Ang mag-asawang Lotlot de Leon at Fadi El Soury ang managers ng basketball team na Quezon City Defenders, ang official team ng Quezon City sa National Basketball League (NBL).
Member ng team ang anak ni Lotlot na si Diego Gutierrez. Isa iyon sa mga dahilan kaya pinamahalaan nila ni Fadi ang grupo.
Lahad ni Lotlot, “Nakikita ko kasi ang hirap niya.
"So, kung makakatulong ako na mas mapagaan ang proseso for him to reach his dream and also for the boys, why not?
“I think, it’s really meant to be. Kasi when we were asked, everything went smoothly. Parang walang naging sagabal.
“Everybody agreed to help and to be there for the team. Parang tuluy-tuloy siya.”
High school pa lang si Diego ay miyembro na ito ng varsity team ng basketball.
Pinangarap din nitong makapasok ng PBA (Philippine Basketball Association).
“Siyempre, all of them naman. They’re hoping that they can get to that, so ito yung simula,” saad ni Lotlot.
Nakausap ng PEP.ph (Philippine Entertainment Portal) si Lotlot sa press launch ng Quezon City Defenders team noong November 9, Sabado, sa Cafe Ole, Diliman, Quezon City.
DIEGO GRATEFUL TO MOMMY LOTLOT
Malaki ang pasasalamat ni Diego sa kanyang mommy na suportado siya sa hilig at pangarap niya.
Ayon pa kay Lotlot, “Siyempre, nakikita ko ang sakripisyo niya. At saka, para wala tayong what ifs sa buhay.
“Kung kaya naman nating tumulong, bakit hindi?”
Maging ang mga kapatid na babae ni Diego, tulad ni Janine Gutierrez, ay buo ang suporta sa kanya.
“Kahit naman noong previous season, we would always be present. Basta libre kami, kumpleto kami na nandoon.
“Ako, si Mon, si Fadi, ang mga kapatid niyang babae. Mga boyfriends nila, girlfriend niya.
“So, talagang we’re all full support.”
Ang "Mon" na tinutukoy ni Lotlot ay ang ama ni Diego at ex-husband ng aktres na si Ramon Christopher.
Mas gusto ba ni Lotlot na nasa sports ang anak kesa nag-aartista rin?
Tugon niya, “Actually, it’s his choice. Kung nasaan ang puso niya.
"Kasi, never naman akong nagpilit sa mga anak ko kung ano ang dapat nilang gawin."
LOTLOT AS BASKETBALL TEAM MANAGER
Kadalasan, ang manager ng basketball team ay brand o kumpanya.
“We’re doing the best we can to support the Quezon City Defenders!” natawang sabi ni Lotlot.
“Naniniwala ako na kapag maganda ang intention, darating ang lahat ng blessings.
“So we have all the best intention for the kids and for the team and, hopefully, in God’s will, we’ll be able to support them with other people’s help also.”
Magastos maging manager ng basketball team?
“Magastos siya, oo, magastos siya!” natawang pagsang-ayon ni Lotlot.
“Pero for the love of, at saka pinagtutulungan naman naming lahat at nakikita namin ang sakripisyo ng mga bata. So, it makes us want to work harder.
“And sila rin naman ganun, so it’s teamwork, it’s vice versa.”
Bukod kay Diego, kabilang sa Quezon City Defenders sina Bryan Cabrera, Enzo Battad, Normel de los Reyes, Nikko Lazo, Joshua Roque, Joshua Bringas, Mj Enriquez, Nikko Lao, Mark Puspus, Bryan Nabayra, Dave Torregoza, JR Barde, Peter Cecilio, Jeff Comia, Adzhar Udjan, Jake Bagon, Patrick Boffa, at Edric Estacio.
Ang bayaw ni Lotlot na si Mickey Estrada ang head coach. Si Mickey ang mister ni Matet de Leon.
Binibiro si Lotlot na ngayong pinasok na niya ang sports, baka makalimutan na niya ang showbiz career niya at pagiging actress.
“Huwag naman sana!” natawang sabi niya.
“Nag-e-enjoy naman ako, e. And I believe, may purpose naman itong lahat.
"I don’t think na ibibigay sa akin ito ng Panginoon for nothing.
“So there’s a reason behind it na siya lang ang nakakaalam.”