Binawi ng House of Representatives ang prangkisa ng Sonshine Media Network International (SMNI) sa ikatlo at huling pagdinig sa plenaryo ng Kamara nitong Miyerkules, March 20, 2024.
Ang prangkisa ng Swara Sug Media Corporation ang kumpanyang nagpapatakbo ng SMNI ng Kingdom of Jesus Church ng kontrobersiyal na pastor na si Apollo Quiboloy.
Read: Apollo Quiboloy, pinaaaresto ng Senado
Ayon sa ulat ng inquirer.net, sa nasabing plenary session ay 284 mambabatas ang pumabor na bawiin ang prangkisa ng SMNI sa ilalim ng Republic Act No. 11422, ang batas na nagbigay sa Swara Sug ng 25-taong legislative franchise.
Apat na mambabatas ang bumoto laban sa pagbawi at apat din ang hindi bumoto.
Ang mga kumontra na bawiin ang prangkisa ng SMNI ay sina Paolo Duterte ng Davao City, Gloria Macapagal-Arroyo ng Pampanga, Drixie Mae Cardema ng Duterte Youth party-list, at Ron Salo ng Kabayan party-list.
Ang mga nag-abstain naman ay sina Claude Bautista ng Davao Occidental, Jack Duavit ng Rizal, Mujiv Hataman ng Basilan, at Samuel Verzosa ng Tutok To Win party-list.
Sa sponsorship bill speech ni House committee on legislative franchises chair at Parañaque City representative Gustavo Tambunting, sinabi nitong matapos ang mga deliberasyon at pagdinig ay napatunayan nilang may mga nalabag ang Swara Sug sa prangkisa nito.
Ibinigay niyang halimbawa ang importansiya at pagiging powerful ng broadcast media para sa pagbuo ng public opinyon.
Aniya, “It is, therefore, important that broadcasting, especially news reporting, is fair and accurate.”
Nadiskubre rin ng komite sa mga isinagawa nilang pagdinig na lumabag ang Swara Sug sa Sections 4 at 7 ng RA 11422 dahil sa “blatant Red-tagging, fake news peddling and violations of broadcasting standards” ng SMNI.
Read: PISTON condemns SMNI's red-tagging allegations
Dagdag pa rito ang pagkabigo ng Swara Sug na i-report sa Kongreso ang mga pagbabago sa kanilang corporate structure and ownership na labag sa Sections 10, 11, at 12 ng nasabing batas.
Nagsimula ang imbestigasyon ng Swara Sug franchise violations dahil sa diumano'y malawakang pagpapakalat ng SMNI ng fake news, kung saan may isang balita na inakusahan si House Speaker Ferdinand Martin Romualdez na gumastos ng PHP1.8 billion sa kanyang foreign trips noong 2023.
Ang SMNI talent Jeffrey Celiz ang nagbanggit nito sa programa nilang Laban Kasama ang Bayan.
Mariin itong pinabulaanan ni House secretary general Reginald Velasco.
Read: MTRCB denies SMNI's motion for reconsideration, extends suspension of 2 shows
Inilabas niya ang mga dokumentong nagpapatunay na PHP4.3 million lamang ang ginastos ni Romuldez sa kanyang foreign trips at ang buong Kongreso ay gumastos lang din ng halos PHP35.3 million.
Napansin din ni Gabriela women’s party-list representative Arlene Brosas na binalewala ni Quiboloy ang ilang imbitasyon sa kanyang dumalo sa pagdinig sa Kongreso.
Boto siya sa pagbawi ng prangkisa ng SMNI.
Aniya, “While freedom of the press is a fundamental right that should be protected, it does not extend to the spread of misinformation and lies. SMNI does not have the right to claim that the revocation of their franchise is an issue of press freedom when they are spreading misinformation."
Ayon naman kay ACT Teachers party-list respresentative France Castro, na bumoto rin pabor sa pagbawi ng prangkisa, “SMNI is not a part of media and should not be compared to real media.”