Inalala ni Narvacan, Ilocos Sur Mayor Chavit Singson na hindi biro ang laki ng gastos para iorganisa ang Miss Universe pageant.
Base ito sa one-on-one interview ni Aiko Melendez kay Chavit sa first part ng YouTube vlog ng aktres noong Linggo, November 22.
Si Chavit ang may-ari ng LCS Group of Companies—na may kinalaman sa real estate, construction, agro-industrial enterprises, land and air transportation, sustainable electricity, gaming, at entertainment.
Noong 2016, si Chavit ang pinakalamaking sponsor nang maging host ang Pilipinas para sa pinakaprestihiyosong beauty pageant sa buong mundo.
Kuwento ni Chavit, nagtungo siya sa headquarters ng Miss Universe Organization sa New York noong pinag-uusapan pa lang nila ang kontrata.
Hindi pa raw siya kilala ng Miss Universe Organization bilang negosyante kaya sobrang istrikto ang naging business arrangement noon.
Lahad ni Chavit kay Aiko, "Alam mo, naging malapit na kaibigan ko sila dahil nung una nagpunta ako sa New York, hindi nila ako kilala. Kilala ako as governor, pero di nila ako kilala [as businessman].
"Kasi in-explain nila sa akin nung nagpunta ako, 'You know, you have to spend six million [dollars].' 'Yeah, okay.' So, six million.
"Andami nang punta ko, siguro diskumpiyado, 'You have to deposit one million dollars, unrefundable.'
"Sinong negosyanteng gagawa nun? Wala. Magbigay ka ng one million dollars? Kung di mahusay usapan niyo, kumpiskado."
Nagulat daw si Chavit nang hingan siya ng downpayment para sa pageant expenses, pero sinunod pa rin daw niya pati ibang kondisyon ng Miss Universe Organization.
Patuloy na balik-tanaw ni Chavit: "Sige, deposito ako [ng one million dollars]. 'So, pirmahan na tayo?' 'No, no. You have to deposit six million [dollars].' Nagdeposito ako ng six million. 'Okay, let's sign.'
"'You have to deposit another six million.' 'Why?' Yun ang gagastusin sa Miss Universe. Six million Miss Universe, six million gagastusin mo.'"
Paniniguro raw ni Chavit, handa siyang magpaluwal ng budget expenses kapag simula na ang preparasyon para sa Miss Universe.
Sabi raw ni Chavit, "'E, gagastusin ko iyan.'"
Pero diin daw ng Miss Universe Organization, "No, you have to deposit."
Sa madaling salita, siniguro raw ng Miss Universe Organization na kaliwaan ang pagbayad ni Chavit ng deposito para sa budget expenses ng pageant bago isara ang deal at magkapirmahan ng kontrata.
"Baka di ko raw gastusin. Ganoon kaistrikto. So, nagdeposito ako. Nagbigay ulit ako six million. So, 12 million [dollars in total]."
Umabot sa 12 million dollars ang ginastos ni Chavit bilang sponsor. Hiwalay pa rito ang kontribusyon ng ibang major sponsors ng pageant noon.
Ang Miss Universe 2016 ay sinalihan ng 86 candidates mula sa iba't ibang bansa, at ang schedule of activities nila noon ay tumagal mula January 12-31, 2017.
Ang mismong coronation night ay ginanap sa Mall of Asia Arena sa Pasay City noong January 30.
NOT THE FRANCHISE HOLDER OF MISS UNIVERSE PHILIPPINES?
Back to present time, malaki raw ang tiwala kay Chavit ng Miss Universe Organization dahil sa ilang taon na rin siyang tumutulong sa organisasyon.
Nagkomento si Aiko na dumagdag sa mga pag-aaring negosyo ni Chavit ang pagkakuha nito ng Miss Universe Philippines franchise.
Pero paglilinaw ni Chavit, "tumutulong lang" siya sa Miss Universe Philippines ngayon at hindi raw siya ang may-ari ng franchise.
Pahayag ni Chavit, "No. Binibigay nga sa akin. Pero hindi na... hindi ko na... hindi na kailangan. 'Tutulong na lang ako,' kako.
"Pero ngayon, binibigay sa akin, maski saan mundo ngayon, wala nang deposito.
"Noon pinagdedeposito ako. Ngayon, may discount pa."
MISS UNIVERSE PHILIPPINES FRANCHISE
Umpisa ng taong 2019 nang maiulat sa The Philippine Star ang kumpirmasyon ni Chavit na siya ang franchise holder ng Miss Universe Philippines.
Sinabi noon ni Chavit na mula sa BPCI ay mapapasailalim na ng Miss Universe Philippines Organization ang pageant para sa kinatawan ng bansa sa Miss Universe.
Ilang linggong usap-usapan iyon noon dahil wala pang pormal na anunsiyo mula sa noo'y kilalang franchise holder ng pageant sa bansa.
Ang Miss Universe Philippines franchise ay nasa ilalim ng Binibining Pilipinas Charities Inc. (BPCI) sa loob ng 55 taon. Ang chair ng BPCI ay si Stella Marquez Araneta.
Hanggang sa noong December 2019, opisyal na nailipat ang Miss Universe Philippines franchise sa Miss Universe Philippines Organization.
Pinamumunuan ito ni Miss Universe third runner-up Shamcey Supsup bilang national director.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika