Kinumpirma ni ex-Pinoy Big Brother housemate Karen Bordador na "on the spot" ang hosting gig niya para sa fan meet ng K-drama actor na si Seo In Guk.
Ginanap ang event sa New Frontier Theater sa Quezon City noong Sabado, August 12, 2023.
Si Seo In Guk ay kilalang bida ng K-drama na Café Minamdang (2022) at Reply 1997 (2012).
Si Karen ay dating radio DJ at housemate ng Pinoy Big Brother: Kumunity Season 10 (2021-2022). Naging host din siya sa talk show na Pie Night Long sa Pie, isang free-to-air TV channel na pagmamay-ari ng ABS-CBN, KROMA, BEAM, at 917Ventures.
Sa kanyang vlog nitong Miyerkules ng gabi, August 16, idinetalye ni Karen kung paano siya inimbitahan na maging host ng fan meet.
Bandang 12:30 p.m. daw nang makatanggap siya ng text messages kunsaan hinihingi ang contact number niya para sa isang event.
Noong una ay hindi pa raw pinansin ni Karen ang inquiries dahil hindi pa niya alam kung para saan ito.
Hanggang sa nakatanggap daw siya ng tawag kunsaan iniimbitahan siyang mag-host ng Seo In Guk fan meet.
Sabi raw sa kanya ng kausap niya sa telepono, "Oh, it's gonna be today. Can you make it?"
Pinakita rin ni Karen ang screenshots ng Facebook chat messages nila ng kanyang manager mula sa Star Hunt ng ABS-CBN.
Base sa screenshots, eksaktong 1:14 p.m. at 1:19 p.m. nang tanungin si Karen ng kanyang manager kung payag siya sa hosting gig.
Eksaktong 1:30 p.m. nag-"yes" si Karen at nagsabing paalis na siya ng bahay.
Nagtanong pa siya kung saan ang venue para doon na siya diretso.
Ayon kay Karen, nagulat siya sa last-minute hosting gig, pero sa isip daw niya, "Challenge accepted. Bahala na si Lord."
Pinakita rin ni Karen ang screenshot ng paniniguro ng manager niya na kaya niya ang on-the-spot hosting gig.
Sabi pa sa screenshot: "Kasi last time na impress daw yung Korean management. Kasi ikaw daw hinanap."
Ipinaliwanag ni Karen na ito ang ikalawang beses niya na makatrabaho ang Korean team na bahagi ng nag-organisa ng Seo In Guk fan meet.
Una raw niyang nakatrabaho ang Korean team nang kunin siyang co-host ni MJ Felipe para sa fan meet ng 2NE1 member na si Park Bom, na ginanap sa New Frontier Theater noong Hunyo.
Base raw sa kanyang karanasan, "super strict on the dot" ang Korean team. Bukod sa script reading the night before the event, sumalang daw siya sa anim na beses na rehearsal kasama si Park Bom on the day of the fan meet.
KAREN BORDADOR ON REHEARSING FOR SEO IN GUK FAN MEET
Pero sa Seo In Guk fan meet, mabilisan daw ang preparasyon ni Karen.
Pagdating sa New Frontier Theater, sandali pa lang siya sa dressing room ay pinapunta na raw siya sa stage para mag-rehearsal bandang 2:38 p.m.
Doon daw niya na-meet ang Korean team, ang HY Official, at Filipino team, ang EPIC Events, na namahala sa event.
Hindi raw sila nag-runthrough para sa buong script dahil sa kakulangan ng oras.
Bandang 4:00 p.m. ay nasa dressing room na raw uli si Karen para sa kanyang hair and makeup.
Buti na lang daw at nahanapan siya agad ng glam team dahil wala na raw siya makontak sa mga kakilala niya dahil sa sobrang last-minute ng gig.
Ni wala raw siyang "proper outfit" dahil hindi siya handa sa event na nakatakdang magsimula ng 7:00 p.m. noong August 12.
ON REPLACING KRISTEL FULGAR
Hindi direktang binanggit ni Karen ang isyu kaugnay ng last-minute na pagtanggal sa original host ng event na si Kristel Fulgar.
Pahapyaw lang niyang sinabi sa vlog na may nangyari kaya ora-orada siyang kinuha na mag-host sa Seo In Guk fan meet
Ani Karen: "So, I don't really know what transpired earlier because that's none of my business.
"The point is they needed me that time. I just told myself my mind's gonna be 100 percent focused on this one.
"I put my phone down [and told myself], 'Okay, let's dive into it.'"
Kahit na kulang sa preparasyon, kumpiyansa raw si Karen dahil may background siya bilang DJ at host ng isang talk show.
"I wanna give a good show," diin niya.
"I don't wanna look like I just arrived, as if I memorized everything. It's like pretending you know everything but you do not."
Read: Kristel Fulgar meets Korean star Seo In Guk via video call
ON SEO IN GUK BEING "SO GAME!"
Humingi raw ng permiso si Karen sa Korean team kung puwede siyang mag-off script sa ibang pagkakataon at kung bukas si Seo In Guk na makipagkulitan.
Ibinigay niyang halimbawa ang segment kunsaan nag-prepare si Seo In Guk ng halo-halo. Ang nasa script daw ay siya ang titikim ng halo-halo at magsisilbing judge kung masarap ito.
Pero siya na rin ang nakaisip na si Seo In Guk ang mag-taste test para raw makita ng fans ang reaction ng K-drama actor sa ginawa nitong sikat na Filipino dessert.
Sabi pa ni Karen, "He made me comfortable hosting this event because he was just so game!"
Sa huli, sinabi ni Karen na masaya siya sa kinalabasan ng event.
Pagkatapos daw ng program ay pinayagan daw siya ng organizer na pumasok sa dressing room ni Seo In Guk sa backstage.
"He said he had fun! I said I hope he returns. We hugged, held hands... It was a good experience.
"All in all, I would tell you Seo In Guk is a really good person. He was just so welcoming.
"Although I was in front of a K-pop star, he made me feel so human. He was just so cool!"
Hindi na binanggit ni Karen ang mixed reactions sa kanyang pag-host ng Seo In Guk fan meet.
May ibang mga bumatikos sa kanya dahil mas gusto pa rin sana ng mga ito na si Kristel ang maging host ng event dahil kilalang avid fan ito ni Seo In Guk.
May iba ring hindi nagustuhan ang hosting style ni Karen.
Pero mayroon ding netizens na pumuri kay Karen dahil nagawa raw niyang masaya ang show at naging professional daw siya kahit na on the day lang siya naabisuhan tungkol sa event.
Pinasalamatan ni Karen nang husto ang fans ni Seo In Guk na na-appreciate ang kanyang trabaho.