May hindi makalilimutang karanasan si Edu Manzano nang gampanan niya ang karakter ni former Philippine National Police (PNP) Deputy Chief of Operations Major General Benjamin Magalong sa Mamasapano, Now It Can Be Told.
Ang Mamasapano ay ang pelikula tungkol sa nangyari sa apatnapu’t apat (44) na miyembro ng Special Action Force ng PNP na nagbuwis ng buhay noong January 25, 2015 sa Mamasapano, Maguindanao.
Si Magalong ay decorated police general na naging chairman ng PNP Board of Inquiry na nag-imbestiga sa Mamasapano incident.
Nagretiro siya sa PNP noong December 2016, at nahalan na alkalde ng Baguio City noong 2019 hanggang sa kasalukuyan.
EDU ON PLAYING GENERAL MAGALONG
Para lalong maging makatotohanan ang pagganap ni Edu, ipinahiram sa kanya ni Magalong ang mga uniform paraphernalia ng isang heneral.
Kuwento ni Edu, "I wanted it to be as authentic as possible. Kilala ko si Mayor Magalong. Grabe yung fit na fit yung clothes niya talaga.
"He’s the epitome of an officer and a gentleman. Wala kang makikitang tiyan-tiyan diyan. So, nagpagawa ako ng sarili kong damit.
"Ang gusto ko lang, yung mga bars, medals, and ribbons. And that is something that you accumulate over the years from gallantry in action to medal of valors.
"So lahat ‘yan, natutunan ko ‘yan kay Eddie Garcia, e. Napakaimportante sa isang heneral yung kanyang mga isinusuot na bars, ribbons, and stars."
Alam ni Edu ang sentimental value ng mga iyon kaya inisip niyang kailangang ingatan ang hiniram na authentic police paraphernalia mula kay Mayor Magalong.
"Ipinahiram sa akin lahat yun ni General Magalong, lahat.
"So importante, kapag hindi kami nag-shooting, parang mas mahalaga pa sa akin yun.
"Natakot ako na what if one day, may mawala doon, and that has years and years of actual exploits and experiences while in the military," dagdag ni Edu.
Hanggang sa may insidenteng tila na-misplace niya ang mga hiniram na gamit.
"And to be honest, one day, hindi ko mahanap nung babalik kami sa shooting. Takot na takot ako.
"Hindi ko mahanap kasi nasa gitna ako ng lipat-bahay so medyo nawala. Takot na takot ako. Hindi ko alam ang gagawin ko.
"Hindi ako takot kasi makakabili ako ng ribbons, walang problema. Pero after the shooting, kailangan kong isoli kay General Magalong.
"Baka it will be the last time I ever get to visit Baguio," nagbibirong hirit ni Edu.
Nakahinga nang maluwag ang aktor nang mahanap niya ang mga nawawalang gamit ni Magalong.
"God was on my side. Nahanap ko yung pinaglagyan ko, yung maleta kung saan ko itinago," paglilinaw ni Edu.
Marami nang ginampanan na karakter si Edu sa mga pelikula, pero ang role ni Magalong sa Mamasapano, Now It Can Be Told ang isa sa mga nagmarka sa kanya dahil mahirap makalimutan ang naganap na trahedya.
Sabi ni Edu, "Ang dami ko nang nagawang live characters, some of the most interesting characters I could have portrayed.
"Pero ang trahedya na kasama dito sa Mamasapano is something I hope I will never have to go through again.
"Kasi, nabasa ko yung isang libro and I also went through the entire findings of the Board of Inquiry.
"It was a very, very sad story. It could have been avoided, but it’s a story that have to be told, if only to seek justice for those who are no longer with us, but also to seek justice for those who are still living."
WHAT IS THE MAMASAPANO CLASH?
Ang Mamasapano clash, o Oplan Exodus, ay ang madugong police operation na naging sanhi ng pagkamatay ng 44 SAF officers.
Layunin nilang mahuli ang Malaysian terrorist bomber at bomb maker na si Zulkifli Abdhir alias "Marwan" at dalawa pang high-ranking terrorists.
Nakabakbakan nila ang mga miyembro ng Moro Islamic Liberation Front (MILF), Bangsamoro Islamic Freedom Fighters, at private armed groups.
Ikinamatay rin ito ng 18 MILF members, at tatlong sibilyan.
Patung-patong na imbestigasyon ang isinagawa upang alamin kung ano ang tunay na nangyari sa shootout at kung sino ang dapat panagutin dito.
Noong March 2015, ang resulta ng imbestigasyong ng BOI bilang fact-finding body ay nailathala sa mga pahayagan.
Nakasaad doon ang masalimuot na detalye ng insidente, at kung paano nagkaroon ng break of chain of command si Pangulong Benigno Aquino III at ilan pang kasama sa planning at execution ng SAF operation.