Kabilang ang awiting pamasko ni Jose Mari Chan na “Christmas In Our Hearts” sa inilabas na album ng American a capella group na Pentatonix, ang “Holidays Around the World.”
Kasama rin ng grupo si Lea Salonga sa pag-awit ng nasabing classic Filipino Christmas song.
Ini-upload ito sa YouTube noong December 16, 2022.
Napakarami na agad views ng videos.
Nasa 27th spot din ito sa trending for music sa YouTube.
October 27 nang ianunsyo ni Lea sa Twitter ang naging collaboration nila ng Pentatonix.
Ang kanyang tweet: “Yes, folks! This is happening! And to our friends in the Philippines, it’s the Christmas In Our Hearts you think it is!”
Banggit pa niya, “Had the most wonderful time recording this classic Filipino Christmas song with Pentatonix."
Agad ding na-release ang version na ito ng "Christmas In Our Hearts" sa iba’t ibang digital platforms.
Isa rin ito sa madalas patugtugin sa radio stations sa Pilipinas.
Matapos i-upload sa YouTube, tuwang-tuwa ang mga Pinoy sa nasabing collaboration.
Kinagiliwan naman maging ng mga foreigner ang komposisyon ni Jose Mari.
Ito ang unang pagkakataon na ang vocal quintet na nanalo na ng tatlong Grammy awards at na-nominate sa Emmy ay nakipag-collaborate sa iba’t ibang artists sa buong mundo.
Ayon sa pahayag ng ptxofficial.com, “This album is unlike anything we’ve ever released before!
“Much like the album’s title, ‘Holidays Around the World,’ we wanted to invite a few incredible artists from all around the world to help celebrate the season with us.”
Bukod kay Lea, special guests din ang Chinese pianist na si Lang Lang, Congolese gospel singer na si Grace Lokwa, Lebanese singer na si Hiba Tawaji, Latin band na La Santa Cecilia, Indian vocalist na si Shreya Ghoshal, Japanese artists Hikakin & Seikin, British a cappella ensemble The King Singers, at ang American superstar na si Meghan Trainor.
Kabilang sa album ang iba pang awiting pamasko gaya ng "Jingle Bells," "It's The Most Wonderful Time of the Year," "Hark! The Herald Angels Sing," "Feliz Navidad," "Last Christmas" at "Silent Night."
Samantala, ang Christmas in our Hearts ay unang na-conceptualize ni Jose Mari Chan noong 1988 nang mahilingan siyang lagyan ng melody ang tula na ipe-perform sa high school reunion.
Kuwento ng singer-composer, “Tinawagan ako one day and sabi niya gumawa daw siya ng poem which they were going to use in their alumni homecoming.
“Ang title is ‘Ang Tubig ay Buhay’ because that was their advocacy. So I set the poem to music word for word, ginawa kong melody.
“Nagustuhan nila. They used it in their alumni homecoming.”
Ang nasabing melody ang ginamit din niya sa kanyang unang Christmas album, na kasalukuyang may hawak ng record bilang biggest-selling album sa kasaysayan ng Original Pilipino Music.