Nag-trending si Bayani Agbayani matapos siyang batiin ng maraming Twitter users bilang "bagong finance undersecretary.”
Ito ay makaraang mabanggit ang pangalan ng 51-anyos na comedian-TV host sa kasagsagan ng special session ng Kamara nitong Lunes, March 23.
Nagkamali kasi ng banggit si Anakalusugan Party-list Representative Mike Defensor, 50, sa pangalan ng komedyante nang tukuyin ng kongresista si Finance Undersecretary Bayani Agabin.
Nangyari ang pagkakamali ni Congressman Defensor habang nagsasagawa ng deliberasyon ang mga kongresista.
Tinatalakay noon ang panukalang magbibigay ng special powers kay Pangulong Rodrigo Duterte laban sa coronavirus disease o COVID-19.
Sa kalagitnaan ng pagsasalita ng kongresista sa podium, nasabi niya: “Kay Undersecretary Bayani Agbayani ng Finance...”
Kaagad naman siyang iwinasto ni House Speaker Alan Peter Cayetano.
“Ay, Agabin! Thank you, Mr. Speaker.
“Bayani Agbayani ba nabanggit ko?” natatawang idinugtong ni Congressman Defensor.
“I apologize, Mr. Speaker,” sabi ni Congressman Defensor.
WOW, MALI!
Makalipas ang ilang oras, kumalat sa Twitter ang video ng pagkakamali ng kongresista.
Nagkani-kanyang repost naman ang Twitter users.
Napagkatuwaan nilang batiin ang komedyanteng si Bayani bilang bagong finance undersecretary.
Ang ilang netizens, sinabing epektibong de-stresser para sa kanila ngayong may krisis ang hindi sinasadyang pagkakamali ni Congressman Defensor.
CONGRESSMAN DEFENSOR APOLOGIZES
Nitong Lunes ng gabi, nag-post sa Instagram si Congressman Defensor upang humingi ng paumanhin kina Bayani at Usec Agabin.
Post ng kongresista: “Apologies to my friends Usec Bayani Agabin and Bayani Agbayani for mixing their names in today’s session to raise 200B for the govts fight against COVID 19 virus. #apologies #BayaniAgbayani #BayaniAgabinq”
Tinutukoy ni Defensor ang PHP275-billion budget na inilaan ng mga mambabatas para matugunan ng gobyerno ang COVID-19 pandemic.
Sa huli, inaprubahan ng mga kongresista ang Bayanihan to Heal as One Bill para epektibong mapigilan ang pagdami ng nagpopositibo sa virus sa bansa.
Naaprubahan din ang parehong panukala sa Senado ngayong Martes ng madaling-araw, March 24.