Ibinahagi ni Nadine Lustre na may bahagyang pagbabago ang celebration niya ngayong Pasko kumpara sa kanyang nakaugalian.
Lahad ni Nadine sa PEP.ph (Philippine Entertainment Portal), "Ako po, ever since naman, gusto ko na yung pag-celebrate ng Pasko, simple lang.
"Yung sama-sama lang po. Pero I think, this year nga po, dahil yung Deleter ay ipapalabas sa mga sinehan, makikinood din po kami."
Ang Deleter ay ang Metro Manila Film Festival (MMFF) 2022 entry na pinagbibidahan niya kasama sina Louise delos Reyes at McCoy de Leon.
Dagdag ni Nadine, "I think, sa December 25, merong cinema tours. So, makiki-celebrate po kami sa lahat ng manonood ng Deleter.
"Gusto ko rin pong panoorin ang ibang entries sa MMFF kasi na-miss ko rin po talaga."
Ayon sa aktres, ang Deleter ang kanyang "unang full-length na horror film."
Kaya naman hindi maiiwasan ni Nadine na makumpara sa mga aktres na nagbida na sa horror movies.
Ang sabi lang niya, kung maging positibo ang feedback sa pelikula ay ikatutuwa niya, pero "ayoko naman pong ma-box ako sa isang genre."
Basta sobra raw siyang nag-enjoy sa paggawa ng Deleter.
FOR THE LOVE OF NADINE
Suportado raw si Nadine ng non-showbiz boyfriend na si Christophe Bariou sa kanyang MMFF movie.
Pero pambubuko niya, hindi mahilig ang nobyo sa horror film.
Natatawang sambit ni Nadine, "Excited siya, pero hindi kasi siya mahilig sa horror movies. Pero sabi niya, manonood daw siya for me."
Kuwento pa niya, "Sa tingin ko, matatakot siya. Medyo ano, kapag gusto kong manood ng horror movies, ayaw niya. Kaya alam kong ayaw niya talaga.
“Pero, tatapangan daw niya ang sarili niya para mapanood niya sa sinehan. Iba rin kasi kapag sa sinehan mo pa mapapanood ang horror movies kesa sa TV lang.
"Iba sa pakiramdam kasi ang audio, surround sound. Iba po kasi ang pakiramdam kapag sa sinehan, so I’m sure, matatakot siya."
Si Christopher ay half-Filipino, half-French na may pag-aaring property sa Siargao, kunsaan sila nagkakilala noong July 2021.
MMFF 2022 PARADE OF STARS
Dahil ngayon pa lang unti-unting bumabalik ang sigla ng local film industry, excited si Nadine sa paglahok sa MMFF festivities.
Kinumpirma ni Nadine na sasakay siya sa MMFF Parade of Stars sa December 21. Ang ruta ay mula sa Welcome Rotonda hanggang Quezon Memorial Circle simula 4:00 p.m.
Read: MMDA inanunsiyo ang alternate routes para sa MMFF 2022 Parade of Stars sa Quezon City
Bulalas ni Nadine, "Ako po, sobrang excited po ako dahil yung first time kong makasakay ng float, sa Beauty and the Bestie pa a couple of years pa, sobrang na-enjoy ko siya.
"Of course, I will be there."
Ang tinukoy niyang Beauty and the Bestie ay ang MMFF 2015 entry tampok sina Vice Ganda at Coco Martin.
Sabi pa niya, "I mean, mainit, nakakapagod, pero iba rin kasi yung nakita mo silang [fans] lahat.
"Especially now na nag-o-open-up na rin tayo. Yung mga tao, lalabas na rin ulit after a long time. Excited akong makita ang mga tao. So definitely, I’ll be there."