Pinalagan ng Adamson University ang ulat na ang mga ipinadalang guro mula sa isang eskuwelahan sa China ay nakakuha diumano ng “Instant PhDs” sa kanilang unibersidad.
Sa inilabas nilang pahayag ngayong Martes, July 26, 2022, sinabi ng pamunuan ng Adamson University na isa lamang itong paninira sa integridad at reputasyon ng kanilang graduate school programs.
Nakasaad sa kanilang pahayag, "In light of recent news, Adamson University strongly denounces the malicious claims perpetrated by certain sectors in Hunan Province, China, on the PhD degrees obtained by Shaoyang College faculty members from Adamson University."
Ayon pa sa Adamson, sumusunod sa alituntunin ng Commission on Higher Education (CHED) ang kanilang PhD offerings.
Wala rin daw silang direktang kaugnayan sa Shaoyang College sa China at ang mga guro mula rito na nag-enroll sa Graduate Studies ng Adamson ay may kaukulang admission credentials.
Bahagi pa ng kanilang pahayag na inilabas sa kanilang Facebook page, “To put the record straight, Adamson University has no official linkage with Shaoyang College and their faculty members came to enroll in the Graduate School on their own armed with appropriate admission credentials.
“Statement with malicious intent of impeaching the integrity and reputation of the University’s Graduate School Programs are unacceptable. This we cannot countenance.”
Hindi rin umano titigil ang Adamson para masugpo ang pagkalat ng mga maling impormasyon laban sa reputasyon ng kanilang unibersidad.
Pinag-aralan pa raw ng pamunuan ng Adamson kung ano ang susunod nilang hakbang kaugnay ng akusasyong ito sa kanilang institusyon.
Dagdag pa sa statement, “Adamson University will be constantly vigilant and assertive in ensuring that misinformation does not malign nor discredit the school and what is has built and preserved for 90 years as a leading center for quality education in the Philippines, as well as globally.
“We are currently reviewing our options in seeking any and all remedies available to us in law or in equity to protect the good name and reputation of the school.”
"INTANT PHDs" REPORT
Umingay kahapon, July 25, ang ulat ng South China Morning Post tungkol sa pagkatanggal ng isang pinuno ng unibersidad sa China dahil sa anomalya tungkol sa kanilang mga guro na nakakuha ng PhD sa bansa.
May titulo itong “‘Instant PhDs’: head of China university fired for using US$27 million to rehire teachers after obtaining doctorates from ‘obscure’ school to lift status”
Ayon sa ulat, tinanggal ang university head na si Peng Xilin ng Shaoyang College sa Hunan Province, China dahil sa umano’y paggastos nito ng 180 million yuan (US$27 million or P1.3-B) bilang “one-off payments” sa mga gurong ipinadala sa Pilipinas at nakakuha ng “instant PhDs.”
Matapos makakuha ng PhD, muli raw kinuha ang mga ito bilang mga guro sa nasabing paaralan. Ito raw ay para mapaganda ang kanilang ranking.
Dagdag pa sa balita, dalawampu’t dalawang (22) guro na nag-aral sa Adamson University ang nakatanggap ng PhD degrees matapos lamang ang dalawampu’t walong (28) buwan o lagpas sa dalawang taong pag-aaral gayong ang nasabing karagdagang kaalaman ay kinakailangan ng apat na taong pag-aaral.
Sabi ng Hunan Provincial Education Department, “inappropriate practices” ang ginawang hakbang ng university head at “unscientific” kaya tinanggal sa puwesto si Peng.
Lumikha rin ng kritisismo mula sa publiko sa China ang isyung ito dahil sa napakagandang payment package ng mga “rehired teachers” na umaabot sa 850,000 yuan (US$126,000 o P6.3-M) bawat isa.