Hindi napigilang maging emosyunal ng Kapamilya A-lister na si Kathryn Bernardo nang muli siyang mag-renew ng exclusive contract sa Star Magic, ang talent management arm ng ABS-CBN.
Pagkatapos ng ilang buwang espekulasyon, naganap na sa wakas ang inaabangang contract signing ni Kathryn sa Kapamilya network ngayong Biyernes ng hapon, February 2, 2024.
Present sa contract signing ang lahat ng top executives ng Kapamilya network, na isang pagpapakita ng suporta sa kanilang prized talent.
Naroon sina Chief Executive Officer and President Carlo Katigbak, Chairman Mark Lopez, Chief Operating Officer for Broadcast Cory Vidanes, Head of Star Magic and Entertainment Production Laurenti Dyogi, Head of ABS-CBN Films Kriz Gazmen, Chief Finance Officer Rick Tan, at Head of Star Magic Marketing and Senior Talent Manager Alan Real.
Read: Kathryn Bernardo set to renew contract with Star Magic
Matapos pumirma ng kontrata, isa-isang pinasalamatan ni Kathryn ang lahat ng taong tumulong, nakasama, at nagmahal sa kanya sa loob ng dalawang dekada niya sa show business.
Kabilang na rito ang ABS-CBN, fans, kaibigan, at kanyang pamilya.
Ayon kay Kathryn, malaki ang utang na loob niya sa ABS-CBN, na itinuturing niyang pangalawang tahanan, dahil sa pagbibigay nito ng pagkakataong tuparin ang kanyang mga pangarap.
Read: Kathryn Bernardo lilipat na sa Crown Artist Management nina Maja Salvador at Rambo Nuñez?
Ilang pagsubok man ang hinarap at haharapin pa ng kanyang home network, pangako ni Kathryn na kailanman ay hinding-hindi niya ito iiwan.
Saad ng aktres, "I remember in 2020, I made a promise. Sinabi ko sa ABS-CBN na, 'Hindi kita iiwan at nandito lang ako hanggang makabangon ka ulit.'
"And today, here I am, fulfilling that promise. Ang daming nangyari sa ABS-CBN but mahal ko, e — mahal ko sobra yung kompanya.
"Together, we will rise despite all the challenges, we’ll be stronger and even better.
"To my bosses, you're like a family to me, and my friends. Itong signing ng contract na ito [ang dahilan] is because I trusted you more than anybody when it comes to work.
"I'm signing this contract to seal the friendship. Hindi ako mag-i-stay dito sa ABS-CBN kung wala kayo. Malaking parte sila kung bakit ako nandito."
Read: Trending: Kathryn Bernardo, Daniel Padilla defend ABS-CBN
Dagdag pa niya, "Hindi ako makakatulog kapag nakita ko sila at iniwan ko sila, hindi ko kaya.
"It's my appreciation because ang hirap dito sa industry na to, e, these people, grabe, sinuportahan nila ako.
"Kaya thank you for making time to know me, understand me, and thank you for supporting my decisions in everything that I do."
KATHRYN'S MESSAGE TO FAMILY AND FRIENDS
Pinasalamatan din ni Kathryn ang kanyang pamilya at mga kaibigan na nanatili raw kasa-kasama at kasangga niya sa matinding dagok na pinagdaanan niya noong nakaraang taon.
Walang ibang binanggit si Kathryn, pero mahihinuha na ang pinatutungkulan niya ay ang hiwalayan nila ng dating nobyong si Daniel Padilla pagkatapos ng 11 taong relasyon.
Mangiyak-ngiyak na mensahe ni Kathryn: "To my friends and family, grabe yung pagpapahalaga ko ngayon sa mga taong ito.
"Last year was a very, very hard time for me.
"It’s so hard to find real friends in the industry. Ni-prove lang nila na possible din na makahanap ka ng mabubuting tao sa industriya on and off cam.
"Nandiyan sila lahat and they make my life lighter, they make everything so much better.
"Up until now, I'm smiling every day. I'm excited to see them. I'm excited to go home to see my family. I'm excited to go out and hang out with my friends.
"Sila yung mga nandiyan especially nung pinakakailangan ko sila. Thank you for staying and thank you for being with me throughout all this."
Read: Kathryn Bernardo bonds with John Lloyd Cruz, Maja Salvador, Mr. M amid rumored management transfer
KATHRYN'S MESSAGE TO HER FANS
Nagbalik-tanaw rin si Kathryn sa suporta at pagmamahal na ibinigay ng kanyang mga tagahanga.
Pagmamalaki ng aktres, masuwerte siya sa kanyang fans dahil suportado ng mga ito ang mga desisyon niya anupaman ito.
Sabi niya, "To my supporters, alam ko na naging mahirap din sa inyo, especially last year, so many challenges. Ang dami nating pinagdaanan pero nandito ako, nandito kayo, kaya natin, kinaya and kakayanin.
"So don’t worry about anything, don’t worry about me. Nandito pa rin ako, I will continue to make you proud.
“Maraming salamat kasi inintindi niyo lahat ng kailangan kong gawin and mga naging desisyon namin bilang tao, hindi bilang artista.
"Ayun yung pinakamagandang regalo na maibibigay ninyo sa akin, so thank you for giving me that freedom o choose what makes me happy."
Read: Daniel Padilla delights fans with "free concert" in Siargao