Proud at labis ang pasasalamat ng actress-singer na si Vina Morales sa Maalaala Mo Kaya (MMK) na isa siya sa gumanap sa kauna-unahang episode ng longest-running drama anthology sa bansa.
Noong November 21, 2022, ginulat ng ABS-CBN program ang mga tagasubaybay nito nang ianunsiyo mismo ni Charo Santos-Concio na magtatapos na ang hinu-host niyang MMK matapos ang tatlumpu’t isang (31) taon sa ere.
Saad niya sa kanyang farewell message sa TV Patrol: "Hindi na po mabilang ang naisalaysay nating kuwento dito sa MMK. Mga kuwentong totoo.
"Mga salamin sa sarili ninyong buhay na nagbigay ng aral at panibagong pag-asa.
"Kami po ay tagapaghatid lamang ng mga kuwento. Kung mauulit man ang lahat, hindi po ako magdadalawang-isip na piliing muli ang role na ito.
"Salamat po sa lahat ng nakaraan at sa anumang paraan na maaari pa tayong muling magkita."
Read: Maalaala Mo Kaya to end its 31-year run this December
Sa loob ng tatlong dekada, iba't ibang kuwento ng buhay ang itinampok sa MMK na kinapulutan ng aral at naging inspirasyon ng maraming Pilipino.
Sa nalalapit na pagtatapos ng programa, hindi napigilan ni Vina na balikan ang kanyang unang MMK stint.
Noong May 15, 1991 unang umere sa ABS-CBN ang MMK tampok ang Rubber Shoes episode nina Vina, Romnick Sarmenta, at Robert Arevalo.
Sa pamamagitan ng Instagram post noong November 23, 2022, nagpasalamat si Vina sa lahat ng bumubuo ng programa.
Aniya (published as is), "Humbled and thankful that me and Romnick was the 1st episode of @mmkofficial 'Rubber Shoes.'
"Happy 31st year Mam @charosantos. Grateful to be a part of your show.
"You all made us laugh and cry with your beautiful stories over the years."
Dagdag pa niya, "Salamat po."
Sa December 10, 2022 nakatakdang umere ang huling episode ng MMK.
Read: Isang malaking artista, tampok sa special last episode ng MMK