May mini-Scream Festival na magaganap sa November 1, 2017 dahil dalawang horror movies ang magkasabay na magbubukas sa mga sinehan.
Ito ay ang Ghost Bride ng Star Cinema na mula sa direksiyon ni Chito Roño, at ang Spirit of the Glass 2: The Haunted ng OctoArts Films at idinirek ni Joey Javier Reyes.
May mga nag-aalalang posibleng magkasakitan sa box office ang mga nabanggit na pelikula.
Kaugnay nito, hiningi ng PEP.ph (Philippine Entertainment Portal) ang opinyon ni Orly Ilacad ng OctoArts Films, producer ng sequel ng Spirit of the Glass, tungkol sa hindi inaasahang pagkakaroon ng Scream Festival.
“It’s exciting,” sabi ni Boss Orly, na tila hindi apektado ng tapatan na mangyayari sa All Saints' Day.
Patuloy niya, “We welcome competition. A good movie like Spirit of the Glass deserves another sequel.
“It has a good cast. It’s well written and directed by Jose Javier Reyes.
“It introduces Miss Philippines Universe 2016 Maxine Medina.”
Bukod kay Maxine, introducing din sa Spirit of the Glass 2 ang Wowowin co-host na si Ashley Ortega.
Mga bida ng pelikula sina Cristine Reyes, Daniel Matsunaga, at Benjamin Alves.
Ang unang Spirit of the Glass ay ipinalabas noong 2004. Tampok dito sina Rica Peralejo, Dingdong Dantes, at Alessandra de Rossi.
Sa kabilang banda, bida naman sa Ghost Bride ng Star Cinema sina Kim Chiu at Matteo Guidicelli.