Nalulungkot ang dating Kapamilya na si Martin del Rosario sa napipintong hindi pag-apruba ng renewal ng franchise ng ABS-CBN.
“Siyempre, nakakalungkot na maraming mawawalan din ng trabaho kung mangyayari man ‘yan,” seryosong sambit ng Kapuso actor nang mainterbyu ng PEP.ph (Philippine Entertainment Portal) sa mediacon ng pelikulang Because I Love You noong Hunyo 6, Huwebes, sa Cafe 1771 Events Place, Ortigas Center.
Patuloy niya, “Pero I think naman, yung ABS-CBN, ginagawa naman nila yung best nila or kung anumang mga ano nila para mag-survive.
“So iyon, ako, feeling ko naman, kakayanin naman nila.”
THE PANTI SISTERS
May balitang kukunin ng Black Sheep, isa sa mga film arm ng ABS-CBN, ang pelikulang The Panti Sisters nina Martin, Christian Bables, at Paolo Ballesteros.
Handa ba si Martin na muling tumapak sa bakuran ng ABS-CBN para sa promo nito?
“Hindi po yata ako papayagan dahil nasa contract. So, ayun,” sagot niya.
So, sino ang magpo-promote sa ABS-CBN?
“Si Christian... si Christian and si Paolo,” tugon ni Martin.
“Si Paolo yata, puwede. Ako lang yata ang hindi puwede. Pero si Christian at si Paolo, puwede.
“'Tapos, ako siguro, sa GMA na shows.”
Loveless ngayon si Martin. May dine-date man lang ba siya?
“Wala, wala. Wala pa rin. Masaya naman akong single.”
Ipalalabas na ang Because I Love You bukas, Hunyo 26, Miyerkules, sa mga sinehan.
Bida rito sina David Licauco at Shaira Diaz, sa direksiyon ni Joel Lamangan.
Produced ito ng ALV Films in cooperation with Garahe Films, and distributed by Regal Films.