Aminado si Allen Dizon na sa umpisa ay hindi siya naging sang-ayon sa pagiging bad boy ng kanyang karakter sa Abot Kamay Na Pangarap.
Sa takbo kasi ng kuwento ng top-rating GMA drama series, ang dating mabait na si Dr. Carlos Benitez ay nagiging salbahe na, partikular kay Dra. Annalyn Santos, na ginagampanan ni Jillian Ward.
Kuwento ni Allen sa panayam ng PEP.ph (Philippine Entertainment Portal), “Nung una, ayoko.
"Nung una, nagtatanong ako kay direk [LA Madridejos], sabi ko, ‘Direk, bakit parang nagiging bad boy si Carlos? Parang ang dami niyang red flag?’
“Sabi niya, ‘Wala, e, ito yung pupuntahan ng role mo, e, kasi masyado kang mabait so kailangang magkaroon ng kulay yung role mo.’
“Sabi ko, ‘Okay, wala namang problema.’
“Ang inisip ko lang, yung mga fans. Kasi may mga sinasabi sa akin, mga nagagalit sa akin, siyempre dahil mahal nila si Annalyn, mahal nila si Lyneth, e.”
Si Lyneth ay ang karakter naman ni Carmina Villarroel na ina ng karakter ni Jillian.
Pagpapatuloy ni Allen, “So lahat yung mga inaapi, siyempre, inaaway ako.”
Nakakaranas na raw si Allen ng pang-aaway sa kanya ng mga fans ni Jillian.
“Maraming nag-cha-chat sa akin, ang mga sinasabi parang, ‘Hoy sinungaling ka! Hindi mo naman inaamin na anak mo si Zoey! Tapos kung makapag-ano ka… plastik!’ Ganyan. ‘Malaki ngipin!’" ang tawa ng tawang banggit pa ni Allen sa mga panlalait sa kanya ng mga nagagalit kay Carlos.
Sa istorya ng Abot Kamay Na Pangarap, si Zoey (Kazel Kinouchi) ay tunay na anak ni Carlos kay Moira (Pinky Amador) at hindi ni RJ (Richard Yap).
Read: Pinky Amador grateful to be considered as "super villain'
Sa kabila ng mga nagagalit kay Allen ay may clamor na sa ending ng serye ay sina Carlos at Lyneth ang magkatuluyan, at hindi sina Lyneth at RJ.
“Hindi ko alam, e, wala akong idea talaga. Like yung tine-taping namin ngayon, yung week fifty-seven. Yung fifty-eight, kaka-send pa lang kagabi [ng script], hindi ko pa nababasa.
“Puro hand-to-mouth kami, e.
“Of course, matutuloy ang kasal namin, pero after nun, siyempre, magkakaroon ng mga away-away, mga conflict.”
Rebelasyon pa ni Allen nang tanungin kung totoong hanggang January eere ang kanilang show, “March na! For now, March na. Pero hindi pa raw sure.”
ALLEN'S UPCOMING MOVIE
Bukod sa Abot Kamay Na Pangarap ay may mga bagong pelikula si Allen.
Tampok siya sa Ligalig with National Artist Nora Aunor, sa direksiyon ni Topel Lee, at sa action film na Off-Load, sa direksiyon ni Rommel Ricafort.
Nandyan din ang Abenida, sa direksiyon ni Louie Ignacio, kung saan nanalo si Allen ng Best Actor sa International Imago Film Festival di Civitella del Tronto sa Italy.
Kasama naman niya sina Laurice Guillen, Sunshine Cruz, at Teri Malvar sa Pamilya Sa Dilim, sa direksyon ni Jay Altarejos.
Tinatapos na rin ni Allen ang horror family drama na Poon kasama sina Janice de Belen, Ronaldo Valdez, Gina Pareno at Lotlot de Leon, at ang Acetylene Love with Cannes Best Actress Jaclyn Jose.
At magandang balita sa mga tagasubaybay ng Abot Kamay Na Pangarap dahil magsasama sa isang mainstream movies sina Allen at Carmina Villarroel na kukunan sa Australia early next year!
MORE THAN JUST BRAND AMBASSADOR
Samantala, nagkuwento rin si Allen tungkol sa kanyang pagiging brand ambassador ng SMART Access Philippines, isang international consultancy agency na tumutulong sa mga nais mag-migrate at mag-aral sa Australia.
Nakausap ng PEP.ph si Allen sa kanyang contract signing na ginanap noong Biyernes, Nobyembre 3, 2023, sa Trident Tower sa Makati City.
Bukod kay Allen, present din sa contract signing ang kanyang manager na si Dennis Evangelista, ang SMART Access owner/founder/director na si Bibhusan Joshi, at ang country manager na si Stephanie Lasig, na naging kaklase ng aktor.
Hindi ba nagtanong si Allen kung bakit siya ang kinuhang ambassador gayong wala naman siyang planong mag-aral sa Australia?
“Hindi, kasi kilala ko sila even before, so hindi naman sa bakit ako. Alam ko naman na magiging partner ko sila, kasi hindi lang naman pagiging ambassador, gusto ko ring makatulong sa company.
“Kasi di ba once naging endorser ka, mukha ka ng company. Siyempre kung anuman ang mangyari sa company, kasama yung mukha ko dun.
“Pag nagkaroon ng problema iyan, magkaroon ng anuman iyan, kasama yung mukha ko, pangalan ko.
“So ako I make it a point, once na meron akong ine-endorse, inaalam ko muna sino may-ari.
"So since they are lawyers, na hindi ko alam kung makukulong ako, hindi ko alam kung ano ang magiging kaso ko pagdating ng araw,” pagbibiro ni Allen.
Simula pa 2014 ay tumutulong na ang kumpanya sa pag-aayos ng lahat ng kakailanganin, maging ang visa, ng mga nagnanais magkaroon o ipagpatuloy ang edukasyon sa Australia.
May apat na branches ito worldwide— sa Australia, Nepal, Pakistan at dito sa Pilipinas.
Bakit tinanggap ni Allen ang endorsement deal?
Aniya, “Hindi lang for them, not for making business, but to help other people especially sa mga kababayan natin.
“Na ako naman palagi akong merong time pagdating sa pagtulong, pagdating sa humanitarian project. Basta assistance sa mga kababayan natin, meron akong ganun.
“So hindi lang ako basta ambassador, endorser. Nandito ako for them, to help them, to promote them and to help other people especially Filipinos.”