Ilang saglit na lamang ay malalaman na ang opisyal na resulta ng May 9, 2022 national elections.
Sa kasalukuyan ay nangunguna ang tambalang Ferdinand Marcos Jr. at Sara Duterte-Carpio.
Sa partial tally as of 12:17 a.m. ng May 10, milya-milya ang layo ng bilang ng nakuhang boto ni Marcos Jr. kumpara sa pumapangalawang kandidato na si Leni Robredo.
At ngayon pa lang ay naglabas ng mensahe ang kani-kanilang celebrity supporters.
Sina Ai-Ai delas Alas at Andrew E, na parehong kilalang supporters nina Marcos Jr. at Duterte, ay ikinatuwa ang nangangamoy na pagkapanalo ng kanilang napiling manok.
Sa Instagram Story ni Ai-Ai, nag-report siya ng ulat ng New York Times na may headline na malaki ang lamang ni Marcos Jr. sa kalabang presidentiables.
Nilagyan niya ito ng GIF na "CONGRATS!"
Mayroon din siyang Instagram post kunsaan ibinahagi niya ang dasal na naniniwala siyang ibibigay ng Diyos ang "THE BEST para saten LAHAT."
Sabi pa ni Ai-Ai, "Si GOD ang bahala pag sya ang nag desisyun for the best."
Ipinahiwatig din niyang naluluha siya sa tuwa.
Hindi niya tuwirang sinabi kung tinutukoy niya rito ang resulta ng botohan.
Pero umpisa pa lang ng araw ay kumpiyansa si Ai-Ai sa tambalang Marcos Jr. at Duterte base sa nauna niyang IG post na may hashtag na "paglyamadokalmado."
Si Andrew E naman ay nag-post ng red and green heart emojis na may kasamang Philippine flag emoji sa kanyang Instagram post.
Malinaw na tinutukoy niya rito ang pagiging lyamado nina Marcos Jr. at Duterte sa halalan dahil sunud-sunod din ang kanyang Instagram Stories ng mga pro-Marcos at pro-Duterte na nagbubunyi sa anila'y "landslide victory" ng Uniteam teamup.
Sa comments section ng post ni Andrew E, naglagay ng Philippine flag, hearts, at praying emojis si Randy Santiago na isa ring supporter ng tambalang Marcos-Duterte.
Ang sexy star na si Sunshine Guimary ay nag-comment din ng fire emojis.
May pauna na ring congratulatory messages para kina Marcos Jr. at Duterte sina Jeremy Marquez, Angelika dela Cruz, at Mickey Ablan.
LENI ROBREDO'S CELEBRITY SUPPORTERS
Sa kabilang banda, proud naman si Janno Gibbs sa pagtindig niya para sa inendorsong presidentiable na si Leni Robredo.
Nag-alay siya ng tula na pinamagatan niyang "Sapat na."
Sabi rito (published as is): "Sino man ang hiranging wagi sa halalan
"Taas noo at hanga, sa nasaksihan
"Isang bayang namulat, walang takot nanindigan
"Sa ngalan ng malayang kinabukasan
"Sapat nang maitala sa aklat ng tadhana
"Na minsan'y pinaglaban
"At pumanig sa tama."
Nag-reply dito si Ogie Alcasid na "Mismo pare mismo." Si Ogie at misis niyang si Regine Velasquez ay supporters ni Robredo.
Aminado namang na-stress si Rita Avila sa partial tally ng halalan.
Bahagi ng isa niyang Instagram post: "SO LAHAT TAYO STRESSED ATM DAHIL SA MAGIGING RESULTA.
"TRUST IN THE LORD, OUR GOD.
"Ibibigay NIYA ang kailangan natin. Either a spank on the butt or a pat on our heads."
Sa sumunod niyang post ay sinabi ni Rita na anumang resulta ng eleksyon ay bitbit niya ang mga leksyon mula sa karanasang ito.
"Manalo o matalo, sa huli ay sarili pa din natin ang dala natin. Naging masama ka o mabuti pagkatapos ng kampanya at eleksyon?
"Maraming leksyon ang ituturo sa atin."
Diin pa ni Rita, nananatili ang bilib niya sa ipinamalas na leadership ni Robredo at sa mga nakita niyang magandang katangian nito nitong halalan.
Si Arlene Muhlach ay ipinagmalaki rin na si Robredo ang kanyang "ipinaglaban."
Inengganyo rin niya ang kanyang IG followers na manalangin ng kapayapaan para sa susunod na anim na taon.
Ang Kapuso star na si Mavy Legaspi, dalangin naman ang pagkakaisa ng bayan sa kabila ng resulta ng eleksyon.
Ipinapasa-Diyos na lamang daw niya ang lahat.
Halos hindi naman makapaniwala sina Andrea Brillantes, Sharlene San Pedro, at Saab Magalona sa resulta ng eleksyon.
Hindi naman matanggap ng TikToker na si AC Soriano ang resulta ng eleksyon.
Sa kanyang series of tweets, may nilagay siyang "DISQUALIFY."
Ni-retweet din niya ang pag-alma ng ibang netizens sa lyamadong boto ng supporters ni Marcos Jr.
Sabi rin ni AC, "when spirits are down, there is now way to go but up. kapit tayo. pagtatawanan natin ito mamaya."
Kapansin-pansin din ang tweet ni KC Montero na waring nasuka, pero walang direktang tinukoy kung bakit.
RELATED STORIES:
- 2022 PRESIDENTIABLES | Leni Robredo: Beating the odds
- 2022 PRESIDENTIABLES | Ping Lacson: The Supercop Senator
- 2022 PRESIDENTIABLES | Bongbong Marcos: Unfazed by controversies
- 2022 PRESIDENTIABLES | Manny Pacquiao: From kargador to boxing legend and senator
- 2022 PRESIDENTIABLES | Isko Moreno: From basurero in Tondo to Manila mayor
- 2022 PRESIDENTIABLES | Leody de Guzman: The Labor Leader