Kung hosting at directing ng mga noontime show ang pag-uusapan, walang kaduda-dudang sanay na sanay na at marami nang experience si Randy Santiago.
Ilan sa kinabilangan niyang noontime shows ang Lunch Date, Happy Yipee Yehey!, Magandang Tanghali Bayan, Masayang Tanghali Bayan (MTB) at ‘Sang Linggo nAPO Sila.
Dahil mainit pa rin ang isyu tungkol sa Eat Bulaga, hindi nakaligtas si Randy nang kumustahin ng media ang barkada niyang sina John Estrada at Willie Revillame na dating nakasama niya sa ilang noontime shows.
“Ang dami kong barkada kasi but if you’re talking about Willie and John, we get to communicate regularly.
“In fact, birthday na ni John sa June 10 and magkikita-kita kaming lahat. Aside from that, very close si John sa grupo ng Ang Probinsyano and Batang Quiapo, I’m very sure nandoon din sila.
“Aside from that, siyempre barkada ko si John, ngayon mas naging barkada niya si Rowell at Raymart [mga kapatid ni Randy] because of Probinsyano, naging tight talaga sila. Every time na nagvi-video call sila, nagbabatian kami.
“Si Willie naman, nag-uusap kami about what’s next for him. Very exciting din kasi gusto niyang umikot and gusto niyang mag-tour din, so he might just do that,” kuwento niya.
Hindi ba sila nag-uusap ni Willie tungkol sa mga noontime shows?
Aniya, “Lately, hindi naman na namin napag-uusapan dahil ngayon lang nangyayari ‘to, e. So hindi namin nadi-discuss yun.
“In the meantime, nag-o-observe lang ako dahil hindi natin alam yung mga susunod na mangyayari, di ba? We don’t know what’s happening and I am very sure na alam niyo rin yung sa Eat Bulaga.
“Saan pupunta yung Eat Bulaga with TV5? Like, ano yung magiging time slot nila?
“Nakakagulat talaga, ang bilis ng mga pangyayari.
“Aside from that, nai-mouth nila nang mabilis din. Regardless of whoever you put there, as long as aandar ang noontime show, it will run. So it did. Hanep ‘no, napatakbo nila Paolo,” pagtukoy ni Randy kay Paolo Contis.
RANDY ON POSSIBILITY OF HOSTING REVAMPED EAT BULAGA
Kung sakaling ialok sa kanya yung hosting ng revamped Eat Bulaga, tatanggapin kaya ni Randy?
Lahad niya, “Wala pa naman, hindi pa naman nila naiisip yun, e. Alam naman natin na even before this, dapat inaayos na namin yung noontime ng ALLTV.
“It’s either I join It’s Showtime, kasi di ba naghuhurado ako doon? So, open naman tayo anywhere. Open tayo sa lahat.”
RANDY ON CHOOSING BEST HOSTS TO COMPETE WITH TVJ
Kung sakali naman na sa kanya ialok ang directorial job ng Eat Bulaga ngayon, sino sa tingin niya ang dapat maging hosts na puwedeng itapat sa TVJ?
“Kung maglalagay ka, dapat buong team na, e. Kahit tumapat lang, hindi naman kailangang bumangga, yung dapat sanay na sa noontime show.
“Maraming host na puwede, not necessarily naman na puro bata yung ilalagay mo, e.
“Importante yung may tumitimon e, yung mga layering.
“May tinatawag tayong layering: layer 1, layer 2, and layer 3. Katulad ng bawat shows, may ganoon to make it a big family and to make it work.
“Ang nakakatuwa kasi, maraming available ngayon and maraming sikat na magagaling dahil sa TikTok,” paliwanag ni Randy nang tanungin siya ng PEP.ph (Philippine Entertainment Portal) sa press conference ng AXEL PAF 76th anniversary concert na ginanap noong June 8, 2023 sa Philippine Armed Forces Museum, Villamor Airbase, Pasay City.
Sa darating na June 23, 2023 sa The Theater at Solaire magaganap ang AXEL PAF 76th anniversary concert ng OPM pop icons na sina Geneva Cruz, Roselle Nava, Raymond Lauchengco, Gino Padilla at Randy Santiago.
Asahan daw na kasama sa kanilang repertoire ang ilan sa mga pinasikat nilang awitin kagaya ng “Kailan” (Smokey Mountain), “Bakit Nga Ba Mahal Kita” (Roselle), “Closer You and I” (Gino), “I Need You Back” (Raymond) at “Hindi Magbabago.” (Randy).