Isang linggo matapos maganap ang Miss Universe 2023 ay hindi pa rin humuhupa ang sentimyento ng publiko sa kinahinatnan ng pambato ng Pilipinas na si Michelle Dee.
Bagama't nakapasok sa semifinals ay kinapos si Michelle na umusad sa Top 5.
Kasabay ng pagtatapos ng kampanya ni Michelle ay ang paglaho ng tsansa ng Pilipinas na makamit ang ika-limang Miss Universe crown.
Read: Sheynnis Palacios on Miss Universe 2023 win: “It's history for my country.”
Marami sa tagasuporta ni Michelle ay hindi kumbinsido sa naging resulta ng pageant.
Read: Miss Nicaragua crowned Miss Universe 2023; Michelle Dee reaches Top 10
Sa palagay pa nga ng ilan ay nadaya si Michelle at mas malayo pa sana ang narating nito sa semifinals kung nabigyan lang ng fair chance.
Read: Rhian Ramos casts doubt on Miss Universe 2023 results; fellow celebs congratulate Michelle Dee
ALL CONTESTANTS ARE DESERVING
Ngunit kung si dating Miss Universe Gloria Diaz ang tatanungin ay walang dayaang naganap at hindi lamang pinalad si Michelle na masungkit ang korona.
"There are too many questions about it, 'kung dinaya,' pero parang sanay na ako, e.
"This is almost how many years? 40 years na yata yung [accusations na] 'nadaya,' 'inisahan,' 'dapat ganito yung kasali, hindi kasali,' parang okey...
"At the end, everybody really deserves to win. Sa totoo, you're not going to be there if you don't deserve to win."
Nakapanayam ng entertainment press, kasama ang PEP.ph (Philippine Entertainment Portal) si Gloria nung Sabado, November 25, 2023, sa Okada Manila.
Inanunsyo nang gabing iyon ang partnership between Hollywood film studio Warner Bros. at local production na Mentorque Productions na siyang nasa likod ng horror film at Metro Manila Film Festival entry na Mallari.
Kasama si Gloria sa cast ng Mallari na hango sa tunay na istorya ng Filipino serial killer na si Severino Mallari na gagampanan ni Piolo Pascual.
Read: Piolo Pascual, tinanggap ang 'Mallari' dahil sa "take it or leave it" asking price
NO SECRET FORMULA IN WINNING THE CROWN
Para kay Gloria, "destiny" ang pagiging Miss Universe titleholder at walang makapagsasabi kung sino sa mga kandidata ang papalarin na manalo.
Inalala ni Gloria nung sumali at nanalo siya bilang Miss Universe nung 1969 para maiuwi ang unang korona ng Pilipinas.
"I always feel it's fate," seryosong pahayag ni Gloria.
"Hindi naman ako yung pinakamaganda, e. Hindi ba? Ang daming mas maganda, ang daming matatangkad, ang daming malaking boobs, and during my time puro totoo yun, hindi ba? Pero at the end of the day, it's really suwertihan."
Dagdag niya, "I mean, you can move mountains, declare this, declare that. Pero at the end of the day, it's destiny."
Ikinumpara rin ni Gloria ang pagsali sa Miss Universe sa paglalaro ng lotto na kung saan ang lahat ng tumaya, bagama't walang garantiya ay may tsansa na manalo
"You and I, and everyone, if we bought a ticket to the lotto, we have a good chance of winning one in 10 million, one in two million, and since she was in that contest, she had a good chance of winning," paliwanag ni Gloria.
"Pero tayong mga Pilipino, nasanay tayo na laging panalo na all of a sudden we all feel na, 'Naku, dinaya,' 'Lutong Macao,' and stuff like that."
STORY ABOUT MELANIE MARQUEZ
Malapit sa puso ni Gloria si Michelle dahil na rin sa koneksyon niya sa ina nito na si Melanie Marquez.
Nabanggit ni Gloria na isa siya sa judges nang manalo bilang Binibining Pilipnas - International si Melanie Marquez nung 1979.
"There was so many 'cannot' kasi hindi marunong mag-English, 'cannot' kasi ganito, ganyan. I pushed for her talaga. She's beautiful. This is not an IQ contest. This is not a contest for who's the smartest or the best in English," sabi ni Gloria, pertaining sa English speaking skills ni Melanie na madalas nagiging tampulan ng tukso.
Pagpapatuloy ni Gloria, "Sa akin, in fact, all this time, sabi ko dapat all our Filipino contestants should speak in their language, whatever they feel like para they have time to think, di ba?
"Ang daming interpreter diyan. I said, you know if you're an Ilocana [and] that's your first language, speak in Ilocano, hindi ba?"
Going back to Michelle ay all praises si Gloria sa ipinakita nitong magandang laban bilang representative ng bansa.
"Amazing" kung ilarawan ni Gloria ang naging performance ni Michelle during the pageant.
"She was very confident, she had a beautiful gown. Nainggit nga ako, 'Susuot ko nga yan.' [I like] the black [gown], I like the one yung parang tattooed," ngiti ni Gloria.
Read: Michelle Dee honors Apo Whang-Od with Miss Universe 2023 gown
"And she had good answers and stuff. Pero iba naman ang type ng judges for this year."