Tahimik na nagpaabot ng tulong ang actress-humanitarian na si Angel Locsin sa anim na jeepney drivers na ikinulong sa paglabag sa quarantine protocols sa Caloocan City.
Nabunyag ito nang lumabas sa social media ang video message ni Elmer Cordero, 72, habang nagpapasalamat kay Angel, 35.
Isa si Cordero sa grupo ng mga tsuper na inaresto sa pagsasagawa ng kilos-protesta sa EDSA, sa Caloocan City, nitong June 2.
Miyembro sila ng transport group na Pinag-Isang Samahan ng mga Tsuper at Operators Nationwide o PISTON.
Ang mga inarestong jeepney drivers ay tinaguriang “PISTON 6.”
June 9 nang i-post ng Twitter user na si Joshua Libarnes ang video message ni Cordero—na tinagurian ng social media bilang “Tatay Elmer.”
Kuha ang video nang araw ding iyon, nang makalaya ang matanda mula sa detention cell ng Caloocan City Police station.
Bitbit ang isang papel na nasusulatan ng “MARAMING SALAMAT! PISTON 6,” kita ang saya sa mukha nang nagbigay ng mensahe si Tatay Elmer para kay Angel.
Sabi ni Tatay Elmer: “Maraming salamat, Angel Locsin, sa lahat ng mga itinutulong mo sa aming suporta sa loob ng kulungan.
“Pati yung gamot, tsaka alcohol, lahat, kumpleto lahat.
“Sa lahat ng mga tulong mo, maraming-maraming salamat.”
Ayon sa report ng ABS-CBN News, nagbigay si Angel ng health kit essentials sa mga arestadong tsuper.
Laman ng health kit ang face masks, alcohol, vitamins, at iba pa.
Nakasaad pa sa report na katuwang ni Angel sa pagtulong sa PISTON 6 ang I Am Hope organization ni Bea Alonzo.
DRIVERS-PROTESTERS NABBED, JAILED
Bukod kay Tatay Elmer, inaresto rin sina Ruben Baylon, 59; Ramon Paloma, 48; Wilson Ramilia, 43; Severino Ramos, 59; at Arsenio Ymas Jr., 56.
Ikinulong ang PISTON 6 matapos sampahan ng mga reklamo sa paglabag sa physical distancing, disobedience to persons in authority, at illegal assembly.
Itinakda ang PHP3,000 piyansa sa bawat isa sa kanila.
Iprinotesta ng grupo ni Tatay Elmer na bawal pa ring mamasada ang mga jeepney sa ilalim ng general community quarantine (GCQ).
Giit ng jeepney drivers, halos tatlong buwan na silang walang kita simula nang suspendihin ang lahat ng public transportation sa Metro Manila noong March 17.
ANGEL: “IF YOU CANNOT HELP THEM, LET THEM GO HOME”
Noong June 4, sa isang post sa kanyang Instagram Stories ay umapela si Angel sa Caloocan City Police na palayain na ang anim na tsuper.
Mababasa sa post noon ni Angel (published as is):
“Pls. If you cannot help them, Let them go home.
“They just want food for their families.
“Maraming gutom.
“Sabihin na nating may natangap, pero hindi natin alam kung enough na ba yun para sa pamilya nila para mapilitan silang lumabas.
“Konting puso and consideration.”
Gaya ni Angel, kinondena rin ng aktres na si Jodi Sta. Maria ang pag-aresto at pagkulong sa anim na tsuper.
COMELEC COMMISSIONER SENDS HELP
Nag-viral sa social media ang pagdakip sa binansagang “PISTON 6.”
Sa katunayan, nag-ambag-ambag ang netizens upang mapiyansahan ang mga tsuper.
Kabilang si Commission on Elections (Comelec) Commissioner Rowena Guanzon sa nag-abot ng tulong pinansiyal habang kinakalap ang piyansa ng PISTON 6.
Nag-assign din si Guanzon ng lawyer para makipag-ugnayan sa abogado ng anim na jeepney drivers, upang mapalaya kaagad ang mga ito.
Noong June 8, nakapagpiyansa at nakalaya na ang apat sa mga tsuper.
Pero nanatili pa rin sa piitan si Tatay Elmer at si Ramilla.
Pareho raw kasing may nakabimbing hiwalay na kaso ang dalawa: estafa kay Tatay Elmer at carnapping kay Ramilla.
Nagpiyansa ng PHP10,000 si Tatay Elmer sa Caloocan Metropolitan Trial Court Branch 51.
Nakumpirma naman kalaunan na napagsilbihan na ni Ramilla sa preso ang kaso niya.
Dahil dito, kinabukasan, June 9, ay nakalaya na rin ang natitirang dalawa sa PISTON 6.
Isa ka bang showbiz fan na laging updated at naghahanap ng latest chika? Share what you know. Join here! https://bit.ly/PEPChika