Hinatulan ng Supreme Court na walang sala si Vhong Navarro sa kasong rape at acts of lasciviousness.
Kaugnay ito ng paratang ni Deniece Cornejo na ginahasa siya ni Vhong noong gabi ng January 17, 2014, at muntik siyang gahasain muli ng TV host-comedian noong gabi ng January 22, 2014.
Lumabas ang desisyon ng Supreme Court ngayong gabi ng Lunes, March 13, 2023.
Nilagdaan ito ni Associate Justice Henry Inting at sinang-ayunan ni Associate Justice at Chairperson Alfredo Caguiao. May petsang February 8, 2023 ang kanilang hatol.
Sa 41-page decision ng Supreme Court, detalyadong sinuri ang tatlong sinumpaang salaysay ni Deniece para sa tatlong pagkakataong inireklamo niya ng rape si Vhong.
Nakasaad dito ang lahat ng salaysay ni Deniece.
Ipinunto ng Supreme Court na "manifestly inconsistent, highly deficient, unclear, and doubtful" ang kuwento ni Deniece na ginasaha siya ni Vhong.
Kitang-kita raw ang matinding dagdag-bawas sa tatlong isinumiteng salaysay ng modelo tungkol sa mga pangyayari noong January 17 at January 22, 2014.
Bukod doon ay hindi rin daw nakapagprisinta ng ebidensiya si Deniece para suportahan ang kanyang alegasyon.
Kataka-taka rin daw na mas detalyado ang salaysay ni Deniece sa ikatlong reklamong rape na isinumite nito noong 2015, kumpara sa dalawang naunang rape complaints niya noong 2014.
deniece cornejo's version of THE JANUARY 17, 2014 INCIDENT
Sa first complaint, sinabi ni Deniece na hindi siya ni-rape ni Vhong noong January 17, 2014. Inalok daw siya noon ng wine ni Vhong, pero tinanggihan niya ito. Umalis daw si Vhong sa kanyang condo unit nang pauwiin niya ito.
Sa second complaint, sinabi ni Deniece na ni-rape siya ni Vhong. Sinubukan daw niyang manlaban, umiyak, at magmakaawa na tumigil si Vhong, pero nakuha raw siyang gahasain ni Vhong.
Nasabi rin ni Denice noon na tumanggi siya nang alukin siya ng alak ni Vhong bago mangyari ang insidenteng rape.
Sa third complaint, nanindigan si Deniece na ni-rape siya ni Vhong. Sumipsip daw siya sa inalok na alak ni Vhong, at maya-maya ay nakaramdam siya ng panghihina. Saka raw siya ginahasa ni Vhong.
Naniniwala si Deniece na ginamitan siya ng "date rape drug" ng aktor kaya siya halos mawalan ng lakas at ulirat.
DENIECE CORNEJO'S VERSION OF THE JANUARY 22, 2014 INCIDENT
Sa first complaint, sinabi ni Deniece na ni-rape siya ni Vhong noong gabi ng January 22, 2014.
Ginamitan daw siya noon ng dahas ni Vhong para puwersahan siyang mapagsamantalahan.
Sinubukan daw niyang manlaban habang nagsisisipa at nagsisisigaw. Pero masyado raw mahigpit ang pagkakahaltak ni Vhong sa kanyang buhok bukod sa pagkakadagan sa kanya.
Ayon kay Deniece, isang himala ang pagdating ng mga kaibigan niyang sumaklolo sa kanya.
Sa second complaint, walang binanggit si Deniece na siya ay ginahasa ni Vhong noong January 22.
Sa third rape complaint, sinabi ni Deniece na sinubukan siyang gahasain ni Vhong, pero nasaklolohan siya ng mga kaibigan.
Ayon kay Deniece, tiyempong kasama niya ang mga kaibigan sa kanyang condo unit bago pa dumating si Vhong.
Lumabas lang daw saglit ang mga kaibigan niya kaya nadatnan siyang mag-isa ni Vhong sa condo unit.
Pero bumalik din daw ang mga kaibigan ni Deniece, kaya raw naabutan ng mga ito ang attempted rape ni Vhong kay Deniece.
THE SUPREME COURT'S DECISION ON THE JANUARY 17, 2014 INCIDENT
Ipinunto ng Supreme Court na mismong si Deniece ang kumukontra sa sarili sa kanyang iba-ibang salaysay.
Kinuwestiyon ng Kataas-taasang Hukuman kung bakit sa second at third rape complaint lamang unang binanggit ni Deniece na siya ay na-rape noong January 17, 2014.
Pero kung sinasabi raw ni Deniece na pilit siyang nanlaban, base sa kanyang second complaint, kataka-takang wala raw naiprisintang ebidensiya si Deniece na ito ay nasugatan sa engkuwentro nila ni Vhong.
