Humingi ng paumanhin ang Miss Universe Canada (MUC) organization sa Filipino fashion designers na sina Michael Cinco at Rian Fernandez.
Ito ay matapos maglabas ng sama ng loob nina Cinco at Fernandez sa social media laban sa MUC.
Sinisi ng MGmode Communications, PR company ng MUC, si Cinco kung bakit hindi nakapasok sa Top 21 si Miss Universe Canada Nova Stevens sa katatapos lang na Miss Universe 2020 pageant.
Na-trigger naman si Rian at isiniwalat ang masamang karanasan niya noon sa MUC.
Napili si Rian noon na damitan ang former Miss Universe Canada candidates, pero hindi ginamit ang lahat ng kanyang mga disenyo, na pinaghirapan niya at daan-daang libo ang gastos na galing sa sariling bulsa.
Ngayong Martes, May 25, naglabas ng official statement ang MUC via Instagram.
Pero sa kabila ng pagso-sorry ng MUC, mahihinuha sa mahabang Instagram post ang pagtatanggol nito sa kanilang organisasyon kaugnay ng pangyayari.
MUC APOLOGIZES TO PINOY DESIGNERS
Ikinalulungkot daw ng organization ang pagkakadawit ng lahat ng tao at grupong sangkot.
Sa pahayag, tila sinagot ng MUC kung bakit hindi binabayaran ang Filipino designers sa kabila ng kanilang mga disenyo.
Kapalit daw ng pagsuot ng mga damit ng designers ng Miss Universe Canada candidate ay ang exposure ng fashion designer.
“Like any organization in the pageant business, we enter into agreements with designers, in exchange for products we provide exposure and recognition to their brand.
“We recognize the significant contribution they make, not only with beautiful couture gowns, but also financially with work hours, time and shipping costs that they absorb.”
Bagamat ipinagpapasalamat nila ang pagod ng fashion designers, hindi raw sila nagko-commit na masusuot ng kandidata ang lahat ng mga damit na ginagawa ng fashion designers.
Nasa reigning Miss Universe Canada candidate daw ang desisyon kung ano ang isusuot niyang damit, depende sa kagustuhan nito.
Malinaw na sinasagot nito ang himutok ni Rian na sa kabila ng pagod at gastos sa paggawa ng damit, hindi isinuot ng previous candidates ang kanyang mga gawa.
“We specifically want to apologise to Michael Cinco and Rian Fernandez for any damage these recent incidents have caused to them or to their brand,” ayon sa statement.
MUC ON THIRD PARTY SUPPORTERS
May paghuhugas din ng kamay ang MUC kaugnay ng recent issue na kinasasangkutan ni Cinco.
Ang nanisi kasi kay Cinco ay ang MGmode Communications, lumalabas na PR company ng MUC.
Hindi tinukoy ng MUC ang PR company, pero malinaw sa statement na ito ang tinutukoy na kanilang "third-party supporter."
Sabi ng MUC, bagamat malaking tulong ang “third-party supporter” sa pag-aalaga sa reigning Miss Universe Canada, hindi raw ibig sabihin ay kinatawan sila ng MUC.
“Our third-party supporters help keep that schedule on track.
“They help us to ensure our titleholders arrive at meetings and interact with the public and different media outlets.”
Minsan daw, ang “third-party supporter” na rin ang nakikipag-ugnayan sa mga fashion designers.
Pero ang mga pahayag nila ay hindi raw nangangahulungang pahayag ng MUC.
“While we rely heavily on the collaboration efforts of our third party supporters, it is important to recognize, they are not official representatives of the MUC organization; and while we respect their opinions, those opinions are not necessarily the opinions of the MUC organization.”
Paalala ng MUC: “If something is not published by the MUC organization directly, we ask that it not be considered an official statement from our organization.”
Nabanggit din ng MUC ang libu-libong hate messages na natatanggap ngayon ng current titleholder na si Nova Stevens at iba pang supporters “filled with hate, racism, and death threats.”
Hirit ng MUC organization: “This type of behaviour is unacceptable, and nobody should be subjected to this level of cyber bullying, hate and violence.
“The MUC organization strongly objects to this level of abuse, and we refuse to partake in stooping to that level of ugliness.”
Sa pagtatapos ng pahayag, sinabi ng MUC na ipagpapatuloy nito ang kanilang legacy na sinimulan 18 taon na ang nakalilipas.
“We are always working to make things better year over year, and we thank you all for your continued support through the good and bad times.
“Thanks and love to all with beauty and strength.”
