Kinilala ng gobyerno ng Amerika si Pasig City Mayor Vico Sotto bilang isa sa 12 International Anticorruption Champions sa mundo.
Sa ilalim ng bagong administrasyon ni United States President Joseph Biden, inilunsad ni Secretary of State Antony J. Blinken ang International Anticorruption Champions Award “to recognize individuals who have demonstrated leadership, courage, and impact in preventing, exposing, and combating corruption.”
Ang 31-year-old Pasig mayor ang kaisa-isang Pilipino sa 12 key players sa iba’t ibang larangan “who fight for accountability, transparency, the rule of law, and press freedom.”
Sa official statement na inilabas ng U.S. Department of State nitong Martes ng gabi, February 23 (Miyerkules ng umaga, February 24 sa Pilipinas), kinilala si Mayor Vico bilang “standard-bearer for a new generation of Philippine politicians who prioritize anticorruption and transparency initiatives in their election campaigns and in office.”
Bukod sa tinalo ang isang “incumbent mayor whose family had ruled the city for 27 years” noong 2019—bilang isang 29-year-old councilor—binanggit ng U.S. State Department ang “freedom of information legislation” na isinulong ni Mayor Vico noong konsehal pa lamang ito.
Sa pamamagitan daw ng nabanggit na batas, napadali para sa mga taga-Pasig “to request documents without having to provide a justification – the first such law in the Metro Manila area.”
“NEW, MORE TRANSPARENT APPROACH TO GOVERNANCE”
Ayon sa U.S. State Department, nang maupo sa puwesto si Mayor Vico, pinanindigan nito ang reputasyon bilang “fresh voice with a new, more transparent approach to governance.”
Inisa-isa ng gobyerno ng Amerika ang mga repormang ipinatupad ng local executive sa lungsod laban sa kurapsiyon at katiwalian.
“He pledged to avoid any kickbacks in the awarding of city contracts, established a 24/7 public information and complaints hotline, formally involved civil society organizations in the city’s budgeting and policy making, and mandated that the value of all city government contracts be reduced by at least 10 percent – a measure intended to reduce bribery in the contract awarding process,” anang U.S. State Department.
OTHER INTERNATIONAL ANTICORRUPTION CHAMPIONS
Bukod kay Mayor Vico, ang 11 pang ginawaran ng Amerika ng International Anticorruption Champions Award ay sina:
- Ardian Dvorani, isang hukom at miyembro ng Justice Appointments Council of Albania
- Diana Salazar, Attorney General ng Ecuador
- Sophia Pretrick, Investigative Advisor for the Compliance Investigation Division ng Pohnpei State Auditor ng Federated States of Micronesia (FSM)
- Juan Francisco Sandoval Alfaro, pinuno ng Special Prosecutors Office Against Corruption and Impunity sa Guatemala
- Ibrahima Kalil Gueye, chairman at co-founder ng Organization for Positive Change sa Guinea
- Anjali Bhardwaj, miyembro ng Right to Information Movement sa India
- Dhuha A. Mohammed, Director General for Electronic Payments sa Central Bank ng Iraq
- Bolot Temirov, investigative journalist at editor-in-chief ng Factcheck.kg sa Kyrgyz Republic
- Mustafa Abdullah Sanalla, chairman ng National Oil Corporation sa Libya
- Francis Ben Kaifala, pinuno ng Anti-Corruption Commission sa Sierra Leone
- Ruslan Ryaboshapka, dating prosecutor general ng Ukraine
“MAIIYAK NA NAMAN SI MAMA NITO”
At press time, wala pang opisyal na pahayag si Mayor Vico tungkol sa pagkilalang ito na natanggap niya mula sa gobyerno ng Amerika.
Pero ang ina ng alkalde, ang veteran actress na si Coney Reyes, ini-repost sa Instagram ngayong Miyerkules ang post ng isa pa niyang anak na si Carla Mumar.
Si Vico ay anak ni Coney sa comedian-TV host na si Vic Sotto.
Anak naman ni Coney si Carla, at ang panganay niyang si L.A., sa dating asawang si Larry Mumar.
Ipinost ni Carla ang isang art card tungkol sa pagkilalang natanggap ng kapatid mula sa U.S. State Department.
Caption ni Carla (published as is): “Proud of you @vicosotto!
“Thank you to your entire team who works with you and supports you!”
Ginamit ni Carla ang “#Anticorruption #Transparency #Integrity.”
Tinag ni Carla sa Instagram Story niyang ito ang kanyang inang si Coney, ang kapatid na si L.A. at ang asawa nitong si Macy.
Pabiro pang tinudyo ni Carla ang inang si Coney sa isang bahagi ng caption.
Sabi ni Carla: “Maiiyak nanaman si Mama nito [hugging, laughing with tears emojis] Love you Ma!”
