Trending topic si ANC anchor Karmina Constantino matapos nitong sitahin ang isang presidential candidate sa live interview nitong Martes, March 1, 2022.
Binara ni Karmina si presidential candidate Dr. Jose “Joey” Montemayor Jr. dahil sa pahaging nitong "bayaran" ang kinabibilangan niyang TV station.
Live na in-interview ni Karmina si Montemayor via Zoom sa In Focus ng ANC, ang news channel ng ABS-CBN.
Natalakay rito ang pagti-trend ni Montemayor dahil sa sagutan nila ni presidential candidate Manila Mayor Isko Moreno sa CNN Philippines presidential debate noong Linggo, February 27.
Sa siyam na presidential candidates, tanging si Moreno ang hindi sumang-ayon na isauli sa donor ang excess campaign funds na natanggap.
Giit ng alkalde ng Maynila, hangga’t nagbabayad siya ng buwis, gaya ng nasasaad sa batas, puwede na niyang kunin ang di nagamit na campaign funds.
Humirit si Montemayor at tinanong si Moreno tungkol sa “15 million dollars” na donasyon ng American tech magnate na si Bill Gates sa Maynila.
Tanong ni Montemayor: isasauli ba ito ni Moreno at kung ito raw ba ay campaign funds.
Katuwiran ni Montemayor, “all over the papers” ang tungkol sa donasyon ni Bill Gates sa City of Manila.
Nilinaw ng co-mediator ng presidential debate na si Pia Hontiveros na “pesos” at hindi “dollars” ang donasyon ni Gates.
Itinanggi ni Moreno ang paratang ni Montemayor.
Naglabas ng resibo si Moreno mula sa Bureau of Internal Revenue (BIR) at sinabing walang katotohanan ang “15 million dollars” na donasyon dahil “it is prohibited by law.”
“Bawal pong tumanggap ng mga ganong klaseng…” ani Mayor Isko, na hindi natapos dahil sumabat si Montemayor.
Pagpapatuloy ng alkalde, “Wala po. It’s not true, I don’t know where did you get it.
“There is no such thing. We will be honest and fair…”
KARMINA ASKS MONTEMAYOR
Sa pagsalang ni Montemayor sa ANC, isang tanong ang binasa ni Karmina mula sa isang netizen.
Ang tanong: saan nakuha ni Montemayor ang impormasyon tungkol sa “$50/$15M” donation kay Moreno?
Sagot ni Montemayor, tanungin dapat si Moreno.
Hindi rin daw ibubunyag ni Montemayor kung sino ang kanyang sources “unless there is a court order.”
Giit ni Montemayor, nakatanggap si Moreno ng “15 million” mula kay Bill Gates, pero hindi umano nilinaw ng alkalde kung “dollars” ito o “pesos.”
Pinaratangan pa ni Montemayor si Moreno na nagbayad umano ng media para palabasin na siya ay mali.
Ani Montemayor, maging ang “fact-checker” umano ng Facebook at YouTube ay sinasabing tama siya sa kanyang akusasyong kurapsiyon laban kay Moreno.
Follow-up na tanong ni Karmina: paano magiging tama si Montemayor kung ang donation ng Bill Gates and Melinda Foundation ay para sa water sanitation and hygiene ng siyudad ng Maynila?
Katuwiran ni Montemayor, marami sa mga residente ng Maynila ang nagtatanong kung nasaan na ang “toilets” na ipinagawa sa Maynila na galing sa milyun-milyong pisong donasyon mula kay Bill Gates.
Sabi naman ni Karmina, unang sinabi ni Montemayor na ang donasyon ni Bill Gates ay para sa kampanya ni Moreno, pero sinasabi naman nito ngayon na para ito sa water sanitation and hygiene ng City of Manila.
Dagdag ni Karmina, sinabi ni Montemayor na “it’s all over the papers, but now you’re telling us the sources have told you about this…”
Tanong pa ni Karmina: “So, which one should we believe?”
Dito na nagbitaw ng bintang si Montemayor laban sa kinabibilangang istasyon ni Karmina.
Aniya, “Well, if you will just research, you are in the media, you should have known better, unless Isko Moreno paid the ANC and ABS-CBN...”
Hindi pa tapos magsalita ang kandidato ay sumabat na si Karmina.
“I’m sorry. I’m not gonna [let that] pass, Dr. Montemayor.
“We are not in the business of getting paid.
“I am personally insulted by that insinuation,” maanghang na pahayag ng ANC anchor.
Aniya, maaari nilang ipagpatuloy ang interview at baguhin ang usapan.
“But let me tell you that is not an insinuation that I will take lightly,” tirada ni Karmina.
“This company is not in the business of getting paid.
“This journalist that you’re talking to right now has never been, or ever will be paid by anyone to ask or not to ask any question.
“Let’s move on.”
At saka niya binato ng makahulugang tanong si Montemayor: “What kind of leader will you be if you believe in fake news, Dr. Montemayor?”
Balik-tanong ni Montemayor: “Is that a personal question?”
Sagot ni Karmina: “It’s a question.”
At saka nagpatuloy ang interview sa sumunod na halos 30 minuto.
Marami namang netizens ang nag-tweet at nagpahayag ng paghanga kay Karmina sa pagkumpronta nito kay Montemayor.
Anila, naging malinaw ang anchor sa pagpapahayag ng kanyang mensahe at naging professional siya.
Ito ang dahilan kaya siya nag-trending.
THE CNN PHILIPPINES forum
Sa CNN Philippines presidential debate, tinanong ang siyam na dumalong presidential candidates tungkol sa excess campaign funds.
Binanggit ng mediators na “the Bureau of Internal Revenue states you can keep campaign donations. But because they are considered income, they are subject to tax.”
Sa siyam na presidential candidates, walo ang sumang-ayon na dapat ibalik sa donor ang excess campaign funds.
Ang mga dumalong presidential candidates ay sina Vice President Leni Robredo, Senators Ping Lacson and Manny Pacquiao, Manila Mayor Isko Moreno, labor leader Leody de Guzman, former defense chief Norberto Gonzales, cardiologist Jose Montemayor, Muslim businessman Faisal Mangondato, at former evangelista Ernesto Abella.
Tanging si Mayor Isko ang di sumang-ayon.
Inamin ni Mayor Isko na hindi siya nagsauli ng “campaign funds,” pero tinupad nito ang “aking tungkulin bilang mamamayan na magbayad ng buwis.”
Dagdag ng alkalde: “That’s why wala akong moral ascendancy to answer the question in favor.”
Samantala, nasulat sa The Philippine Star noong Lunes, February 28, ang tungkol sa “donasyon” ni Bill Gates sa City of Manila.
Ayon sa ulat, nakasaad sa Bill and Melinda Gates Foundation website na sila ay naglaan ng “319,147 US dollars,” o halos PHP16 milyon sa Maynila noong February 2020.
Nakasaad din ditong ito ay “to procure and demonstrate innovative, safe, off-grid toilet products and utility services in low-income communities that are not safely reachable by incumbent toilet technologies or utility services.”