Tuluyan nang tinuldukan ng comedian na si Michael V. a.k.a Bitoy ang kumakalat na espekulasyong malapit nang magtapos ang pinagbibidahan niyang GMA-7 sitcom na Pepito Manaloto.
Sa 24 Oras nitong April 20, 2024, nilinaw ni Michael V. ang tunay na dahilan ng kanyang Facebook post kamakailan na pinag-ugatan ng usap-usapang mawawala na sa ere ang kanilang programa.
Caption ni Bitoy sa kanyang post, kalakip ang litrato nila ng kanyang co-stars habang magkakayakap sa set (published as is), "Pepito Manaloto is more than just a fictional family on TV.
"It’s a real family that extends to its cast, writers, staff, crew, the network and most of all, our beloved audience.
"Maraming, maraming salamat po sa oras at pagmamahal ninyong lahat."
Bukod kay Michael V., magkakasunod ding nag-post sa Instagram ang co-strs niya sa Pepito Manaloto na sina Manilyn Reynes, Janna Dominguez, Maureen Larrazabal, at Arthur Solinap noong April 15.
Dahil dito, marami sa netizens ang naghinala na ang yakapan at pagpu-post ng Pepito Manaloto stars ay hudyat ng pamamaalam nila sa isa't isa dahil sa pagtatapos ng kanilang programa.
Direkta naman itong pinabulaanan ni Bitoy.
Read: Michael V., bilib sa young cast members ng Pepito Manaloto: Unang Kuwento
Saad niya kay Nelson Canlas sa 24 Oras, "Diretsahang sagot, hindi [pa kami magtatapos].
"Yung photo naman na lumabas, yung group hug na yun, actually yung photo na yun is ang nire-represent nun is remembrance and appreciation."
Dala lang daw ng tuwa at pasasalamat kung kaya't minarapat nilang magyakapan dahil sa pagiging emosyunal.
Ani Bitoy, "Natutuwa lang kami na after all these years na after ng pandemic magkakasama pa rin kami."
Read: Michael V. renews contract with GMA-7; is he ready to host a noontime show again?
Mabilis din naman itong sinang-ayunan ni Manilyn.
Saad niya, "Naiiyak kami kasi hindi po namin maisip na hanggang ngayon sa tinagal-tagal ng Pepito Manaloto, fourteen years na kami, talagang nandiyan sila simula’t simula.
"Nakakataba ng puso."
Ang weekly comedy show na Pepito Manaloto ay 14 taon nang umeere.
Read: Michael V at Manilyn Reynes, nami-miss ang presence ni Direk Bert de Leon sa Pepito Manaloto
Sa katunayan, may hinahanda raw silang summer special na handog nila sa kanilang mga tagahanga at tagasubaybay.
Pagbabahagi ni Bitoy, "Nag-shoot kami sa Nueva Ecija, actually ang ganda nung pinag-shoot-an namin.
"Tapos, of course, it has something to do with family.
"Tsaka yung family outside of the family ng Manaloto, pati yung mga taga-opisina kasama namin, tsaka mga kapitbahay."
Read: Kapuso comedian Michael V. on crossing paths with Kapamilya comedian Vice Ganda: “Possibilities.”