Nagpaalam si Alma Moreno sa Viva.
Hindi na muna siya gagawa ng serye o pelikula para sa Vivamax, Viva One o Viva Films.
Read: Throwback photos ni Alma Moreno, “highly collectible” sa mga tito
"Sa awa ng Diyos, magaganda ang mga ginawa ko sa Viva," sabi ni Alma nang makausap ng Philippine Entertainment Portal (PEP.ph) sa 57th birthday celebration ni Senator Ramon “Bong” Revilla Jr. noong Setyembre 25, 2023, Lunes, sa grand ballroom ng Okada Manila, Entertainment City, Parañaque.
Read: Senator Bong Revilla, sabay na ipinagdiwang ang 57th birthday at 50th anniversary in showbiz
“Kahit sabihin mo na hindi ganung… supporting ka pero… yung role na ginagawa mo, ngayon ko lang ginagampanan.
“And then ngayon, nagpaalam ako kay Boss Vic [del Rosario], medyo nag-focus muna ako dahil tatakbo ako. Kagawad, barangay kagawad sa Tambo.”
Kabilang sa recent Viva projects ni Alma ang Paglaki Ko, Gusto Kong Maging Pornstar (2021), The Housemaid (2021), Pornstar 2: Pangalawang Putok (2021), Siklo (2022), 366 (2022), Virgin Forest (2022), Lovely Ladies Dormitory (2022), Salamat Daks (2023), Hilom (2023), at Mary Cherry Chua (2023).
Read: Unscripted scene nina Osang, Alma, Maui at Ara sa #Pornstar 2, nakakaintriga
ALMO MORENO FOR BARANGAY KAGAWAD
Ang Tambo ay isang barangay sa Parañaque City.
Pagkatapos maging senatorial aspirant sa May 2016 elections, ano’t kakandidato siyang barangay kagawad?
Ngumiti si Alma, “Ang slogan ko, pakinggan mo… ‘Walang maliit na puwesto sa gustong magserbisyo.’
“Si Vandolph kasi ngayon, siya ang pumalit sa akin bilang councilor. Nine years na councilor ako. Si Vandolph din, magna-nine years na rin. Last term siya ngayon.
“E, hindi naman puwede kaming magsabay bilang ano. So, ang barangay captain ngayon, yung daughter-in-law ko, si Jenn Quizon, asawa ni Vandolph.
“So, meron akong foundation, nakakagawa man ako, tumutulong pa rin ako kahit wala sa puwesto. Nakakatulong.
“What more kung nasa posisyon ka, mas malaki ang maitutulong mo. Di ba?
"Kasi, nagbo-volunteer-volunteer ako noong time, kasi nandiyan ako, adviser ni Vandolph. Adviser ni Jenn.
“Tapos balik-showbiz ako. Ngayon, nagpaalam muna ako sa showbiz. Kailangan may priority muna.”
Hanggang kailan ang pamamahinga niyang ito sa showbiz?
“Hindi! Babalik tayo diyan!” bulalas ni Alma.
“Kasi ang eleksyon naman, may deadline yan. Hanggang October 30. Ten days yan.”
SURE WINNER?
Naku, siguradong magwawagi siyang barangay kagawad?!
Umiling si Alma, “Walang sure win diyan. Pinagtatrabahuhan yan. Sa lahat naman ng laban, di ba? Pinagtatrabahuhan yan.”
Balewala sa kanya na pagtaasan ng kilay? Ba’t naman barangay kagawad?! To think na noong 2012, siya ang unang babaeng presidente ng Philippine Councilors League (PCL).
“Wala! Hindi ko iniintindi yang taas-kilay. Ang iniintindi ko, yung gagawin ko para sa tao,” sambit ni Alma.
“Parang konsehal din yan, e. Gagawa ka ng resolution, kung ano man. At diretsong tulong sa tao.
“Katulad sa akin, mga kaibigan ko. Senator Bong Revilla, ang sipag-sipag tumulong niyan. May project iyan na puwede mong ibaba sa Tambo. Bakit hindi mo kakayanin?
“Ilang senators ang puwede mong lapitan. For Tambo, di ba?”
Sakaling gusto siya uling interbyuhin ni Karen Davila kaugnay sa kanyang kandidatura, magpapainterbyu ba siya?
Natawa nang konti si Alma, “Tapos na yung isyu na yun. Ha! Ha! Ha! Bakit hindi? Kung pagtatagpuin namin, wala namang problema. Di ba? Yun lang yun.”
Read: Alma Moreno, masama pa rin ang loob kay Karen Davila?
IS LOVELY NESS IN LOVE?
Nag-host si Alma Moreno ng musical-variety show na Loveli-Ness noong 1987. Nowadays, what makes her lovely? Ano o sino ang nagpapaganda sa kanya ngayon?
“Wala. Siguro inspired lang ako. Kasi gusto ko yung ginagawa ko ngayon,” tugon ng 64-anyos na actress-politician.
“Lagi naman yun! Saka kilala nyo naman ako, lagi akong nakangiti. Saka wala akong bisyo.”
In love ba siya?
“In love ako sa mga kasamahan, kabarangay. Diyan ako in love,” sabi ni Alma.
Pagsisilbi pa rin ang nasa puso at isip niya, kahit komportable na siya sa kanyang buhay.
Tumango si Alma, “Siguro naman, namulatan ko na, time pa ni Joey Marquez. Vice Mayor pa si Joey Marquez, isang term.
“Tapos, ilang mayor siya. Kami pa rin ang magkasama. Nag-konsehal ako. I mean, siguro yun ang mundo ko din siguro.”
ON SON MARK ANTHONY
May political ambition ba iyong isa pa niyang anak na si Mark Anthony Fernandez?
Mabilis na sagot ni Alma, “Wala. Ano siya, tahimik. Gusto niya, yung ganung mundo lang. May sarili siyang mundo.”
Napanood ba niya ang Vivamax movies ni Mark?
Natawa uli si Alma, “Ayoko! Si Boss Vic ang pinagkakatiwalaan ko na diyan. Sabi ko naman kay Boss Vic, ‘Boss Vic, ipinagkatiwala sa yo yung anak namin ni Rudy [Fernandez] kahit nung araw pa. Bahala ka na!’”
Kumusta na si Mark?
“OK siya. Ahhh wala akong problema sa kanya. May sarili siyang diskarte. Alam niyang mag-invest. Alam niya lahat,” pahayag ni Alma.
“Marunong ang anak ko. Tahimik lang yun. Mabait. Mabait.”