Kabilang din sa nagpositibo sa COVID-19 ang professional volleyball star at Pinoy Big Brother Kumunity Top 2 housemate na si Alyssa Valdez.
Inanunsiyo ng kanyang talent management na V Management Group, nakaranas ng mild symptoms ang Premiere Volleyball League player.
Nakumpirma ngang COVID-19 ang tumama kay Alyssa base sa resulta ng kanyang Reverse Transcription Polymerase Chain Reaction (RT-PCR) test.
Naka-home quarantine din si Alyssa at sa bahay na magpapagaling, ayon sa kanyang management.
Bahagi ng pahayag ng management ni Alyssa: “After experiencing some mild symptoms and confirmatory RT-PCR test, Alyssa tested positive for COVID-19.
“We’d like to thank those who have sent their well-wishes and prayers her way. Please be rest assured that Alyssa is taking the necessary precautions and will be recovering from home.”
Ipinost ito ng management ni Alyssa sa lahat ng social media platforms ng volleyball star.
Nagpasalamat naman si Alyssa sa lahat ng nag-alala at nagpaabot ng pangungumusta sa kanya.
“Thank you for the prayers and well-wishes. [praying hands and heart emojis]”
“Stay safe everyone!” mensahe ni Alyssa sa kanyang official Instagram account.
Nitong pagsalubong ng Bagong Taon, January 1, 2022, itinanghal si Alyssa at fellow housemate na si Aji Salvacion bilang PBB Kumunity Season 10 Top 2.
Nakakuha ng kabuuang 22.63 percent votes si Alyssa, habang 13.6 percent naman si Anji.
Bago ang kanyang PBB stint, huling naglaro si Alyssa sa Creamline team para sa Premier Volleyball League Open Conference.