Idinaos ngayong buong buwan ng Abril ng Catanduanes State University (CatSU) ang kauna-unahang AbaCATSU: Abaca art in the Academe.
Ito ay isang art exhibit kung saan tampok ang mga artworks ng local artists na nagpo-promote ng paggamit ng abaca paper bilang alternatibo sa nakasanayang canvas.
Ang art exhibit ay inisyatiba ng CatSU Office of Student Support Services, Abaca Technology and Innovation Center, RENZO Gallery and Framing at ng Effusive Catanduanes Artistry Foundation (ECAF).
Ayon kay CatSU President Dr. Patrick Alain T. Azanza, "This is the first exhibit participated by 26 local artists that used abaca fiber as their canvas.
“This is also one of the advocacies of CatSU in helping the abaca farmers since 60 percent of our students are from abaca-farmer families."
Ang Bicol Region ang top abaca fiber producer at nakakapag-produce ng 4.22 thousand metric tons kada taon, o 27.1 percent share sa total fiber production ng Pilipinas.
Para kay Ma. Isabel Reyes, isa sa mga artist na kalahok sa AbaCATSU, malaking challenge sa mga gaya niyang artist ang paggamit ng abaca canvas.
Paliwanag ni Isabel, “Mas madaling gamitin ang traditional canvas kumpara sa abaca paper.
“Sinisipsip kasi ng abaca paper ang paints at kailangang patung-patong ang pagpipinta, depende sa technique.”
Gayunpaman, mas tumitingkad rin aniya ang artwork gamit ang abaca paper, na mas nagbibigay ng authenticity sa isang art piece.
Ayon naman kay Chiarra Hernandez, exhibit facilitator at curator ng Renzo Art Gallery, ang paggamit sa abaca papers bilang canvas ay nagbibigay sa mga artist ng pagkakataon na ma-explore ang texture nito kumpara sa ordinary canvas.
Aniya, "Nalalaro nila [artists] yung paper mismo. Doon pa lang, they can already create something out of it.”
Naka-display ang artworks ng 26 local artists sa CatSU.
Ibinibenta ang mga ito na nagsisimula ang presyo sa PHP15,000 hanggang PHP30,000.
Magkakaroon din ng coffee table book ang art exhibit.
Ani Azanza, "Masuwerte ang mga nakabili na at makakabili pa ng mga art na naka-display, since an art featured in a book or in a calendar doubles in price when it’s being bought."