Ayon pa rin sa Supreme Court, mas naging kuwestiyonable ang salaysay ni Deniece sa idinagdag nitong impormasyon sa third complaint nito.
Sa third rape complaint lamang daw nabanggit ni Deniece na siya ay ginamitan ng "date rape drug" ni Vhong.
Paliwanag ng Supreme Court: "The question whether Cornejo took a sip of wine from the glass offered by Navarro cannot be simply ignored.
"Indeed, the lack of physical injuries notwithstanding Cornejo's purported overt physical resistance against Navarro's advances is conveniently explained or justified by her new allegation in her Third Complaint that she felt dizzy and nauseous.
"From this new allegation, she inferred that the wine she sipped was mixed with a 'date rape' substance used to spike drinks to render a person unconscious."
THE SUPREME COURT'S DECISION ON THE JANUARY 22, 2014 INCIDENT
Kinuwestiyon din ng Supreme Court ang "inconsistencies" sa salaysay ni Deniece sa alleged attempted rape incident noong January 22, 2014.
Paano raw nangyaring sa second complaint ay hindi binanggit ni Deniece na ni-rape siya ni Vhong noong gabi ng January 22.
Hindi rin daw tugma ang salaysay ni Deniece tungkol sa presensiya ng mga kaibigan niyang sumaklolo sa kanya.
Ipinunto ng Supreme Court na sa first complaint ni Deniece, sinabi ni Deniece na milagro ang pagdating ng mga kaibigang sumaklolo sa kanya at nagsagawa ng citizen's arrest kay Vhong.
Pero sa third rape complaint, ayon pa rin sa Supreme Court, iniba raw ulit ni Deniece ang kanyang kuwento at sinabing kasama na niya talaga ang mga kaibigan bago pa dumating si Vhong.
Paliwanag ng Supreme Court: "However, in her Third Complaint, Cornejo declared that her friends, Raz, et al., were already with her in her unit when Navarro called her on the phone that he wanted to drop by her unit purportedly to apologize for the January 17, 2014 incident.
"Cornejo then saw it a perfect opportunity for her friends to witness his supposed apology.
"In her Third Complaint, Cornejo alleged that her friends surrendered the items they recovered from him, one of which was a small bottle of liquid inferred to be some sort of a 'date rape drug.'
"Notably, this allegation was never mentioned in her two previously dismissed complaints."
SC SAYS CA ERRED IN CALLING OUT DOJ'S "ABUSE OF DISCRETION"
Ipinaliwanag din ng Supreme Court na mali ang Court of Appeals (CA) nang katigan nito ang Petition for Certiorari na isinumite ni Deniece laban sa Department of Justice (DOJ).
Ang certiorari, ayon sa isang Supreme Court ruling noong 2017, ay alegasyon na nagsasabing ang isang "judicial tribunal acted with grave abuse of discretion" dahil ito ay kulang o sobra sa saklaw ng jurisdiction.
Noong April 18, 2018, binasura ng DOJ ang petisyon ni Deniece na i-review ang rape complaints niya laban kay Vhong.
Noong July 14, 2020, ibinasura ng DOJ ang motion for reconsideration ni Deniece.
Ang basehan ng DOJ sa desisyon nito: ang pagsusuri sa mga isinumiteng ebidensiya mula sa preliminary investigation ng prosecutor sa tatlong hiwa-hiwalay na rape complaints ni Deniece.
Inapela ni Deniece ang kanyang reklamo sa CA.
Noong July 2022, lumabas ang desisyon ng CA na nagsasabing wala sa jurisdiction ng DOJ ang magdesisyon ng "validity" o "merits" ng akusasyon ni Deniece laban kay Vhong.
Diin ng CA, ang trial court lamang ang may awtoridad para maghatol kung ang isang akusado ay guilty o inosente.
Read: CA orders Taguig Prosecutors to file rape, acts of lasciviousness charges vs Vhong Navarro
Kinontra ng Supreme Court ang desisyon ng CA.
SUPREME COURT EXPLAINS IMPORTANCE OF PRELIMINARY INVESTIGATION
Ayon sa Supreme Court, sa preliminary investigation pa lang ay may kakayahan na ang prosecutor na matukoy kung tatayo o babagsak ang ebidensiyang isinumite rito ng complainant at respondent.
Hindi raw basta-basta ang pagsasagawa ng preliminary investigation dahil "duty-bound" ang prosecutor na magrekomenda ng "realistic judicial appraisal of the merits of the case."
Ini-screen dito ang "cases for trial" sa ngalan ng "freedom and fair play" para hindi magdusa ang akusadong inosente.
Diin ng Supreme Court hinggil sa importansiya ng preliminary investigation:
"It is not a casual affair.
"This crucial sieve in the criminal justice system 'spells for an individual the difference between months if not years of agonizing trial and possibly jail term, on the one hand, and peace of mind and liberty, on the other.'
