Personal na tampo o tawag ng tungkulin?
Ganito raw nahahati ang interes ni Film Academy of the Philippines (FAP) director-general Vivian Velez sa usapin ng pagbasura sa franchise renewal application ng ABS-CBN.
Ito ay batay sa Facebook post ng screenwriter-director na si Bibeth Orteza nitong Linggo, July 12.
Kaugnay ito ng word war sa pagitan ni Vivian at ng kapwa beteranang aktres na si Isabel Rivas.
Nag-ugat ang bangayan ng dating magkaibigan nang umalma si Isabel sa pasasalamat ni Vivian—sa isang Facebook post—sa mga kongresistang bumoto upang pagkaitan ng prangkisa ang ABS-CBN.
Sumama ang loob ni Isabel kay Vivian dahil sa kawalan daw ng huli ng “empathy” sa mga kasamahan sa entertainment industry.
ISABEL, BIBETH, TETCHIE VS. VIVIAN
Naka-tag si Isabel sa post ni Bibeth nitong Linggo.
Ibinahagi ni Bibeth ang screenshot ng Facebook post ni Tetchie Agbayani, na isa ring beteranang aktres.
Ipinost ni Tetchie, 59, ang artikulo ng PEP.ph (Philippine Entertainment Portal) tungkol sa issue.
May titulo itong: “Isabel Rivas, binanatan si Vivian Velez sa pagbubunyi nito sa pagbasura ng ABS-CBN franchise.”
Sa komento ni Tetchie, sinabi nitong bilang mataas na opisyal ng FAP, ang dapat daw na “primary concern” ni Vivian ay ang kapakanan ng mga nasa entertainment industry.
“As ‘Director-General’ of FAP, her primary concern should have been the welfare of the industry workers.
“If she’s schadenfreude-ing now with all that has happened, she is undoubtedly deserving of her title and position,” saad sa post ni Tetchie.
Sinegundahan ni Bibeth ang argumento ni Tetchie.
Inilatag ni Bibeth ang dalawang bagay na dapat aniya'y pinagtimbang ng FAP director-general sa desisyon nitong paboran ang tuluyang pagpapasara ng pinakamalaking network sa bansa.
Patanong ang post ni Bibeth: “Uulitin ko: Ano ang mas importante?
“Ang tampo ng FAP head sa ABS-CBN, o ang kapakanan ng mga film workers na siyang dapat priority ng FAP?”
VIVIAN was once a kAPAMILYA
Hindi nagdetalye si Bibeth sa “tampo” raw ni Vivian sa ABS-CBN.
Pero sa Kapamilya network ginawa ni Vivian ang huling teleserye niya noong 2016.
March ng taong iyon nang biglaang umalis si Vivian sa ABS-CBN series na Tubig at Langis.
Ito ay matapos ireklamo ni Vivian ang pambabastos umano sa kanya ng bida ng serye na si Cristine Reyes.
Sa isang Facebook post, inireklamo ni Vivian na pinaalis siya ni Cristine sa pinaghahatian nilang dressing room.
Pero pinabulaanan ng production ng Tubig at Langis ang akusasyon ni Vivian laban kay Cristine.
Samantala, ang FAP ang counterpart ng Academy of Motion Picture and Sciences ng Amerika, na nagdaraos ng taunang Oscar Awards.
Bagamat pangunahing tinututukan ang sektor ng pelikula, nasa ilalim ng FAP ang iba’t ibang samahan sa buong entertainment industry.
Kabilang sa mahigit 10 guilds na nakapailalim sa FAP ang Katipunan ng mga Artistang Pilipino sa Pelikula at Telebisyon o KAPPT.
Nangunguna rin ang FAP sa pagbalangkas ng mga programa para sa ikabubuti ng mga manggagawa sa buong industriya ng entertainment.
OTHER CELEBRITIES REACT
Nagsipagkomento sa post ni Bibeth ang kapwa niya celebrities.
Sa comment ni Isabel, isinumbat niyang ang entertainment industry ang nagbigay ng pangalan kay Vivian, na pangunahing konsiderasyon sa posisyong tinatamasa nito ngayon.
Bilang opisyal ng gobyerno, dapat nga raw ay si Vivian ang magsilbing “peaceful bridge” ng gobyerno sa publiko.
Inulit uli ni Isabel na sobra siyang nasaktan na “ang saya” ni Vivian nang mag-post ng pasasalamat sa mga kongresista na tuluyang nagpasara sa broadcasting unit ng ABS-CBN.
Sabi pa ni Isabel (published as is): “the pain & insult i felt for the people in the network crying & lost about whats going to happend in theyr tomrws, indeed it crushed my spirit to the core.”
Komento naman ng film director at cinematographer na si Raymond Red, “guilty” si Vivian, ang 70 kongresista, at ang ibang sumuporta sa pagdadamot ng prangkisa sa ABS-CBN “of prioritizing vested interests, selfish motives, and personal vendettas.”
Dagdag pa ni Raymond: “Lahat sipsip sa poon nila all for money or power and positions.”
Ang aktor na si Dwight Gaston, sinabing sa simula pa man daw ay “never competent” si Vivian bilang pinuno ng FAP.
Ang isa pang aktor na si Richard Quan, naglagay ng confused face emoji sa post ni Bibeth.
“Nakakagalit” naman ang komento ng historian at TV personality na si Xiao Chua.
Samantala, "Ceasefire and Peace na muna sana" ang hiling ng dating aktor na si Dranreb Belleza sa gitna ng lumalawak na bangayan ng mga celebrities dahil sa ipinagkait na prangkisa ng ABS-CBN.
Bukas ang PEP.ph sa panig ni Vivian at ng ibang personalidad na nabanggit sa artikulong ito.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika