Ibinunyag ni Rita Gaviola, a.k.a. Badjao Girl, na isa na siyang ina.
Nakilala si Rita nang mag-viral noon ang kanyang larawang namamalimos sa kalye at naging housemate sa Pinoy Big Brother 7 Teen Edition noong 2016.
Kalaunan ay pinasok niya ang showbiz at ang pagiging social media influencer.
Inanunsiyo ni Rita ang bagong yugto ng kanyang buhay sa pamamagitan ng Instagram post nitong August 8, 2022.
Nag-post siya ng larawan na may karga-kargang sanggol, at katabi ni Rita ang ama ng kanyang anak.
Bagamat walang binanggit sa caption na nanganak na siya, kinumpirma ito ni Rita sa pamamagitan ng pagsagot sa well-wishers, pati na rin sa bashers.
“SINAYANG MO LANG CAREER MO”
Bumuhos ang pagbati kay Rita, pero may ilang sinumbatan siya na sinayang niya ang kanyang career.
Batikos ng isa (published as is): “Tinatanggi mo pa sa tiktok na dika buntis pa iyak iyak kapa tas ngayon nanganak kana paka kup*l”
Buwelta ni Rita: “ikaw kung Wala kang alam manahimik kna lang mas kup*l ka kasi nakikialam ka”
Puna ng isa pang kritiko: “Sinayang mo lng Career mo Rita pero kong anak mo man yan walang kasalanan ang Bb congrats”
Sagot ni Rita: “walang masasayang.”
Nag-iwan din ng mensahe si Rita dahil sa mixed reactions na natanggap niya matapos ang kanyang rebelasyon.
Komento niya (published as is): “Sa mga nadissapoint or madami pang sasabihin buhay ko yubg tinatahak ko tska madami pa akong kayang gawin and maraming salamat po sa mga sumusuporta kasama na namin si baby kia sa susunod na mga vlog namin [heart emoji]”
Batay rin sa ilang mga nagkomento, may mga nagbanggit na napansin na nilang tila buntis si Rita, pero itinanggi raw niya ito sa social media.
May ilan namang sumagot na naunawaan nila si Rita sa ngalan ng kanyang career.
Huling napanood sa telebisyon si Rita nang sumali siya sa "Showtime Sexy Babe" ng It’s Showtime noong February 2022.
Naging daily winner si Rita pero hindi pinalad manalo pagdating ng weekly round.