"Factors such as the gravity of the crime charged and the resulting deprivation of liberty during the pendency of the case, necessitate careful and deliberate evaluation of evidence by the prosecutor to determine the existence of probable cause before filing the information in court."
Paliwanag pa ng Supreme Court, ang "probable cause" ay nangangailangan ng "enough reason to believe that [the imputed crime] was committed by the accused."
SC ON PRELIMINARY INVESTIGATION OF DENIECE VS VHONG'S CASE
Sa kaso ni Vhong, sinabi ng Supreme Court na sang-ayon ito sa findings ng prosecutors ng DOJ na may "lack of probable cause" para sa reklamong rape ni Deniece laban kay Vhong.
Hindi raw masasabing may "grave abuse of discretion" ang DOJ nang ibasura nito ang petition for review ni Deniece.
"The prosecutor's findings appear to have been arrived at objectively," diin ng Supreme Court.
Ipinakita pa ng Supreme Court ang ginawang graph ng prosecutor kunsaan makikita ang anito'y malinaw na "inconsistencies" ni Deniece sa tatlong salaysay nito.
Bahagi ng pahayag ng Supreme Court: "To suggest that a prosecutor turn a blind eye to such glaring and manifest inconsistencies — under the premise that the evaluation thereof would already touch on the complainant's credibility to be solely assessed in a full-blown trial — would be to compel the prosecutor to satisfy himself or herself to mere allegations in a complaint, and abdicate his or her bounden duty to screen cases for trial, thus passing the buck to the trial courts.
"Contrary to the proposition of the CA, the inconsistencies in her allegations are not trivial, minor, or inconsequential.
"Indeed, no amount of skillful or artful deportment, manner of speaking, or portrayal in a subsequent court proceeding could supplant Cornejo's manifestly inconsistent and highly deficient, doubtful, and unclear accounts of her supposed harrowing experience in the hands of Navarro.
"Otherwise, she would be allowed to deliberately change, or worse concoct and fabricate, theories in order to rectify the weakness of her accusations as pointed out by the prosecutors in the dismissal of her previous complaints."
Lubos ang saya ng kampo ni Vhong sa desisyon ng korte.
Pahayag ng legal counsel niyang si Atty. Alma Mallonga sa mensaheng ipinadala sa PEP.ph (Philippine Entertainment Portal): “Vhong is very happy. So am I. We are just filled with gratitude that the SC granted our position and did so in the interest of Justice and fair play.”
VHONG NAVARRO'S DETENTION FOR NEARLY THREE MONTHS
September 19, 2022, boluntaryong sumuko si Vhong sa National Bureau of Investigation para maghain ng bail para sa kasong acts of lasciviousness na isinampa ni Deniece.
(May kinalaman iyon sa third complaint ni Deniece kunsaan sinabi niyang sinubukan siyang gahasain ni Vhong noong January 22, 2014, pero nasaklolohan siya ng mga kaibigan.)
Noong hapon ng September 19, 2022, lumabas ang arrest warrant para sa hiwalay na kasong rape na isinampa ni Deniece laban kay Vhong.
Hindi na nakaalis si Vhong sa NBI dahil walang bail ang kasong rape.
(May kinalaman iyon sa third complaint ni Deniece kunsaan sinabi niyang ginamitan siya ng date rape drug ni Vhong kaya siya nagahasa ng aktor noong January 17, 2014.)
Mula September 19 to November 21, 2022, naditena si Vhong sa NBI facility. November 21 nang ilipat siya sa Taguig City Jail.
Read: Vhong Navarro, walang kasamang pamilya nang ilipat sa Taguig City Jail
December 6, 2022 nang i-release si Vhong sa pagkakaditena niya sa Taguig City Jail, matapos magbayad ng piyansang isang milyong piso (PHP1 million).
Ito ay dahil sa hindi kinakitaan ng "great presumption of guilt" si Vhong dahil sa "inconsistencies" ng mga salaysay ni Deniece.
Noong 2014 at 2015, ibinasura ng piskalya ang mga reklamong rape na isinampa ni Deniece laban kay Vhong. Pero muli itong nabuhay nang iutos ng Court of Appeals na baliktarin ang desisyon ukol dito noong July 2022.
Sa kabilang banda, noong July 2018 ay hinatulan ng "guilty beyond reasonable doubt" sa kasong grave coercion ang grupo nina Deniece at Cedric Lee. Ang desisyon ay ipinataw ng Taguig City Metropolitan Trial Court.
Sa kasalukuyan, dinidinig pa rin ang serious illegal detention case laban kina Cedric at Deniece gawa ng insidenteng pambubugbog, pananakot, at diumano'y pagditena kay Vhong sa condo unit ni Deniece noong January 22, 2014.