Hindi inalintana ng Superstar na si Nora Aunor ang ulan noong umaga ng Sabado, February 8, upang hindi ituloy ang kanyang pamamahagi ng relief goods sa mga apektadong residente at pamilya sa Agoncillo, Batangas.
Ang bayan ng Agoncillo ang isa sa pinakaapektadong lugar noong sumabog ang Bulkang Taal.
Ayon sa source ng PEP.ph (Philippine Entertainment Portal), na nagpadala rin ng mga larawan sa ginawang relief operations ni Nora, kasama ng Superstar ang Nora Aunor Worldwide fans club niya.
Lahad ng source, “Pumunta talaga siya sa pinaka-affected na area sa Agoncillo na nasira ang mga bahay at halaman.
“Umuulan pa nung pumunta kami. Kanina lang ‘yan naganap.
“Saya-saya ng mga tao. Kahit umuulan lumabas sa mga bahay nila.”
Mga relief packs daw ang dala ni Nora, kasama ang kaibigang si Commissioner Reli de Leon ng Philippine Racing Commision (Philracom).
Ayon pa sa anonymous sender, “Isang mini truck lang... hindi mabilang ang mga nabigyan kasi nagbahay-bahay talag siya sa Agoncillo.
“As in yung mga nasa aplaya pinuntahan niya na sobrang naapektuhan talaga.”
Bukod kay Nora, marami nang celebrities ang nagpaabot ng kanilang tulong sa mga biktima ng pagsabog ng Bulkang Taal.
Ilan sa kanila ay sina Angel Locsin, Judy Ann Santos at asawang si Ryan Agoncillo, Melai Cantiveros at asawang si Jason Farncisco, Ara Mina, Sylvia Sanchez, Rossana Roces, at Ynez Veneracion.