Sa BarDa love team nina David Licauco at Barbie Forteza, may boyfriend ang Kapuso Primetime Princess, si Jak Roberto.
Si David, may girlfriend din daw.
“Hmmn…” makahulugang sambit ni David sa mediacon ng pelikulang G! LU noong Abril 17, 2024, Miyerkules, sa Kao Manila, Newport World Resorts, Pasay City.
Pero ang ganda-ganda ng kumbinasyon nila ni Barbie. Hayan nga’t nakatapos na sila ng pelikula, That Kind of Love.
Ano ang kaibahan ng tambalan nila ni Barbie sa movie kumpara sa teleserye?
Natigilan sandali si David bago sumagot, “Siguro sa teleserye… same-same lang naman. Ang pinagkaiba nun, nagpunta kami sa Korea, na na-enjoy namin talaga yun.
“Kasi mahilig ako sa Korean food. Mahilig din si Barbie dun. Saka I think, pag movie kasi, mas maraming shots, yun.
“So I think, sanay ako sa teleserye. Mas napapagod ako sa movie. Kasi teleserye actor ako, I would say, na gusto ko one take lang, ganun.
“So medyo may challenge when it comes to shooting movies. Kasi, hindi nga ako sanay.”
Read: Barbie Forteza, David Licauco more "comfy" now with Barda love team
DAVID LICAUCO TARGETS BEST ACTOR AWARD FOR PULANG ARAW
Magkatambal muli sila ni Barbie sa upcoming Kapuso primetime series na Pulang Araw, kasama sina Alden Richards, Sanya Lopez, at Dennis Trillo.
World War II ang setting ng teleserye, kaya magastos iyon, at isa sa high-profile projects ng GMA Network.
Sa laki ng cast ng Pulang Araw, mas mahirap bang mapansin? Though nakasama rin nila si Dennis sa Maria Clara at Ibarra.
“Mapansin? Hindi naman. Siyempre kung magaling naman ako dito, mapapansin ako,” malumanay na lahad ni David.
“Kaya ayun, trabaho ko na naman, galingan ko. Saka for me, ang goal ko dito — makapag-best actor o kahit man lang ma-nominate na best actor — dahil napakaganda nung proyekto, e.
“Saka ramdam ko talaga yung karakter ko dito na gusto kong may mapatunayan.
“Na sabihin natin, kung tumigil man ako sa showbiz, at least nasabi ko na nag-best actor ako.”
Andami nilang naging awards para sa Maria Clara at Ibarra, in fairness.
“Opo,” pagtango ni David.
Mas level up itong Pulang Araw?
“Ako, iyon ang gusto kong gawin! Siyempre ako… I mean, I can’t speak for them naman pero ako, sarili ko, gusto ko talagang mag-best actor dito at lahat gagawin ko, para magawa ko yun,” matamang pahayag ni David.
“I think makakaya naman as long as I put in the work, you know, like try to continue learning everyday.”
Is he more of a TV actor than a movie actor?
“Actually, parehas naman silang… magkaiba. Acting pa rin siya pero I think I lose patience sa maraming takes,” tugon ni David.
“Hindi nga ako sanay dun. Kasi parang… mahirap yun, e. Yung parang iibahin mo palagi, paulit-ulit.
“Siyempre since dun ako nasanay sa teleserye, nanibago ako sa pelikula.
“But of course, yung mga pelikula naman, mga movie actors, sasabihin nila, ayaw nila ng teleserye. Kasi, dun sila sanay [sa sistema ng pelikula], di ba?
“So… magkaiba lang dahil eventually naman, pag nagkaroon pa ako ng pelikula, matututo rin tayo niyan.”
Read: David Licauco excited for upcoming teleserye Pulang Araw; advocates safe motorcycle driving
DAVID'S DREAM to be in a star cinema movie
Ano ang dream role niya for movie, at saka for TV?
“Ang dream ko talaga is magkaroon ng Star Cinema movie. Yun ang dream ko,” kaswal na sabi ni David.
Kapag Star Cinema, mahabang proseso.
