Heart attack o acute myocardial infarction ang ikinamatay ng American singer na si Keith Martin, ayon sa resulta ng autopsy sa kanyang bangkay.
Natuklasan ang walang buhay na katawan ni Martin sa inuupahan nitong condominium unit sa Libis, Quezon City, noong March 25, 2022, dahil sa masangsang na amoy na inireklamo ng kanyang mga kapitbahay.
Nang buksan ang unit na tinitirhan ni Martin, natagpuan ang singer na wala nang buhay na nakahiga sa kanyang kama.
Read: "Because of You" singer Keith Martin found dead in Quezon City condo
Ang Criminal Investigation and Detection Unit ng Quezon City Police District, sa pangunguna ni P/Cpl Angel Pascasio ang nagsagawa ng imbestigasyon.
Dumating din ang Scene of the Crime Operatives (SOCO) Team ni PMSG Godfrey Lustado na nagproseso sa pinangyarihan ng insidente.
Sa imbestigasyon ng Quezon City Police District, huling nakitang buhay si Keith noong March 20, 2022.
Tiniyak nilang walang palatandaang puwersahang pinasok ang condominium unit ng 57-year-old singer na nagpasikat sa kanta na "Because of You."
Naulila ni Keith ang kanyang 26-year-old son sa asawa niyang si Melissa Cote Martin, na nauna nang namayapa.
Lalake rin, na may edad na labing-apat, ang anak ni Keith sa kanyang ex-partner na Pilipina.
Nangyari ang cremation sa mga labi ni Keith sa Arlington Memorial Homes sa Araneta Avenue, Quezon City, ngayong Lunes ng hapon, March 28.
Nakatakda rin ngayong hapon, simula 5 p.m., hanggang sa March 30 ang public viewing para sa cremated remains ni Keith sa Immaculate Conception Cathedral Grottos sa Lantana Street, Quezon City.