Itinuwid ni GMA Network Inc. Senior Vice President Annette Gozon-Valdes ang balitang inilabas ng isang online news site na ang Belo Gozon Elma Parel Asuncion & Lucila Law Offices ang legal counsel ng TAPE., ang television production company na pagmamay-ari nina Romeo Jalosjos Sr. at Antonio Tuviera, sa trademark battle nito.
Ang TAPE o Television And Production Exponents Inc. ang producer ng kontrobersiyal at longest-running noontime show na Eat Bulaga!.
Partner naman ng Belo Gozon Elma Parel Asuncion & Lucila Law Offices ang ama ni Annette, si GMA Network Chairman at CEO Atty. Felipe L. Gozon.
Sa pamamagitan ng kanyang Facebook post nitong Biyernes ng hapon, June 23, 2023, nilinaw ni Annette ang tungkol sa maling haka-hakang tinutulungan ng Belo Gozon Elma Parel Asuncion & Lucila Law Offices ang ang mga Jalosjos at ang TAPE sa mga kasong posibleng harapin nito dahil desidido ang mga pioneer host ng Eat Bulaga! na sina Tito Sotto, Vic Sotto, at Joey de Leon na maangkin ang nabanggit na pamagat.
Tinawag ni Annette na "FAKE NEWS" ang lumabas na ulat.
Pahayag ng GMA-7 executive: “FAKE NEWS. Ano ba yan Bilyonaryo? Ok lang if you write your journalistic opinions on current issues, I would still respect that as part of freedom of speech. But when you include details that are FACTUALLY UNTRUE, parang may bad faith na yon eh.
“To correct this article Belo Gozon law firm is NOT the law firm of Jalosjos/Tape. GMA has already said our piece on the TAPE/TVJ issue and we stand by it."
Read: GMA Network remains neutral in TVJ-TAPE Inc. split
Mabilis na sinagot ng Bilyonaryo ang paglilinaw ni Annette. Nangatuwiran silang pinagtibay ni Tito ang mga espekulasyong tinutulungan ng law firm ni Atty. Gozon ang TAPE.
Sinabi umano ni Sotto na ang Belo Gozon Elma Parel Asuncion & Lucila Law Offices ang legal counsel ni Jalosjos, at ayon ito sa ulat na natanggap niya.
Inilahad ni Sotto na isang tauhan ng TAPE ang nilapitan ng taong nagpakilalang kinatawan ni "Attorney Belo" ilang buwan na ang nakalilipas.
Sa imbestigasyon, natuklasan daw ng tauhan ng TAPE na partner si Belo ng law firm ni Gozon at ang kinatawang lumapit sa kanya ang humiling ng mga dokumento dahil sa utos ni Jalosjos Sr.
Agad na sinagot ni Annette ang iginigiit na katuwiran ng nabanggit na online news site.
"Atty. Ike Belo (of BGEPAL law firm) passed away in 2004. He is the late father of Dra. Vicki Belo.
“I would like to speak to the TAPE staff that was allegedly approached by a representative of 'Atty Belo' to get to the bottom of these false reports.
"Apparently, hindi magaling mag-investigate itong TAPE staff nila,” pahayag at hamon ni Annette.
Sa eksklusibong panayam ng PEP.ph kina TAPE CEO and President Jon Jalosjos at TAPE Chief Finance Officer Bullet Jalosjos noong June 3, 2023, sinabi nilang ang "Tiongco Siao Bello & Associates" ang kinuha nilang law firm para sa trademark legal battle nila.
Read: Tito Sotto claims TVJ owns Eat Bulaga! trademark
Read: Jalosjos brothers on trademark war: "We have the papers to prove we own Eat Bulaga!"
Pero ayon kay Atty. Maggie Abraham-Garduque ng Abraham Pimentel & Acuna Law Office, siya ang bagong abogado ng TAPE. Ngunit paglilinaw niya, “But I did not replace Belo Gozon Law office, ha?”
Si Garduque ang hahawak sa masalimuot na usaping kinasasangkutan ng TAPE at nina Tito, Vic, at Joey tungkol sa tunay na nagmamay-ari sa Eat Bulaga! trademark.
Nakatakdang magpatawag ng pagpupulong si Garduque dahil pag-uusapan nila ng kanyang legal team ang mga hakbang na gagawin sa inaasahang legal battle sa pagitan ng TAPE Inc. at ng mga veteran host ng Eat Bulaga!.
Si Garduque ang isa sa mga abogado ni Vhong Navarro sa na-dismiss na rape case laban sa TV host-comedian.