“Alam ko naman yun. I think siguro para magkaroon sila ng interes sa akin, siguro kailangan kong pagbutihin pa yung pag-akting ko,” pag-ayon ni David.
“So, itong Pulang Araw, gagalingan ko dito so that I can you know submit at least a case for them na, ‘Hey, maybe you can try me out as one of your actors sa Star Cinema.’”
Bakit Star Cinema? Meron namang GMA Pictures.
“Alam ko naman na may GMA Pictures but, you know, I grew up watching Star Cinema,” katuwiran ni David.
“Fan ako ni Kathryn [Bernardo] saka ni Daniel [Padilla], ni LizQuen.
"So I think, of course, I wanna do a GMA film, pero yun lang talaga, dun ako lumaki — manood ng Star Cinema.”
Kung gagawa siya ng movie sa Star Cinema, anong klase? Rom-com?
“Kathryn Bernardo tayo. Kahit ano, oo. Idol ko yun dati, e. Siya ang pinapanood ko, e,” pag-asam ni David.
“Kahit man lang makasama siya sa isang pelikula, maka-akting ko siya, dream ko yun, di ba?”
Parang mahirap pa iyon at this point.
“Mahirap yun, mahaba yung pila. Mahaba yung pila. Ano na lang ako, ahhh… support.”
DAVID LICAUCO ON NOT WEARING UNDIES IN FASHION SHOW
Yayamanin ang karakter ni David sa pelikulang G! LU, na nagtatampok din kina Ruru Madrid, Derrick Monasterio, Kiko Estrada, Enzo Pineda at Teejay Marquez.
Sabi-sabi, ang laki rin ng iniyaman ni David sa out-of-town appearances niya.
“Sakto nga lang tayo,” sambit ni David.
“Ikaw naman. Ikaw ba? Ha?”
Kahit daw mahal ang talent fee niya ay kinakagat dahil most requested siya ng fans dahil sa pagganap niya sa Kapuso primetime series na Maria Clara at Ibarra (Oktubre 2022-Pebrero 2023).
“Baka wala lang silang mapili. Baka wala silang ano, wala silang mahanap na iba,” sabi ng tinaguriang "Pambansang Ginoo."
Read: How David Licauco's life has changed in the last five years
Totoo ba na ayaw na niyang magpa-"Felix Bacat" sa Bench Body?
Ratsada ang co-star niyang si Derrick sa summer 2024 campaign ng Bench Body, pero ang "pabukol" ni David, missing in action.
View this post on Instagram
“Hindi naman sa ayaw. Pero kasi, nahihiya talaga akong gawin yung mga ganung bagay,” saad ng 29-anyos na Kapuso actor.
“Shy type kasi ako.”
Naku! Napaka-confident niya dati, huh?!
“Dati! Nagbago na tayo ngayon.”
Sa storycon ng G! LU noong Marso 19, 2019 sa Novotel Hotel, Cubao, Quezon City, meron pa siyang pilyong quotes, at game sa mahaharot na pahiwatig.
Read: David Licauco, aminadong hindi masyadong active ang sex life
Paliwanag ni David, “Dati kasi, sinasadya kong maging ganun. Kasi akala ko, yun yung maangas.
“Ganito naman talaga ako. Mahiyain talaga ako na person. Kunwari tingnan mo dun, nahihiya ako.
“Pero pag solo-solo lang… ikaw ba? Ayokong pinag-uusapan ang sarili ko, e. Ikaw ba?”
Bakit naman? Ngayon ay mas marami na talaga ang sumusuporta, tumatangkilik, kinilikilig, umiidolo, o nagmamahal sa kanya.
Napabuntong-hininga si David, “Oo naman, siyempre. Oo naman, masaya ako na iniidolo nila ako. Pero siyempre, ano lang tayo — chill lang tayo.
“Ano pa rin ito, ahhh cute lang.” Naramdaman niya yung pressure na kaakibat ng kasikatan?
“Hindi, wala naman. Hindi ko iniisip yung mga ganun,” pagmamatuwid ni David.