Inspired o plagiarized?
Ito ang nag-uumpugang tanong sa mga utak ng netizens matapos mag-viral sa TikTok ang halos dalawang minutong video ng pinagtagpi-tagping speech ng dalawang honor graduates.
Ang isa ay nagtapos bilang magna cum laude sa Camarines Sur Polytechnic Colleges (CSPC) nitong July 2022, at ang isa naman ay nagtapos na cum laude sa Far Eastern University (FEU) noong July 2019.
Ang mga bida sa TikTok video ay si Jayvee Ayen ng CSPC na nakatapos ng kursong Bachelor of Science in Entrepreneurship, at si Mariyela Mari Gonzales Hugo na gumradweyt ng Bachelor of Secondary Education, Major in English.
Ang common denominator ng speech: “LANG.”
Kahapon, July 12, isang TikTok user (@keiadreyes) ang nag-upload ng 1:48 minutes video ng speech nina Jayvee at Mariyela sa kani-kanilang mga graduation.
Pansin na pansin ang pagkakapareho ng tono, pagbigkas, mga salitang halos magkapareho. Naiba lamang ito para maging akma sa sitwasyon kagaya ng kurso, taon, at lugar kung saan sila nag-aral at nagtapos.
Caption ng uploader: “A magna cum laude who can't write his own speech. Hindi 'to basta basta "lang" nakakahiya.”
Dagdag pa niya, “Mariyela Mari Hugo (the one wearing green) is the original speaker and author. She's from FEU (july 2, 2019)”
Panawagan pa ng uploader: “Camarines Sur Polytechnic Colleges, please do something about this.”
THE SPEECH
Base sa video, malinaw na ginaya ni Jayvee ang ilang bahagi ng speech ni Mariyela na nag-viral noon at pinag-usapan ng netizens.
Narito ang bahagi ng speech ng dalawa na magkapareho:
Mariyela: “Lang. The short term for the Filipino word 'lamang' which means just or only.”
Jayvee: “Lang. A shortened Filipino word for 'lamang' which means mere, just, or only.”
Mariyela: “'Yan lang. Ito lang.”
Jayvee: “'Yan lang or ito lang.”
Mariyela: “Ah, MassCom lang, video-video, tapos endo after ng project. Management lang? Di ba, puro plan lang yun tapos magsusulat kayo dun ng mga number? Ah, alam mo ang hina mo, mag-Educ ka na lang kaya?”
Jayvee: “Entrep ka lang. Di ba, tinda-tinda lang 'yan? Office Ad ka lang. Ah, sulat-sulat, encode-encode lang. Tourism ka lang, usher-usherette, taga-smile lang. HM ka lang, di ba lutu-luto lang 'yan?”
Mariyela: “But what does this imply? Knowlegable people shouldn’t be teachers? I shouldn’t teach because I won’t get rich from it? Who should be teachers then?”
Jayvee: “Does this implies [sic] that intelligent people should not be in the field of hospitality, tourism, and business management?”
Mariyela: “Our profession is deemed unusual, impractical, easy.”
Jayvee: “Does this indicate that business management are [sic] impractical, basic, and easy?”
Mariyela: “I beg to disagree.”
Jayvee: “I beg to disagree.”
@keiadreyes A magna cum laude who can't write his own speech. Hindi 'to basta basta "lang" nakakahiya. #fyp #fyp? #feu #cspc ? original sound - XH Kirari - Kira
Lumikha ng ingay ang valedictory address ni Mariyela noong 2019 dahil sa kakaiba nitong pagkakasulat at husay ng kanyang pagsasalita.
NETIZENS' REACTION
Nag-alburuto naman ang maraming netizens sa napanood nila.
Sabi nila, kung magna cum laude ka, bakit hindi ka marunong magsulat ng sarili mong talumpati?
Ang iba naman, sana man lang daw ay nasabi niyang na-inspire siya sa speech ni Mariyela at hindi sana siya sitahin.
Narito ang mga komento ng ilang netizens:
JAYVEE EXPLAINS HIS SIDE
Paliwanag naman ni Jayvee, nagkataon lamang ito. Relate na relate daw kasi siya sa speech ni Mariyela.
Ayon sa panayam sa kanya ng The Spark, ang official student-community publication ng Camarines Sur Polytechnic Colleges, wala siyang intensiyong nakawin o kopyahin ang “LANG” speech ni Mariyela na tumatak na sa netizens.
Saad ni Jayvee, “I mean not to plagiarize [...] Naka-relate lang rin ako ng sobra nung napanood ko yung video.”
Pag-amin pa nito, napanood niya ang YouTube video ng speech ni Mariyela ngunit may dalawa na raw siyang speech na na-draft bago pa niya ito napanood.
Ang ikatlo raw niyang isinulat na speech ay may laman galing sa survey na kanyang isinagawa mula sa mga estudyante at graduating students ng CSPC.
Matapos niyang isulat ang kanyang third speech, may nag-share daw sa kanya ng “Lang” speech ni Mariyela.
Napansin daw niyang halos magkapareho ang takbo ng speech na gusto niyang ipunto sa graduation sa speech ni Mariyela.
Naging basehan daw niya ang speech ni Mariyela para sa topic sa kanyang valedictory address na natapos na rin niyang sulatin.
Sabi pa ni Jayvee, “Kay Ma’am Mariyela, I am really sorry. Hindi ko po intensyon na i-plagiarize yung speech niya.
"Nagkataon lang talaga na same topic yung gusto ko i-address (and) at the same time nagkataon rin na napanood ko 'yung video nya.
“Kung baga driven by her impactful speech kaya nagawa kong ma ipasok yung ibang thought sa speech ko without thinking na napa-plagarize ko na pala yung speech nya.”
MARIYELA REACTS
Mukhang may pasaring naman si Mariyela kay Jayvee.
Sa isang super private account sa Facebook na natunton dahil sa maraming nag-tag kay Mariyela, may ibinahagi siyang magkakaparehong pananaw mula sa iba’t ibang kolehiyo sa ibang bansa tungkol sa pangongopya.
Nakalagay dito: “Unintentional or accidental plagiarism is still plagiarism (Bowdoin, 2022; Das, 2018; Duke University, n.d.).”
Sa panayam naman ng Balita, sinabi ni Mariyela na nakarating na sa kanya ang tungkol sa speech ni Jayvee.
Sana man lang daw ay nagbigay ito ng pagkilala o attribution kung kanino kinuha o ginaya ang kanyang speech.
Saad ng FEU graduate, “The issue has already been brought to my attention by concerned netizens.
“While one may have good intentions, one must still check if the means to actualize those intentions are also ethically acceptable. Borrowed ideas, even inspirations, should be cited or at the very least, acknowledged.
“I hope that this issue serves as a reminder to everyone to review and uphold their standards.
Ang plagiarism ay ang pagpapakita o pag-akto na ang isang bagay o ideya na parang ikaw ang may gawa ngunit kinopya lang pala ito sa iba.
Wala pang reaksiyon ang Camarines Sur Polytechnic Colleges ukol sa speech ng kanilang estudyanteng nagtapos na magna cum laude.
Bukas ang PEP.ph (Philippine Entertainment Portal) sa panig ng mga nabanggit sa artikulong ito.