Hindi itinanggi ni Mark Lapid na dati niyang nakarelasyon si Kris Aquino.
Nang tanungin kung nagkukumustahan pa rin sila ni Kris, ibinahagi ni Mark na ang misis niyang si Tanya Garcia ang may komunikasyon sa TV host-actress.
"Actually ako, hindi ko siya diretsong nakakausap. Pero si Tanya, nagkakausap sila. Kasi, bumibisita si Kris dati sa bahay, yung mga anak ko, dinadalhan niya ng BTS," saad ni Mark.
Isa raw ang pamilya ni Mark sa nananalangin para sa mabilis na paggaling ni Kris na siyam na buwan nang nasa Houston, Texas para sa pagpapagamot nito ng iba-ibang autoimmune condition.
Patuloy ni Mark, “Pero through Tanya, sinasabi ko na sabihin na, ‘How is she?’ Dahil nga sa pinagdadaanan niya sa kalusugan niya.
"Our prayer is with her. Makakayanan mo iyang pinagdaanan mo na iyan. At least yun, Tanya was there, kausap niya."
Taong 2004 nang mapabalita ang pagkakamabutihan nina Mark at Kris. Pero hindi man sila nagtagal noon ay naging maayos ang trato nila sa isa't isa.
Sabi pa ni Mark, “Gano’n naman, wala naman kaming bad blood na pinagdaanan and that’s part of our life na dumaan yon.
"We’re not denying anything naman. Nangyari naman talaga.
MARK ON TANYA'S SHOWBIZ CAREER
Nakapanayam si Mark ng piling entertainment press sa Max's restaurant sa Scout Tuazon sa Quezon City.
Dito naikuwento ni Mark na masaya ang buhay-pamilya nila ni Tanya kasama ang tatlong anak nilang babae na sina Mischa, Matilda, at Madeleine.
Inusisa si Mark kung bakit mula nang magkapamilya sila ni Tanya ay nag-lie-low na sa showbiz ang aktres.
Huli siyang napanood sa guest appearance niya sa Kapuso prime-time series na Maria Clara at Ibarra.
"Siyempre, kapag gusto niya, gusto niya. Wala namang pumipigil," paglilinaw ni Mark.
Hindi raw niya pinagbabawalan si Tanya na tumanggap ng anumang proyekto.
"Wala kaming agreement na ganun. Kung gusto niya, gusto niya. At least, gusto niya.
"At saka, ang pinakaayoko sa lahat, sabi ko nga, ayaw naman naming pinipilit kami ng ayaw naming gawin."
Pero mabilis na nag-react si Mark nang sabihin namin kung payag ba siya kung may kissing scene si Tanya.
"Ay, yun lang ang huwag!” natawang sagot ni Mark.
Maging si Mark ay pili na lang din daw ang acting stints.
"It’s more on yung mga anak namin. Rather than our career, it’s more on our family ang pinoprotektahan namin. Lalo na lumalaki na ang mga anak namin.
"Pero ang masasabi ko lang, namimili na lang kami ng role na gagampanan namin.
"It’s more on not to achieve anything, but to protect our family. We’re doing this because we love it, galing kami diyan.
"It’s our passion, but siyempre, we also have our limitations.”
MARK AND TANYA'S MARRIed life
Labing-anim na taon nang mag-asawa sina Mark at Tanya.
Ano nga ba ang sikreto ng pagiging solid nilang mag-asawa?
"I think, it’s more on give and take talaga. Kasi, hindi puwedeng one way lang. Give and take talaga, tulungan. Adjust lang."
Dagdag ni Mark, “Of course, nandiyan din ang hindi pagkakaunawaan. Pero sabi nga namin, at the end of the day, tapos ang usapan."
More hot stories on PEP.ph: