Sa unang pagkakataon, si Nadine Lustre na ang nagbahagi ng couple photo nila ng hinihinalang French boyfriend niyang si Christophe Bariou.
Kahapon, January 12, 2022, ipinost ni Nadine ang litrato sa kanyang Instagram account.
Kinunan niya ng litrato ang dalawang instant camera printed photos kunsaan pareho silang may hawak na wine glass.
Makikitang masayang nagtinginan sila sa unang litrato, at sa ikalawang litrato ay nakapikit si Nadine habang nakadikit ang kanyang mukha sa bandang lips ni Christophe.
Isang top hat emoji ang tanging caption ng post ni Nadine.
Isang heart emoji ang iniwang komento ng kaibigan ni Nadine na si Yassi Pressman.
"Shoutout to the 999+ crew," dagdag ni Yassi.
PREVIOUS SIGHTINGS
Anim na buwan na mula nang unang mapansin ng netizens ang ugnayan nina Nadine at Christophe.
Si Christophe ay natukoy na isang resort owner sa Siargao kunsaan madalas na makitang nagbabakasyon si Nadine.
Hindi man nagpo-post si Nadine, hindi rin naman siya umiwas sa mga mataong lugar sa Siargao kapag siya ay nagpi-picnic sa tabing-dagat o kumakain sa restaurant kasama si Christophe.
Noong September 2021, naiulat na nagpa-register si Nadine bilang botante sa Siargao.
Sinamahan pa siya ni Christophe sa opisina ng Commission on Elections sa Barangay General Luna sa Siargao.
Noon namang October 2021 ay namataan sila ni Christophe na namili sa isang mall sa Makati City.
NADINE INTRODUCES CHRISTOPHE TO DAD
Buwan din ng October 2021 nang makalap ng fans ni Nadine ang litrato kunsaan ipinakilala ng aktres si Christophe sa kanyang amang si Ulysses Lustre.
Nag-post sa Facebook si Ulysses ng litrato kasama sina Nadine at Christophe na may caption na, "Nice to meet you."
Hanggang sa dinala na rin ni Nadine ang kanyang mga magulang para magbakasyon sa Siargao noong November 2021.
Si Ulysses muli ang nagbahagi ng family photo nila ni Nadine via Facebook account nito.
