Ang nominasyon sa kategoryang Best Supporting Actress of the Year ng 43rd London Critics’ Circle Film Awards para sa kanyang pagganap sa Triangle of Sadness ang bagong karangalang tinanggap ng Filipino actress na si Dolly de Leon.
Isinapubliko ng mga miyembro ng London Critics' Circle ang listahan ng mga nominado sa The May Fair Hotel sa London noong Miyerkules, December 23, 2022.
Gaganapin naman ang pamamahagi nila ng parangal sa February 5, 2023.
Sina Hong Chau (The Whale), Kerry Condon (The Banshees of Inisherin), Nina Hoss (Tár), at Guslagie Malanda (Saint Omer) ang mga katunggali ni Dolly sa best supporting actress category para sa naturang award-giving body.
Ang nominasyon ni Dolly sa Best Supporting Actress of the Year category ng London Critics Circle Film Awards ang pangatlo para sa kanyang pambihirang pagganap sa karakter ni Abigail sa Triangle of Sadness.
Nominado rin siya sa 80th Golden Globes na idaraos sa January 10, 2023 sa The Beverly Hilton sa Beverly Hills, California.
Ang Los Angeles Film Critics Association (LAFCA) ang unang kumilala sa husay ni Dolly sa pag-arte sa Triangle of Sadness dahil siya ang pinili nilang best supporting actress winner. Nakatakda ang pagbibigay sa kanya ng parangal sa annual banquet sa January 14, 2023.
Ang Golden Globe nomination ni Dolly ang itinuturing na precursor o pasimula para maging malaki ang tsansa ng nominasyon niya sa best supporting actress category ng 95th Academy Awards na isisiwalat sa January 24, 2023, pero makatutulong din ang kanyang tagumpay sa LAFCA at ang nominasyong ipinagkaloob ng London Critics Circle.