Napangiti si Pokwang, 50, nang maalala niya ang panahong nagtitinda siya ng sweepstakes sa tapat ng Antipolo Cathedral.
Taong 1980 nang manirahan sa Antipolo ang pamilya ni Pokwang, at sa edad na siyam o sampung taong gulang ay tumutulong siya sa mga magulang para kumita ng pera.
Madiskarte raw siya sa pagtitinda ng kung anu-ano noon.
Kuwento niya sa PEP.ph (Philippine Entertainment Portal): "Nagtitinda ako ng ticket ng sweepstakes, ticket yun na every Sunday ang raffle.
"Pati kandila, suman, kasuy, lahat na yata! Batang patio tawag dun!
"May kanya-kanya kaming area ng pagtitinda. 'O, area ko ito, ha? Dito ako, dun kayo.' Ganun!"
Kahit school days ay tumutulong din daw siyang magtinda sa palengke.
"Basta pag sa palengke naman, Monday to Friday, diretso ako dun galing school.
"Yung mga plastic na pambalot, mga sibuyas, kamatis, bilao, ganun [ang tinitinda ko]!
"Kapag may nanghuhuli, tumatakbo na kami niyan. Hahaha! Pag Sabado at Linggo, sa simbahan kasi maraming tao."
Naranasan din niyang mangolekta ng mga bote at diyaryo. Bakanteng lugar pa raw noon ang ngayo'y exclusive subdivision sa Antipolo kunsaan siya nakatira.
Masayang balik-tanaw pa ni Pokwang, "Umaabot kami dito pag nagbobote. Tapos yung kuya ko, sira-ulo iyon, e.
"Pag pababa na, binibitawan niya yung kariton! So, kasama kami gumugulong ng mga bote sa loob."
too many to feed
Grade three pupil pa lang daw si Pokwang noong siya ay nagsimulang magtinda-tinda.
Aminadong todo-kayod siya dahil sa hirap ng buhay ng pamilya.
"E, kailangan. Sa dami namin magkakapatid," tukoy ni Pokwang sa labing-isa niyang mga kapatid.
Kuwelang hirit niya, "Nanay ko, dumighay lang, buntis. Hindi ko alam, gremlins ata kami magkakapatid! Pag nabasa, dumadami.
"Yun, dumami kami, kailangan maghanapbuhay. O, paano?"
PROUD OF HER HUMBLE BEGINNINGS
Nakapanayam ng PEP.ph si Pokwang sa PEP Exclusives noong June 18, 2021, ang araw na pumirma siya ng kontrata bilang bagong Kapuso star.
Pinaalala namin sa kanya na noong July 13, 2020 ay ipinost pa niya sa Instagram ang litrato nilang magkakapatid na nasa lapag habang kumakain.
Ang bahay pa nila noon ay gawa sa kawayan.
Sabi ni Pokwang, "O, di ba? Mukha akong tiwa dun! Hahaha!"
Paglalarawan pa niya sa munting bahay nila noon, "Maliit lang bahay namin. Kapag naghikab ka, tatamaan yung kapatid mo. Ganun!"
Sabay sinabi niya na payak man ang pamumuhay ng kanyang pamilya noon ay ipinagmamalaki niya ito.
"Kasi nga po, walang ngayon kung walang dati. Hahaha! Di ba? Kaya dapat lingon-lingon din sa pinanggalingan," saad ni Pokwang.