kapuso actress.
“Kaya naiisip ko na rin, I have to find a provider that can give me that. Yung masasabi na, ‘O, sige, magpahinga ka na.’"
Biro pa ni Kylie, “Pag narinig ko na yun, ‘Oh my god, papakasalan na kita.’”
Sinegundahan ito ni BB na sinabing gusto rin nito ng good provider at para makapag-focus sa pagiging homemaker.
Ikinasal sina Kylie at Aljur noong December 2018.
Iamin ni Kylie ang paghihiwalay nila ng aktor noong June 2021.
Bago maghiwalay, walong taon silang magkarelasyon at tatlong taon nagtagal ang kanilang pagsasama bilang mag-asawa.
Read: Aljur Abrenica grateful for AJ Raval's "unconditional love"