Si Nadine Lustre ay nananatiling "exclusive artist" ng Viva.
Ito ang iginiit ng Viva Artists Agency sa ipinadala nilang official statement sa PEP.ph (Philippine Entertainment Portal) at iba pang miyembro ng media ngayong Lunes ng gabi, January 27.
Kaugnay ito ng inilabas na pahayag ni Nadine at ng legal counsel nitong si Atty. Lorna Kapunan na hindi na talent ng Viva Artists Agency ang aktres, at ito na ang mamamahala sa showbiz career niya.
Ngunit kinontra ito ng kompanyang sumugal at nagpasikat sa kanya.
Sa kanilang official statement, sinabi ng Viva Artists Agency na mayroong "valid and subsisting Management Contract" sa kanila.
Ayon sa batas, hindi maaaring i-withdraw ni Nadine nang mag-isa ang exclusive contract niya sa Viva.
Hindi rin magdadalawang-isip ang Viva Artists Agency na sampahan ng kaso si Nadine at ang sinuman o third parties na makikipagnegosasyon sa aktres para sa mga proyekto.
Narito ang kabuuang pahayag ng Viva Artists Agncy:
"Contrary to the Press Statement, Nadine remains an exclusive artist of VIVA as she has a valid and subsisting Management Contract.
"Under the law, Nadine cannot unilaterally withdraw from her contract with VIVA.
"Any dealings or professional engagements entered into by Nadine, without the consent or approval of VIVA constitutes breach of contract.
"VIVA shall initiate appropriate legal action against Nadine and/or third parties that directly deal with Nadine in contravention of Viva’s Management Contract."
Pinapirma ng Viva Artists Agency si Nadine ng build-up contract noong 2010.
Ang mga pelikulang Petrang Kabayo (2010) at Who’s That Girl (2011 ) ang mga project ni Nadine sa Viva bago siya binigyan ng malaking break sa Diary ng Panget, ang blockbuster movie nila ni James Reid noong 2014.
Mula noon, nagtuluy-tuloy na ang pagkakaroon niya ng pangalan sa local entertainment industry.