Positive or negative?
Ito ang tanong kasunod ng isang ad campaign na nakabalandra sa isang double-decker bus sa London, United Kingdom.
Ipinost sa social media ng Filipino nurse sa U.K. na si May Parsons ang ad campaign.
Larawan ni May mismo ang makikita sa ad sa bus.
Eto ang copy ng ad: “The nurse who gave the world’s first COVID 19 vaccine. A Filipina. We give the world our best. THE Philippines.”
Si May ang kauna-unahang nurse na nagturok ng COVID-19 vaccine noong December 8, 2020.
Tumanggap rin siya ng George Cross, "highest award bestowed by the British government" sa mga civilians, mula kina Queen Elizabeth II at King Charles noong July 2022.
Ang Pinay nurse ang naging kinatawan ng health service community ng U.K. nang tanggapin ang award.
Saad ni May sa kanyang tweet noong May 7, 2023:
[twitter:
I hope that by seeing this, my brothers & sisters, Filipino nurses, feel seen, not just in the UK but in the world.Let's get heard. Thank you @bongbongmarcos @govph @teddyboylocsin @philippinesinuk @filipinonurseuk @FSNA_UK @PNA_UKnurses @tinig_uk @LaureBeaufils @ukinphilippines pic.twitter.com/ux4q773dmn
— May (@mayparsons) May 7, 2023
]
Read: Pinay nurse, napiling tumanggap ng George Cross award mula kay Queen Elizabeth II
Nakatanggap ng suporta ang posts ni May mula sa kanyang mga kasamahang Pinay nurses abroad.
Pero hindi lahat ay positibo ang reaksiyon sa ad. Pinuna ito ni Senator Nancy Binay.
Ulat ni Jonathan Andal ng GMA News, ang ad campaign ay ideya ni Presidential Adviser on Creative Communications Paul Soriano.
NANCY BINAY CRITICIZES AD CAMPAIGN
Nakakabahala at “a bit off” ang reaksiyon ng senador na siya ring chair sa Senate Committee for Tourism.
Ani Binay, para raw inaaalok ang Filipino nurses sa ibang bansa gayong kulang na ang mga nurses sa Pilipinas.
Lahad ni Binay quoted by GMA News, “Based on that one transit ad that recently saw the rounds in London, nakaka-bother lang when you see the ad, it seems that we are offering the world our nurses—which is a bit off kasi nauubusan na nga tayo rito ng mga health worker,” quoted si Binay ng GMA News.
“We don’t want to commodify our people, ad we don’t want to be tagged as a labor-exporting country.”
Kinuwestiyon din niya ang kaugnayan ng ad campaign sa pag-promote sa Pilipinas para sa turismo.
Ani Binay, “Sa unang tingin pa lang, ano ang konek ng nars, heringgilya at bakuna sa pino-promote nating mga tour destination.”
“At para kanino ba ang inilabas na ad sa London? DOT [Department of Tourism, BOI [Bureau of Immigration] or DMW [Department of Migrant Workers]?”
Anang senadora, hindi raw maganda ang mensahe ng ad campaign sa objective pagdating sa Philippine tourism.
Dagdag pa niya: “Iyan na ba talaga ang i-a-adopt ng DOT na bagong slogan?”
Ang current tourism slogan ng Pilipinas ay “It’s more fun in the Philippines,” na isang dekada nang ginagamit.
Muling iginiit ni Binay ang katuwiran niyang ito.
Post niya sa kanyang Facebook page nitong May 11: “We appreciate the initiative and the effort to give the Philippines the needed boost in the global market.
“Kaso, parang may disconnect ang messaging. Is the ad intended to encourage tourists to visit the country? Is it aimed to encourage more foreign investments? Or, is it meant for hospitals abroad to hire our nurses?
“Napaka-vague lang talaga.”
DOT REACTS
Nagbigay naman ng reaksiyon dito ang DOT.
Paglilinaw ni Tourism Secretary Christina Frasco, hindi bagong slogan ang nakasulat sa double-decker bus sa London.
Isa raw itong “country brand” na nais ipakita ang “best” ng Pilipinas at para maparangalan ang OFWs.
“We do clarify that the ad that was released in London is not yet the tourism ad of the Department of Tourism as we are releasing the branding campaign,” ani Frasco sa GMA News.
Maganda rin daw panghalina sa mga turista ang nasabing ad na kumikilala sa OFWs.
Pakli ni Frasco, magandang magsilbing tourism ambassadors ng Pilipinas ang OFWs.
“I don’t see a disconnect. I see only an opportunity for alignment with the country branding,” giit ng Tourism secretary.
Nitong March 2023, ibinalita ni Frasco sa press ang tungkol sa "enhanced” tourism slogan na ilulunsad mid-2023.
Muli niya itong klinaro sa recent interview niya sa GMA News: hindi papalitan kundi i-e-enhance ang tourism slogan, na isasangguni pa sa mga stakeholders.
“We will make sure that it is perfectly aligned with the country branding for the Philippines that is we give the world our best.”
Sabi pa ni Frasco, hindi raw nila sinasabing hindi na fun sa Pilipinas.
“It is. It continues to be,” aniya. “But so much has happened since the pandemic that requires us to evolve, to grow, and to honor those who have made so many sacrifices for our country.”
Samantala, sinubukan ng GMA News na kunan ng reaksiyon si Paul Soriano sa ideya ng ad campaign subalit hindi umano ito sumasagot.
Ngayong umaga, May 12, nag-post ng art card si Paul, na sinasabing sinusuportahan ng DOT ang country brand ng kasalukuyang administrasyon.
Sinabi rin sa art card na ang “We Give The World Our Best” country branding ay nagmula sa Office of the Presidential Advisor for Creator Communications na pinamumunuan ni Paul.
