Nagsalita na si Faith Da Silva, 22, kung may namagitan ba sa kanila ng aktor na si Albert Martinez, 61.
Sina Faith at Albert ay nagkatrabaho sa Kapuso afternoon series na Las Hermanas (2021-2022).
Nabahiran ng malisya ang pagiging magkatrabaho ng dalawa at iniugnay sa isa’t isa.
Hindi direktang tinumbok noon nina Faith at Albert ang pagli-link sa kanila sa previous interviews.
Ang sinabi ni Albert ay parte ng showbiz ang pang-iintriga. Ibig din sabihin ay effective ang chemistry nila sa teleserye.
Sa isang interview noong March 2022, sinabi ni Albert na wala siyang love life.
Pero para sa iba, palaisipan pa rin kung ano ba talaga ang totoo at kung may namagitan ba kina Albert at Faith.
FAITH REVEALS REAL SCORE
Tinuldukan ni Faith ang isyung ito nang isusain siya ni Boy Abunda sa Fast Talk With Boy Abunda noong February 7, 2023.
Ikinuwento ni Faith na dahil lumaki siyang walang father figure, naghahanap siya ng pagmamahal sa isang lalaking nasa labas ng kanyang pamilya.
Si Faith ay anak ng dating aktor na si Dennis Da Silva na naging person deprived of liberty. Higit 20 years hindi nakita ni Faith ang kanyang ama.
Sinabi rin ng aktres na mas preferred niya ang older men.
Samantala, diretsang inusisa ni Boy si Faith kung naging karelasyon ba niya si Albert.
“Hindi. Pero masasabi ko na nagustuhan ko siya,” pag-amin ni Faith.
“Nagustuhan ko siya kasi nakita ko kung paano niya ako inalagaan, and kung paano niya ako ginuide.
“Bagong artista ako, e, and first show ko yon.
“And siya, veteran na siya bilang isang artista, pero hindi niya pinaramdam sa akin na yung level niya malayo sa akin.
“And mabait siya. He’s sweet.
“Kaya lang nga, ayun, alam kong super love niya yung late wife niya,” pagtukoy niya sa dating aktres na si Liezl Martinez, na pumanaw noong March 14, 2015 dahil sa breast cancer.
Read: Liezl Martinez dies at 47
Hanggang saan umabot ang pagiging close nila ni Albert?
Sagot ni Faith, “Wala naman masyado kasi nga mahirap yung sitwasyon, e.
“First time ko lang yon na-experience na yung age gap namin, medyo malayo talaga.
“And I could see and I could feel kung gaano niya kamahal yung wife niya dahil yun ang palagi niyang ikinukuwento.”
Sinabi ng aktres na “friends” sila hanggang ngayon ni Albert.
“I am single, very much so,” sabi pa ni Faith.