Naggagandahan sina Jeric Raval, Baron Geisler, at Mark Anthony Fernandez sa drag queen characters nila sa upcoming movie na Barumbadings.
Mapagkakamalan talagang tunay na mga babae ang kanilang mga hitsura.
Tungkol sa mga matatapang at barumbadong bading ang kuwento ng bagong proyekto ng direktor na si Darryl Yap.
Hindi natakot sina Jeric, Baron, at Mark na gawin ang pelikula dahil nagustuhan ng tatlo ang mga karakter na gagampanan nila.
Ibang-iba kasi ito sa mga katauhang kanilang binigyang-buhay sa mga nakaraan nilag pelikula.
Baron Geisler, Mark Anthony Fernandez, and Jeric Raval
Magandang-maganda si Mark sa kanyang drag role. Hindi siya nagpahuli sa kagandahan ng nanay niyang si Alma Moreno, ang top sex symbol noong dekada '80.
Naranasan na ni Baron na gumanap na gay sa ibang mga project niya, pero lumitaw nang husto sa Barumbadings ang kanyang pagiging mestiza at kagandahang maikukumpara sa isang foreign actress.
Tuwang-tuwa naman ang sexy star na si AJ Raval sa transformation ng tatay nitong si Jeric. Hindi nainsulto si AJ sa komento na mas maganda kesa sa kanya ang tatay niya, na kilala bilang astig na action star noong dekada ’90.
Sabi ni AJ tungkol sa ama, “Nakaka-proud po. Sini-send niya po ako ng pictures, yung mga eksena nila sa Barumbadings.
“Nakakatuwa pong makita na ganoon ang tatay ko kasi kilalang action star siya. Action star po siya sa TV, action star din siya sa bahay.
“Nakakatuwa pong makita na gumanap siya bilang bading. Sobrang proud po ako ngayon sa kanya.”
Inaasahang riot ang mga eksena nina Jeric, Baron, at Mark sa Barumbadings na mapapanood sa Vivamax simula sa November 5, 2021.