Iniaalay ni Angello Perez ang kanyang college diploma sa pumanaw na kapatid, ang aktor na si AJ Perez.
Sa kanyang social media accounts, ipinost ni Angello ang graduation picture niya na yakap-yakap ang picture frame ni AJ.
Nagtapos si Angello ng kursong BS Psychology sa Ateneo de Manila University, Katipunan, Quezon City.
Siyam na taon na ang nakalilipas mula nang namatay ang kanyang kuya, pero nananatili pa rin daw itong inspirasyon ni Angello.
“Nine years since you left, but I’ve always made it a point to dedicate all my accomplishments to you,” mensahe ni Angello sa kanyang Instagram post ngayong Biyernes, April 17.
“You would have been a college graduate by now.
“This year, I’d like to believe that we are graduating together and I will be thinking of you when I receive that diploma.
“Thank you for always being my inspiration [heart emoji]”
Viral sa Facebook ang post na ito ni Angello.
Habang isinusulat ang artikulong ito, umabot na sa 58,000 reactions at 17,000 shares ito.
Ipinost niya rin ito sa Instagram.
POSTPONED GRADUATION CEREMONIES
Dahil sa ipinatutupad na enhanced community quarantine (ECQ) bunsod ng COVID-19 crisis, postponed ang graduation ceremonies ng mga paaralan at unibersidad.
Isa kasi sa mga mandato ng gobyerno ay ang pagbabawal sa mass gatherings para maiwasan ang pagkalat ng virus.
Nilinaw naman ng Department of Education (DepEd) na ang graduation ceremonies para sa mga nagtapos ngayong taon ay maaaring isagawa online, o kaya ay ganapin kapag wala na ang ECQ.
“Kung meron lang makakagawa ng online graduation rites, I think this is their choice, di natin puwedeng pigilan as long as di natin vina-violate ang home quarantine," sabi DepEd Undersecretary Annalyn Sevilla sa report ng ABS-CBN News Online.
Binanggit din ng undersecretary ang Memorandum Order No. 42 ng DepEd, kung saan ang paaralan ang magdedesisyon kung ang seremonya ay ire-reschedule o itutuloy, bagamat online.
AJ PEREZ GONE TOO SOON
Si AJ ay pumanaw sa edad na 18 noong April 17, 2011, sa isang vehicular accident.
Papauwi na noon si AJ at ilang kasamahan matapos ng kanilang show sa Dagupan, Pangasinan.
Naganap ang malagim na aksidente sa highway sa Moncada, Tarlac.
Kabilang ang aktor sa Batch 13 ng Star Magic, ang talent management arm ng ABS-CBN.
Ka-batch niya sina Lauren Young, Empress Schuck, Dominic Roco, Felix Roco, at Valeen Montenegro.
Kabilang sa mga huling pelikula na ginawa niya ay ang Babe I Love You, Cinco, at Mamarazzi, na ipinalabas lahat noong 2010.
Itinampok siya sa maraming limited series ng Star Magic Presents mula 2006 hanggang 2008, at naging leading man ni Jessy Mendiola sa teleseryeng Sabel (2010).
Ang huli niyang acting project ay para sa isang episode ng Maalaala Mo Kaya, na ipinalabas noong April 30, 2011, o ilang linggo lang mula nang pumanaw siya.